Лукатар 12 - Biblia ande chib Romani

O Jesus sikavel katar e kojaipe

¹ Chidinailo but baro sueto, pe gachin kai ustavena iek avere. O Jesus dia orba mai anglal pe disipulonenchar ta phenda lenge: Arakhen tumen katar o kojaipe e fariseonengo.

² Soke sogo si gurudino ka sikadol, ta sa so cherdol po chorial ka llangliolpe.

³ Goleke, sogo phendem tumenge ando truniariko, ka asundol ando villelo. Ta sogo phenden po chorial phangle udarea, ka urkinle upral pe chera.

Katar si te dara

⁴ Amalen, tumenge phenav, morabi te na daran katar e llene kai mundaren e esnaga, soke mapalal nasti cheren tumenge niso ios.

⁵ Me ka phenav tumenge katar morabi te daran: Tumen morabi te daran katar gua kai lel o zivoto ta mapalal si gazda te chudel le ando tufano. Ea, katar gua si te daran.

⁶ ¿Ni bichindon panch chirikliorra pe dui tolaricha? A o Del ni bristarelpe katar ni iek lendar.

⁷ A llik e bal tumare soreke si llinde e Devletar iek po iek. Goleke na daran: Mai mol tumen neko but chirikliorra.

Phen e llenenge kai pacha ando Jesus

⁸ Phenav tumenge kai vareko te phenela kai pinllarel man angla e llene, i o Chavo e Manuseko ka phenel kai pinllarel le angla e suechura e Devleke.

⁹ A o lleno kai phenela kai ni pinllarel man angla e llene, i o Chavo e Manuseko ka phenel kai ni pinllarel le angla e suechura e Devleke.

¹⁰ O Del ka prostil llik gole llene kai ka kusela e Chave e Manuseke. A ni ka prostil gole llene kai kusela e Santone Duo.

¹¹ Kana ka inllaren tumen ande khanllira e judionenge, o angla e llene kai chinen e krisa ta angla e sudura, na daran sar ka chacharen tumen o so ka phenen,

¹² soke kana ka avel gua vreme te den orba, o Santo Duo ka sikavel tumen so te phenen.

E dar kai si ande love

¹³ Iek lleno maskar e llene phenda e Jesuseke: Kovachi, phen me phlaleke te del man e love kai peren man katar so mukla amenge amaro dad.

¹⁴ A o Jesus phenda leke: ¿Ko phenda tumenge kai me ka chinav tumenge e kris o kai me ka lacharav gala ezgode maskar tumende?

¹⁵ Ta i phenda: Arakhen tumen katar llia e lovengi. Soke o zivoto ni istardol pe ezgode kai si e manuse.

¹⁶ Ondaka o Jesus phenda lenge gaia paramichi: Saia iek lleno barvalo, kai leki phuv dia but lliu.

¹⁷ O barvalo thoda te mislilpe: ¿So ka cherav? Inai man kai te guruvav mo lliu.

¹⁸ Ta phenda vou peke: Ia llanav so ka cherav. Ka peravav gala chera kai si man te guruvav o lliu, ta ka cherav aver mai bare, te guruvav sa mo lliu ta sa so si man.

¹⁹ Ta mapalal ka phenav me mange: Amala, si tut but ezgode gurudine bute bursenge, muk te lelpe tutar o chiñipe, ja, pi, ta veselisar cho zivoto.

²⁰ A o Del phenda leke: Dilea, isto allive ka mere, a so si tut gurudino ¿kake ka achel?

²¹ Isto gia cherel o lleno kai chidel o barvalipe vou peke, a angla o Del vou si chorro.

O Del arakhel pe chaven

²² Mapalal o Jesus phenda pe disipulonenge: Gava phenav tumenge: Na brigin tumen pala so ka jan te zivin, ni pala e patave soia ka premenin tumen.

²³ O zivoto mol le mai but neko o jape, ta e esnaga mai mol neko e patave.

²⁴ Dikhen pe chiriklia: ¿Ni thoven e simiche ande phuv ta ni ikanen o lliu kana bariol, ta inai len chera te guruven o lliu, a o Del sa iek del len te jan? ¡Ni mol tumen mai but neko e chiriklia!

²⁵ A o manus mai te brigilpe, ¿sai ka cherel te zivil iek llive mai but?

²⁶ A te nasti cheren ni e ezgoda mai minoni, ¿soke brigin tumen pala ogola ezgode?

²⁷ Thoven sama sar barion e lulunlla kai ni radin ta ni cheren peke patave. A phenav tumenge kai ni o charo o Salomon sa pe barimaia ni furiadilo sargo iek lulunllin.

²⁸ A o Del te furiavel gia o zelenipe, kai allive si ando vos ta kai thiara ka phabardol ande furnava, ¿Pe gachin mai but ka furiavel tumen, manusalen kai inai tumen pachape?

²⁹ Goleke, na llan brigime, te roden so ka jan ta so ka pien.

³⁰ Soke gala si e ezgode kai brigin e llenen e suetoke, a tumen si tumen iek Dad kai llanel sa so trubul tumen.

³¹ Goleke, roden e charoina e Devleki, ta ka len sa gala ezgode.

Barvalipe ando miloso

³² Tumen sen me bakre, na daran. Tumen ni sen but, a o Dad, kai si lacho, mangla te del tumen e charoina.

³³ Bichinen so si tumen, ta den golen kai trubul len. Cheren tumenge anbave kai ni ka pharradon ta barvalipe ando miloso kote kai inai o son, kai o chorano nasti del andre ta kai ni e papuruga nasti zatril.

³⁴ Soke kote kai si tumaro barvalipe, i kote ka avel tumaro lio.

Morabi te prezon

³⁵ Si te aven lacharde ta tumare lampare phabarde

³⁶ sargo sluge kai aduricharen te irilpe lengo gazda katar o biau, ta gia kana ka irilpe ka marel po udar, te putaren leke oma.

³⁷ Blagosime e sluge kai ka aven llungade kana ka irilpe lengo gazda. Chachimaia phenav tumenge kai isto o gazda ka phenel lenge te besen pe sinia ta ka thovel angla lende o jape.

³⁸ Blagosime si von, te malada len llungade makar avela po dopas e riateki o mai anglal te llivosaol.

³⁹ Ta llanen gaia ezgoda, o gazda iekhe chereko te llanela ande savo saiato ka avel o chor, ni mukela nika te del ande leko cher te choren le.

⁴⁰ I tumen morabi te aven lacharde, soke o Chavo e Manuseko ka avel ando saiato kai tumen ni llanen.

O lacho ta o bilacho sluga

⁴¹ O Pedro puchla le: Gazda, ¿gaia paramichi phendan la amenge o saurrenge?

⁴² O Gazda phenda: ¿Ko si o sluga chacho ta vreno kai leko gazda mukel lete e llenen katar po cher, te sai den len te jan orta po vreme?

⁴³ Blagosime o sluga kai kana avel leko gazda malavel le kai cherel po rado.

⁴⁴ Chachimaia phenav tumenge kai o gazda ka thovel le te gazdaril pe sa leko lachipe.

⁴⁵ A gua sluga te mislisailo kai o gazda ni ka avel gia oma, ta marel ogole slugen ta i e diskinien, ta thovelpe te jal ta te piel ta te matol,

⁴⁶ ondaka ka avel leko gazda o llive kana vou ni mislilape ta o saiato kai vou ni llanel, ta ka dukhavel le, ta ka avel sargo e llene kai ni pachan.

⁴⁷ O sluga kai llanel so mangel leko gazda, a ni prezol ta ni kandel le, ka avel but mardino.

⁴⁸ A o sluga kai ni llanel ta cherel ezgode kai mapalal trubul te mardol, ni ka avel but mardino. Soke goleke ka si dino but, i ka mangelpe letar but. Ta gua kai arakhel but, si te radil ios mai but.

O Jesus, cherel te fuladon e llene

⁴⁹ Me avilem te phabarav iag pe phuv, ¡ta gia volisardema te avilia phabardi!

⁵⁰ Si te nakhav katar iek baro zumadipe. ¡Ta gia bari duk si mange kai aduricharav te nakhav la!

⁵¹ ¿Tumen mislin kai avilem te anav e pas pe phuv? phenav tumenge kai iok, me avilem te fulavav e llenen.

⁵² Soke katar angle, panch llene katar iek familia ka aven fulade, trin ka murzin pe dui.

⁵³ O dad ka murzil pe po chaurro, a e chorri ka avel ande joli pe daia, ta e bori ka avel ande joli pe sasuiaia.

¿Sar ni pinllare o vreme?

⁵⁴ O Jesus phenda e llenenge: Kana tumen dikhen kai liken e oblakura kotar katar perel o kham, phenen kai ka del peke, ta del peke.

⁵⁵ A kana e balav avel katar o sur, tumen phenen kai ka cherel tatipe, ta cherel tatipe.

⁵⁶ ¡Kojamnalen! gia sar llanen prema o miloso sar ka avel o llive, ¿sar ni llanen te pinllaren o vreme kai zivin?

Lachar e joli kai si tut e llenea kai marelpe tuia

⁵⁷ ¿Soke ni chine isto tu e kris katar so si orta?

⁵⁸ Te thovela tut vareko ande kris, ta lla lea kote kai chinen e krisa, cher te lachardo lea mai anglal te ave kote soke si tut vreme, te na inllarel tut angla o krisari. Soke te na cherdan gia, o krisari ka thovel tut ande sudonenge va, ta e sudura ka thoven tut ande rubie.

⁵⁹ Phenav chuke kai ni ka like kotar lligo ni ka pochine suako groso.