Лукатар 10 - Biblia ande chib Romani

O Jesus bichalel e eftavardes ta duie llenen

¹ Mapalal o Gazda esvirisarda i avere eftavardes ta duie llenen, ta bichalda len dui po dui angla le te llan ande sa e forura ta kai suako rig kai vou saia te llal.

² Ta phenda lenge: Chachimaia o lliu si but a cherricha e manusa kai radin. Goleke molintumen e Gazdake te bichalel llenen kai radin te chiden o lliu.

³ Llan tumen, thoven sama kai bichalav tumen sargo bakrorre maskar e ruva.

⁴ Na inllaren love ni jape ni minie, ta na den orba nikaia e dromea.

⁵ Kana ka den ande iek cher, mai anglal phenen sar san, e pas te avel ande gava cher.

⁶ A te avena kote llene pachivale, so manglen lenge ka cherdol. A te na avela gia, tumen ni ka jasaren niso.

⁷ Achen isto ande gua cher, jan ta pien katar so si len, soke gua kai radil morabi te pochindol leke. Na llan cher cherete.

⁸ Kana ka aven ande iek foro kai ka aven tumenchar pachivale, jan so ka den tumen.

⁹ Sastaren e nasualen kai si kote ta phenen lenge: E charoina e Devleki si pasa tumende.

¹⁰ A te avilen ande iek foro kai ni ka aven tumenchar pachivale, liken pe droma ta phenen:

¹¹ ¡Llik o prajo tumare foroko kai lipisailo pe amare porrne chinosara le, te llanen kai ni avilen amenchar pachivale! A llanen gava, kai e charoina e Devleki si pasa tumende.

¹² Phenav tumenge kai ande gua llive, e duk kai ka delpe gole foroke ka avel mai bari neko e llenenge kai zivina ande Sodoma.

E llene kai ni pachan

¹³ ¡Tesko chuke, Korazin! ¡Tesko chuke Betsaida! Soke te cherdilea ando Tiro ta ando Sidon e bare ezgode Devlikane kai cherdile tumende, von ollikana irisailea katar pe bilache droma ande patave zalosne ta chudiea prajo pe po soro.

¹⁴ A ando llive e krisako tumen ka aven mai dukhade neko e llene katar o Tiro ta katar o Sidon.

¹⁵ A tu, foro katar o Kafarnaum, ¿misli kai ka ave vazdino llik ando miloso? Ka fulie llik kai e charoina e merimaki.

¹⁶ Gua kai asunel tumen, asunel man, ta gua kai ni kamel tumen, ni kamel man ta ko ni kamel man, ni kamel gole kai bichalda man.

E eftavardes ta dui disipulura irinpe

¹⁷ E eftavardes ta dui irisaile but vesele ta phenena: ¡Gazda, llik e duura bilache kanden amen ande cho anav!

¹⁸ O Jesus phenda lenge: Ea, me dikhlem sar o Satanas pelotar katar o miloso sargo iek esterlicha.

¹⁹ Me diem tumen zor te nakhen upral pe sapa ta pe alakranura, ta suako zor e dusmanoki te jasarel tumenchar, ta te na nakhe ni iek duk.

²⁰ A na veselin tumen kai e duura kanden tumen, veselin tumen soke tumaro anav si pisime ando miloso.

Samo o Jesus llanel ko si o Dad

²¹ Ondaka o Jesus veselime katar o Santo Duo phenda: Blagosiv tut, Dade, Gazda e milosoko ta i e phuviako, soke gurudan gala ezgode katar e bizai ta katar e llangle ta sikadanlen e minonenge. Ea Dade, soke gia avila chuke drago te cherele.

²² Mo Dad dia mande sa e ezgode. Niko ni llanel ko si o Chavo, samo o Dad, ta niko ni llanel ko si o Dad, samo o Chavo ta o Chavo sikavel le kake vou mangela.

²³ Ondaka dikhla pe disipulura, ta phenda samo lenge: Vesele gola kai ka dikhen so tumen dikhen.

²⁴ Goleke phenav tumenge kai but poraukura ta charura mangle te dikhen so tumen dikhen, ta ni dikhle, ta te asunen so tumen asunen, ta ni asunde.

E paramichi katar o lacho samaritano

²⁵ Iek kovachi e zakonoko llelo te del orba e Jesusea, ta te zumavel le puchla le: Kovachi, ¿so morabi te cherav te lau o zivoto ostade?

²⁶ O Jesus phenda leke: ¿So si pisime ando zakono? ¿Sar chitisarele?

²⁷ O kovachi e zakonoko phenda: Volisar e Gazda cho Del sa che liea, sa che duoia, sa che zoriaia, ta sa che misloia, ta volisar avere sar voli tu tut.

²⁸ O Jesus phenda leke: Sukar dian orba. Te cherdan gua ka avel tut o zivoto.

²⁹ A o kovachi e zakonoko mangela te chacharel so puchla, ta phenda e Jesuseke: ¿A ko si e llene kai si pasa ma?

³⁰ Ondaka o Jesus phenda leke: Iek manus fuliela katar o drom kai llal katar o Jerusalem llik kai o Jeriko, ta jutle pe lete iek kochkaria kai chorde letar sa llik leke patave. Marde le ta lleletar ta mukle le sargo mulo.

³¹ Ondaka iek popo nakhela isto katar gua drom, ta kana dikhla le, nakhlo truial le ta llelotar.

³² Ta i iek levita avilo kote, ta kana dikhla le nakhlo truial le ta llelotar.

³³ A iek manus katar e Samaria kai llala isto katar gua drom, kana dikhla le, avila leke zalba.

³⁴ Ondaka avilo pasa le sastarda lake rane zeitinoia ta moliaia, ta ulisarda le e kirpenchar. Mapalal thoda le isto pe piri zen, inllarda le kai iek cher te sovel, ta arakhla le.

³⁵ Thiarinako o samaritano ikanda love kai mola len dui llive radoke, ta dialen kai o gazda e chereko ta phenda leke: Arak gale manuse, ta te dian mai but love, ka pochinav chuke kana me ka iriv man.

³⁶ ¿Savo katar gala trin cherdilo o lleno kai saia pasa gua kai marde le e kochkaria?

³⁷ O kovachi e zakonoko phenda: Gua kai avila leke zalba letar. O Jesus phenda leke: Lla ta cher tu isto gua.

O Jesus ando cher e Mariako ta e Martako

³⁸ O Jesus llelotar kotar ta avilo ande iek forichi, kote iek diskinia kai ikhardola Marta lia le ande po cher.

³⁹ E Marta saia la iek phei kai ikhardola Maria, ta e Maria besli kai e porrne e Jesuseke te asunel so vou phenela.

⁴⁰ A e Marta izdrala soke saia la but rado, ta avili pasa o Jesus ta phenda lake: Gazda, ¿Inai chuke briga kai mi phei mukel man korkorre sa e radoia? phen leke te pomozil man.

⁴¹ A o Jesus phenda lake: Marta, Marta, chuke si briga ta izdra pala but ezgode,

⁴² a si samo iek ezgoda kai trubul. E Maria esvirisarda e mai lachi, ta niko ni ka lel le latar.