Лукатар 13 - Biblia ande chib Romani

Kein tumen ta ka zivin

¹ Isto ande gua vreme llele nesave llene te dikhen e Jesuse, ta phende leke kai o Pilato bichaldaia te mundaren bute llenen kai sea katar phuv katar e Galilea. Gava mundaripe avilape kana von dena o kurbano e Devleke.

² O Jesus phenda lenge: ¿Tumen mislin kai gala llene galileura von mule soke sea mai bilache neko ogola llene katar lengo foro?

³ phenav tumenge kai iok, a i tumen te na irisailen kai o Del, i tumen ka meren.

⁴ ¿A so mislin kai gola desojto kai mule kana o cher katar o Siloe pelotar upral pe lende sea mai dosale neko ogola kai zivina ando Jerusalem?

⁵ phenav tumenge kai iok, a i tumen te na irisailen kai o Del, i tumen ka meren.

E paramichi katar o kas simochinengo kai ni dia simochine

⁶ O Jesus phenda lenge gaia paramichi: Iek lleno saia le iek kas simochinengo kote kai bariarela e drakha, ta llelo te dikhel dal sea simochine po kas, a ni malada ni iek.

⁷ Ta phenda e lleneke kai arakhela e drakha: Cheren trin burs kai me avav kai gava kas pala e simochine, a nikada ni maladem ni iek. Chinle, soke samo gia si thodo ande phuv.

⁸ A o lleno kai arakhela e phuv phenda leke: Gazda, mukle gava burs, ka mukliarav e chik kai si truial letar ta ka thovav gosnia ande phuv.

⁹ Golea sai del simochine. A te na dia, ondaka chin le.

O Jesus ando llive sabado sastarel iekhe diskinia nasuali

¹⁰ Iek llive sabado o Jesus sikavela ande iek khanlliri e judionengi,

¹¹ ta kote saia iek diskinia kai saia nasuali desojto burs. Iek duo bilacho muklaia lake zea bange, ta nasti ortolape.

¹² Kana o Jesus dikhla la, ikharda la ta phenda lake: Chei, ia san sasti katar cho nasualipe.

¹³ Thoda pe va upral pe la, ta isto kote e diskinia ortosaili ta thoda te blagosil e Devle.

¹⁴ A o gazda katar e khanlliri e judionengi jolailo, soke o Jesus sastarda la ando llive sabado, ta phenda e llenenge: Si sou llive te radi. Aven ande gola llivesa te aven sastarde, a na ando llive sabado.

¹⁵ O Gazda phenda leke: Kojamnalen, ¿vareko tumendar ni putarel pe guruve ta pe magarche ando llive o sabado, te inllarel le te piel pai?

¹⁶ Gaia diskinia kai si katar e vicha e Abraameki ta kai o Satanas phanglaia la gale nasualimaia cherel desojto burs, ¿saia te na sastardol makar avela ando llive sabado?

¹⁷ Kana o Jesus dia goia orba leke dusmanura achile ando lallao, a sa e llene veselinape kana dikhena e bare ezgode kai vou cherela.

E paramichi katar e simicha mostasaki

¹⁸ O Jesus phenda: ¿Pe so mizil e charoina e Devleki ta prema so sai phene kai si?

¹⁹ E charoina e milosoki si sargo e simicha katar e mostasa kai iek manus lia la ta thoda la ande chik katar pi umal, ta cherdol sargo iek kas, gia baro kai e chiriklia cheren pe kuibura pe leke krangura.

E paramichi katar e levadura

²⁰ O Jesus phenda: ¿Pe so mizil e charoina e Devleki?

²¹ E charoina e Devleki si sargo e levadura kai lia iek diskinia ta thoda la ande iek umpa arina ta sa goia arina phukhili.

O udar tanguno

²² Kana o Jesus llala karing o Jerusalem, sikavela ande forura ta ande forichura katar vou nakhela.

²³ Iek lleno puchla le: Gazda, ¿cherricha si e llene kai ka braduin pe? Vou phenda:

²⁴ Cheren te den katar o udar o tanguno, soke phenav tumenge kai but llene ka mangen te den, ta nasti ka cheren le.

²⁵ Kana o gazda e chereko ka ustel ta ka phandel o udar, tumen, gola kai sen avri, ka maren po udar ta ka phenen: Gazda, putar amenge. A vou ka phenel tumenge. Ni llanav katar sen tumen.

²⁶ Ondaka tumen ka phenen: Jalam ta pilam tuia, ta tu sikadan pe droma amare foroke.

²⁷ A vou ka phenel: Ni llanav katar sen tumen. ¡Durion mandar, bilache llene!

²⁸ Ondaka kote ka avel o roipe ta e bari dar, soke ka dikhen e Abraame, e Isaake ta e Jakobo ta sa e profetanen ande charoina e Devleki, ta ka dikhen sar sen chudine avri.

²⁹ Soke ka aven llene katar suako rig, te besen te jan ande charoina e Devleki.

³⁰ Ondaka nesave llene kai akana si palune ka aven e purve, ta nesave llene kai akana si e purve ka aven e palune.

O Jesus rovel cheres o Jerusalem

³¹ Ta i avile nesave fariseura, ta phende e Jesuseke: Llatar katar, soke o Erodes mangel te mundarel tut.

³² Vou phenda lenge: Llan ta phenen gole lisichake kai allive ta thiara ka tradau e llavolonen ta ka sastarav e nasualen, ta kai aver thiara ka getosarav.

³³ A allive si te phirav, ta thiara ta i aver thiara, soke inai sukar te merel iek profeta avri katar o Jerusalem.

³⁴ ¡Jerusalem, Jerusalem, kai mundare e profetanen ta chalave e barrenchar e llenen kai o Del bichalel chuke! ¡Pe gachin droma manglem te chidau che chaurren, gia sar e khañi chidel pe pilichonen telal tala pe pakha, a tumen ni kamlen!

³⁵ Asunen, tumaro cher ka achel pusto, ta phenav tumenge kai ni ka dikhen man pale lligo ni ka avel o vreme kai ka phenen tumen: ¡Blagosime gua kai avel ando anav e Devleko!