Лукатар 16 - Biblia ande chib Romani

E paramichi katar o sluga llanglo

¹ Ta i phenda o Jesus pe disipulonenge: Saia iek lleno barvalo kai saia le iek sluga ta avile te phenen leke kai o sluga zatrila leko barvalipe.

² Ondaka o gazda ikharda le ta phenda leke: ¿Soke phenen mange gala orbe tutar? phen mange katar cho rado, soke ia nasti ave ios mo sluga,

³ O sluga mislisailo: ¿So ka cherav akana kai mo gazda mukel man bi radoia? Inai man zor te radiu ande phuv, ta lallao mange te mangav esmola.

⁴ Ia llanav so ka cherav te avel man kate te llau kana ka achav bi radoko.

⁵ Ondaka ikharda iekhe po iekhe golen kai sea unllile leke gazdake. Puchla e purvo: ¿Pe gachin san unllile me gazdake?

⁶ Gua lleno phenda leke: Sem leke unllile stotina burura zeitino. O sluga phenda leke: Etalo kate cho lil kai san leke unllile. Bes oma ta pisisar kai san leke samo pinda.

⁷ Mapalal puchla avere: A tu, ¿Pe gachin san leke unllile? Vou phenda leke: Stotina vreche lliu. O sluga phenda leke: Etalo kate cho lil kai san leke unllile. Pisisar kai san leke samo ojtovardes.

⁸ O gazda llangla kai o bilacho sluga saia bizai prema sar cherda e ezgode. Gua si soke kana o manus cherel pire bucha, e llene kai si e suetoke si mai bizai neko e llene kai si e villeloke.

⁹ Phenav tumenge te dobin amalen e kojamne barvalimaia kai si ande gava sueto, ta gia kana o barvalipe kojamno ni ka avel ios, ka avel tumen ko te lel tumen ande chera kai si ando miloso.

¹⁰ Gua kai arakhel so si eftino, arakhel i so si kuch. A ko inai chacho pe so si eftino, inai chacho pe so si kuch.

¹¹ Te na avilen chache e barvalimaia kai si kojamni, ¿ko ka del tumende o chacho barvalipe?

¹² A te na avilen chache pe so si averengo, ¿ko ka del tumen so si tumaro?

¹³ Ni iek sluga nasti radil duie gazdenge. Soke ka murzil pe iek ta ka volil ogole, o ka kandel iekhe a ogoleke ni ka thovel sama. Nasti radilpe e Devleke ta i e barvalimake.

¹⁴ E fariseura, kai volina but e love, kana asunde sa e orba, marde espurnia katar o Jesus.

¹⁵ A o Jesus phenda lenge: Tumen cheren tumen chache angla e llene, a o Del pinllarel tumare lie. Soke so e manusenge si kuch, e Devleke ni mol le niso.

O zakono ta e charoina e Devleki

¹⁶ O zakono ta e poraukura resen llik kai o Juan. Ta sar kotar phendol e lachi viasta katar e charoina e Devleki, ta sa cheren zor te den andre.

¹⁷ Mai lesno si te na avel ios o miloso ta e phuv, neko te na cherdol e ezgoda mai minoni kai si pisime ando zakono.

So sikavela o Jesus kana mangen te mukenpe

¹⁸ Iek lleno te mukelpe katar pi rromi ta te zinilpe averiaia, cherel kurvaluko, a gua kai zinilpe iekhe mukliaia, i vou cherel kurvaluko.

E paramichi katar o barvalo ta o Lasaro o chorro

¹⁹ Saia iek lleno barvalo, kai thovela pe pete patave lache ta barikane ta suako llive cherela iek glamno jape.

²⁰ Saia i iek lleno chorro kai ikhardola Lasaro, ta leko mas saia sa chindo ta besela pe phuv angla o udar e barvaleko.

²¹ Gava lleno chorro mangela te jal so perela katar e sinia e barvaleki ta te pherel po lli, ta e llukela avena te charran o chindipe katar leko mas.

²² Iek llive o lleno chorro mulo, ta e suechura inllarde le te besel te jal pasa o Abraam. Mapalal i o barvalo mulo, ta prajosarde le.

²³ Ta kana o barvalo patilape kote kai llan e llene kai maren, dikhla upre ta dikhla duratar e Abraame ta e Lasaro kai besela pasa le.

²⁴ Ondaka urkisarda: ¡Dade Abraam, te avel chuke zalba mandar! Bichal e Lasaro te chingarel po nai ando pai ta te sudravel mi chib, soke nakhav bari patnia ande gaia iag.

²⁵ A o Abraam phenda leke: Chavea, de tut golli kai kana sana llundo lian o lachipe kai perela tut, ta o Lasaro lia o bilachipe kai perela le. Akana vou lel o lachipe kate, ta tu nakhe patnia.

²⁶ Ta i maskar amende ta tumende si iek bari jar, ta gola kai mangen te nakhen katar incha, nasti cheren le, ni okotar nasti nakhen karinga.

²⁷ O barvalo phenda: Dade Abraam, mangav tutar te bichale e Lasaro kai me dadeko cher,

²⁸ kote si man panch phlal, te del pe lende, ta gia te na aven i von pe gava than e dukhengo.

²⁹ O Abraam phenda leke: Len ia si so pisisarda o Moises ta e poraukura: ¡Cheren so si pisime!

³⁰ O barvalo phenda: Dade Abraam, ni resel samo golea. A te ustel iek mulo katar o meripe ta te sikadol lenge, von irinape katar pe bilache droma.

³¹ A o Abraam phenda leke: Te na mangena te cheren so phenda o Moises ta e poraukura, ni ka pachan ni te ustel katar o meripe iek mulo.