Лукатар 18 - Biblia ande chib Romani

E paramichi katar e phivli ta o krisari

¹ O Jesus phenda lenge iek paramichi te sikavel len kai morabi te molinpe sa o vreme, ta te na jasaren pi zor.

² Phenda lenge: Ande iek foro saia iek krisari kai ni darala e Devletar ta ni saia le liubao e llenenchar.

³ Isto ande gua foro saia iek phivli kai saia la iek chingar ta lleli kai gua krisari te mangel letar te chinel iek chachi kris pe lako dusmano.

⁴ Nakhlo but vreme ta o krisari ni kamela te del laia orba, mapalal mislisailo: Makar ni darav e Devletar ta ni dav liubao e llenen,

⁵ a sar gaia phivli del man pe gachin joli, ka chinav laki kris te na joliavel man ios.

⁶ O Gazda phenda: Gua si so phenda o bilacho krisari.

⁷ ¿A so mislin tumen kai o Del ni ka arakhel i pe llenen kai esvirisarda, kai mangen letar o riat ta ollivesea? ¿Ka mukel len te aduricharen?

⁸ phenav tumenge kai pomozil len oma. A kana ka avel o Chavo e Manuseko, ¿ka malavel llenen pe phuv kai si len pachape?

E paramichi katar o fariseo ta o publikano

⁹ O Jesus dia orba nesave llenenchar kai saia len but vera ande pete soke mislina kai von si chache, ta ni thovena sama nikake. Gale llenenge o Jesus phenda gaia paramichi:

¹⁰ Dui llene llele ando cher e Devleko te molinpe: Iek saia fariseo, a o gua saia publikano.

¹¹ O fariseo molilape pe porrne ta phenela gia: Ioi Devla, dav tut fala soke ni sem sargo ogola llene kai si chorane bilache ta llan avere rromienchar, ta kai ni sem sargo gava publikano.

¹² Me alluniv dui droma ande efta llive ta dav tut des katar e stotina katar sa so lau.

¹³ A o publikano achilo mai palal ta ni tromala ni te dikhel upre po miloso, a marelape ando kolin ta phenela: ¡Ioi Devla, te avel chuke zalba mandar, kai sem iek bilacho!

¹⁴ phenav tumenge kai gava lleno kai chidel love irisailo kai po cher llindo chacho, a o fariseo iok. Soke gua kai bariarel vou pe, ka avel thodo ando lallao. A ko cherela vou pe mai minono, ka avel bariardo.

O Jesus blagosil e minonen

¹⁵ Anena kai o Jesus i minonen te thovel pe va pe lende. A kana e disipulura dikhle, die pe llene kai anena e minonen.

¹⁶ Ondaka o Jesus ikharda len ta phenda lenge: Muken te aven mande e minone ta na achaven len, soke e charoina e Devleki si golengi kai si sargo von.

¹⁷ Chachimaia phenav tumenge kai kogo ni lela e charoina e Devleki sargo iek minono, ni ka del andre.

Iek lleno barvalo del orba e Jesusea

¹⁸ Iek katar e gazda puchla e Jesuse: Kovachi lachea, ¿so morabi te cherav te lau o zivoto ostade?

¹⁹ O Jesus phenda leke: ¿Soke ikhare man lacho? Samo iek si lacho, o Del.

²⁰ Tu llane e zakonura: Na cher kurvaluko, na mundar, na chor, na ikan bune ta de liubao che dade ta che da.

²¹ Gua lleno phenda leke: Sa gola ezgode cherdem len sar kana sema ternorro.

²² Kana o Jesus asunda goia orba, phenda leke: Iek ezgoda trubul tut te chere: Bichin sa so si tut ta dele e chorrenge. Gia ka avel tut barvalipe ando miloso. Ondaka aide ta lla pala ma.

²³ A kana gua lleno asunda goia orba, tristosailo but, soke saia but barvalo.

²⁴ Kana dikhlale gia, o Jesus phenda leke: ¡Gia trudno si e barvalenge te den ande charoina e Devleki!

²⁵ Mai lesno si iekhe devake te nakhel katar e iak iekhe suviaki, neko te del iek barvalo ande charoina e Devleki.

²⁶ E llene kai asunde le phende: ¿A ko ka avel braduime?

²⁷ O Jesus phenda lenge: So e manusa nasti ka cheren nikada o Del sai cherel le.

²⁸ O Pedro phenda leke: Gazda, amen muklam sa amare ezgode ta llelam pala tu.

²⁹ Vou phenda lenge: Chachimaia phenav tumenge kai varesavo lleno kai pala e charoina e Devleki mukela cher, o rromia, o phlal, o dade ta dea, o chaurren,

³⁰ ka lel ios mai but ande gava zivoto, ta ando zivoto kai avel ka len o zivoto ostade.

O Jesus pale o trito phenel kai ka merel

³¹ O Jesus ikharda pe iek rig e disipulonen, ta phenda lenge: Akana aven ando Jerusalem, kote kai si te cherdol sa so pisisarde e poraukura katar o Chavo e Manuseko.

³² Ka den le kai e sudura rromanura, ta ka maren letar espurnia, ka kusen le ta ka chungarden le.

³³ Ka chalaven le ta ka mundaren le. A pala e trin llive ka ustel katar o meripe.

³⁴ Von ni acharde niso katar goia ezgoda, ta ni llanena katar so dela lenge orba, soke gola sea ezgode kai nasti acharena len.

O Jesus sastarel iekhe korre ando Jeriko

³⁵ Kana o Jesus avela pasa o Jeriko, iek korro kai besela pasa o drom ta mangela esmola,

³⁶ kana asunda kai nakhena but llene, puchla so saia.

³⁷ Phende leke kai o Jesus katar o Nazaret nakhela kotar,

³⁸ ondaka vou urkisarda: ¡Jesus, Chavo e Davideko te avel chuke zalba mandar!

³⁹ E llene kai llana anglal dena po korro te achel, a vou urkila ios mai zurale: ¡Chavo e Davideko, te avel chuke zalba mandar!

⁴⁰ O Jesus achilo ta phenda te anen le lete. Kana avilo pase, puchla le:

⁴¹ ¿So mange te cherav pala tu? O korro phenda: Gazda, mangav te dikhav.

⁴² O Jesus phenda leke: ¡Akana ka dikhe! Pala cho pachape sastilan.

⁴³ Ondaka isto kote, o korro dikhla, ta llelo pala o Jesus ta blagosila e Devle. Ta sa e llene kai dikhle gua, i von blagosina e Devle.