Лукатар 15 - Biblia ande chib Romani

E paramichi katar o chobano kai malavel pe bakre

¹ Sa e publikanura ta aver llene kai lengi viasta saia bilachi avena kai o Jesus te asunen le.

² E fariseura ta e kovacha e zakonoke dena leke orbe pala gua, ta phenena: Gava si pachivalo e llenenchar kai si bilache ta i jal lenchar.

³ Ondaka o Jesus phenda lenge gaia paramichi:

⁴ ¿Ko tumendar, te si le stotina bakre ta te jasaol leke iek lendar, ni mukel ogole iniavardes ta inia ando vos ta llal pala o bakro o jasardo, lligo ni malavel le?

⁵ Ta kana malavel le veselimaia thovel le pe pe dume,

⁶ ta kana avel kai po cher ikharel pe amalen ta e llenen kai zivin pasa le, ta phenel lenge: Veselin tumen manchar, soke maladem e bakre kai jasailoa mange.

⁷ Phenav tumenge kai isto gia si mai but veselia ando miloso pala iek lleno bilacho kai del pe kai o Del neko pala iniavardes ta inia llene chache kai ni trubul len te irinpe katar pe bilache droma.

E paramichi katar e diskinia kai malavel po tolari

⁸ O Jesus phenda lenge aver paramichi: ¿Savi diskinia kai si la des tolaria ta jasarel iek lendar, ni phabarel iek memeli ta metil o cher ta rodel prezomaia lligo ni malavel le?

⁹ Ta kana malavel le, ikharel pe amalen ta e diskinien kai zivin pasa la, ta phenel lenge: Veselin tumen manchar, soke ia maladem o tolari kai jasardema.

¹⁰ Phenav tumenge kai isto gia si veselia maskar e suechura e Devleke pala iek bilacho kai lel e Devle.

E paramichi katar o Dad kai volil pe chaurre

¹¹ O Jesus phenda i gaia orba: Iek lleno saia le dui chaurre,

¹² ta o mai terno phenda pe dadeke: Dade, de man akana e love kai ka peren man kana ka mere. Ondaka o dad fulada so saia le e duienchar.

¹³ Nakhle nesave llivesa ta o chavo o mai terno bichinda so pelaia le, ta gole lovenchar llelotar dur, ande aver phuv, ta zatrisarda sa ando bilachipe.

¹⁴ A kana zatrisarda sa so saia le, avila but bok ande goia phuv, ta ni saia len so te jan ta vou nakhela bok.

¹⁵ Llelo te mangel rado katar iek lleno katar gua foro ta bichalda le ando vos te arakhel e balen.

¹⁶ A vou saia gia bokhalo kai mangela te jal so jana e bale ta te pherdol leko lli, a niko ni dela le.

¹⁷ Ondaka avilo vou pete ta mislisailo: ¡Pe gachin llene kai radin ande me dadeko cher si len sa o jape kai mangena, a me kate merav bokhatar!

¹⁸ Ka iriv man kai me dadeko cher, ta ka phenav leke: Dade, cherdem o bilachipe e Devleke ta i chuke.

¹⁹ Ni sem lacho te avav cho chaurro. Cher man sargo iek katar e llene kai radin chuke.

²⁰ Ondaka llelo ta irisailo kai o cher pe dadeko. Kana vou saia dur, leko dad dikhla le ta avila leke zao letar. Prastio lete, ta lipisarda le pe pete ta chumidia le.

²¹ O chavo phenda leke: Dade, cherdem o bilachipe e Devleke ta i chuke. Ni sem lacho te avav cho chaurro.

²² A o dad phenda pe slugenge: Ikanen oma e mai lache patave ta thoven len pe lete, ta thoven i iek angrusti ande leko nai ta minie ande leke porrne.

²³ Ta anen e guruve e mai thule ta mundaren le. ¡Ta chera iek pachiu!

²⁴ Soke gava chaurro murno saia mulo ta zivisarda pale. Jasailoa ta maladam le. Ta cherde e pachiu.

²⁵ A o phlal o mai purano saia ando vos. Kana irisailo ta avilo pasa o cher, asunda e llilia ta o chelipe.

²⁶ Ondaka ikharda iekhe llene katar e sluge ta puchla le so cherena.

²⁷ O sluga phenda leke: Cho phlal irisailo. Ta cho dad phenda te mundaren e guruve e mai thule, soke malada le sasto.

²⁸ Ondaka o phlal o mai purano jolailo pe gachin kai ni kamela te del andre, ta leko dad saia te likel avri te mangel letar te del.

²⁹ Vou phenda pe dadeke: Tu llane pe gachin burs radisardem chuke, ta cherdem sa so phendan mange, ta nikada ni dian man ni iek busnorro te cherav iek japorre me amalenchar.

³⁰ A akana kai avilo gava chaurro chiro, kai zatrisarda che love e bilache diskinienchar, mundare leke o guruv mai thulo.

³¹ O dad phenda leke: Chavea murno, tu san manchar suako llive, ta sa so si man si chiro.

³² A saia te chera gava iekhe jamaia ta te veseli amen, pala cho phlal, soke saia mulo, ta zivisarda pale. Jasailoa ta maladam le.