Лукатар 1 - Biblia ande chib Romani

¹ But llene mangle te phenen ando Pisipe sa e ezgode kai o Del cherda maskar amende,

² isto gia sar phendelen amenge gola kai ande gua vreme sea kote ta kai pomozisarde te phendol e poroka.

³ Glamno Teofilo, i me rodiem sa prezomaia sar kana lie te llan angle gala ezgode ta avila mange sukar te pisiv len chuke isto gia sar nakhle,

⁴ te sai pinllare o chachipe katar so sikade tut.

Iek suecho phenel kai ka biandol o Juan gua kai kristil

⁵ Kana o Erodes saia charo katar e Judea, saia iek popo kai ikhardola Zakarias, kai saia iek katar e llene e Abdiaseke. Leki rromi ikhardola Elisabet, ta i voi saia katar e vicha e Aaronoki.

⁶ E li dui sea chache angla o Del ta cherena sa prema e zakonura ta niko nasti dosarela len katar niso.

⁷ A len ni saia len minone, soke e Elisabet nasti achela phari, ta e dui sea but phure.

⁸ Iek llive kana avilo o vreme te cheren po rado angla o Del e llene kai sea popura e Zakariaseke,

⁹ Ta gia sar sea sikade e popura, esvirisarde maskar pete ta likisto o Zakarias te del ando santuario katar o cher e Devleko te phabarel o taimano.

¹⁰ Ta kana phabola o taimano, sa e llene molinape avri.

¹¹ Ondaka sikadilo e Zakariaske iek suecho e Devleko, pe porrne, pe rig e chachi katar o than kai phabardola o taimano.

¹² Kana dikhla e suecho, o Zakarias ni llangla so te cherel ta darailo but.

¹³ A o suecho phenda leke: Zakarias, na dara, soke o Del asunda cho molipe, ta chi rromi e Elisabet ka avel la iek minono, ta ka thove leko anav Juan.

¹⁴ Ka ave but veselo, ta but llene ka veselinpe kana ka biandol,

¹⁵ soke cho chaurro ka avel baro angla o Gazda. Ni ka piel mol ni rachia, ta mai anglal te biandol ia ka avel pherdo katar o Santo Duo.

¹⁶ Ka cherel te irinpe kai o Gazda lengo Del but llene katar o Israel.

¹⁷ Gava Juan ka llal angla o Gazda, ta ka avel le o Duo ta e zor katar o profeta o Elias, te sai thovel e daden ande veselia pe chaurrenchar, ta e llene kai ni kanden te sikon te kanden. Gia ka sikavel e llenen te len e Devle.

¹⁸ O Zakarias puchla e suecho: ¿Sar sai llanav chachimaia gava? Soke me sem but phuro ta i mi rromi.

¹⁹ O suecho phenda: Me sem o Gabriel, ta radiu e Devleke. Vou bichalda man te dav tuia orba ta te dav tut gala lache viaste.

²⁰ A akana sar ni pachaian so phendem chuke ka ache nemao ta nasti ka de orba lligo ni ka avel o vreme te cherdon sa gala ezgode.

²¹ A llene sea avri ta aduricharena e Zakariase ta chudinape soke ni likela katar o cher e Devleko.

²² Kana o Zakarias likisto, nasti dela lenchar orba. Ondaka acharde kai dikhlaia vareso ando cher e Devleko ta dela lenchar orba e vastenchar soke achiloia nemao.

²³ Kana nakhle e llivesa kai o Zakarias saia te radil ando cher e Devleko llelotar kai po cher.

²⁴ Mapalal leki rromi e Elisabet achili khamni, ta panch chon ni likisti katar po cher ta mislilape:

²⁵ O Del cherda mange gava akana te na den man ios ando lallao e llene.

Iek suecho phenel kai ka biandol o Jesus

²⁶ Pala e sou chon o Del bichalda e suecho o Gabriel ande iek foro katar e Galilea kai ikhardol Nazaret,

²⁷ kote zivila iek diskinia kai ikhardola Maria. Voi saia mangli te zinilpe pala o Jose kai saia katar e vicha katar o charo o David.

²⁸ O suecho dia kote kai saia voi ta phenda lake: ¡But blagosime san! O Del si tuia.

²⁹ A kana voi dikhla e suecho chudisaili katar leke alava ta puchlape soke dela laia orba gia.

³⁰ Ondaka o suecho phenda lake: Maria na dara, soke maladan dragostia angla o Del.

³¹ Akana ka ache khamni ta ka avel tut iek minono ta ka thove leko anav Jesus.

³² Vou ka avel but pinllardo, ka ikharen le chavo katar o Del e milosoko ta o Del o Gazda, ka cherel le charo, sargo e Davide kai saia katar leki vicha,

³³ te gazdaril ostade po foro katar o Jakob, ta leko gazdaripe ni ka merel nikada.

³⁴ Ondaka e Maria phenda e suechoke: ¿Sar sai avelpe gava, kana me ni sem zinime?

³⁵ O suecho phenda lake: O Santo Duo ka avel upral pe tute ta e zor katar o Del e milosoko ka ucharel tut sargo iek oblako. Goleke o minono kai ka biandol ka avel Santo Chavo e Devleko.

³⁶ Ta i e Elisabet kai si katar chi vicha ka avel la iek minono, isto gia sar si phuri, goia kai phenena latar kai nasti avena la minone, cherel sou chon sar kai si khamni.

³⁷ O Del sai cherel sa.

³⁸ Ondaka e Maria phenda: Me sem sluga e Gazdaki, te cherel manchar o Del isto sar phendan mange. Ta o suecho llelotar kotar.

E Maria llal kai e Elisabet

³⁹ Ande gola llivesa e Maria lleli oma ande iek foro kai achela pe burdura katar e Judea,

⁴⁰ dia ando cher e Zakariaseko ta o Zakarias phenda lake sar san.

⁴¹ Kana e Elisabet asunda lako avazi, o baiato miskosailo ande lako lli, ta voi pherdili katar o Santo Duo.

⁴² Ondaka dia orba zurale, ta phenda: ¡O Del blagosisarda tut mai but neko sa e diskinien, ta blagosisarda che minone!

⁴³ ¿Ko sem me te avel mande e dei katar mo Gazda?

⁴⁴ Samo asundem cho avazi, mo chaurro miskosailo ande mo lli.

⁴⁵ ¡Veselime tu soke pachaian, soke ka cherdol so phenda chuke o Gazda!

⁴⁶ Ondaka e Maria phenda: Mo duo blagosil e Gazda.

⁴⁷ Mo duo veselilpe ando Del kai braduil man.

⁴⁸ Soke o Del dikhla pe mande, leki mai minoni sluga. Ta katar angle, e llene ka phenen mange veseli,

⁴⁹ soke o Del cherda mange bare ezgode ¡leko anav si Santo!

⁵⁰ E Devleko volipe nikada ni merel pala e llene kai blagosin le.

⁵¹ O Del sikavel pi zor: achavel e llenen kai istardon

⁵² fuliarda e zuralen katar lenge estoliche, A e llenen kai ni istardon thoda len upre.

⁵³ Pherda lachipe e llenen kai sea bokhale ta tradia e barvalen ta mukla len chuche vastenge.

⁵⁴ Pomozisarda e foro katar o Israel, kai si leko sluga, ta ni bristrailo te avel leke zalba letar.

⁵⁵ Gia dia po alav amare puranenge, e Abraameke ta golenge kai ka aven leko porodo ostade.

⁵⁶ E Maria achili e Elisabetaia preko trin chon, ta mapalal irisali kai po cher.

Sar biandilo o Juan gua kai kristil

⁵⁷ Kana avilo o vreme te maladol e Elisabetake, avila la iek minono.

⁵⁸ E llene kai zivina pase ta leki familia veselisaile but soke llangle kai o Del saia gia lacho laia.

⁵⁹ Pala e ojto llive, llele te cheren leke e sirkunsision, ta mangena te thoven leko anav sargo leke dadeko, o Zakarias.

⁶⁰ A leki dei phenda: Iok. Vou si te ikhardol Juan.

⁶¹ Von phende lake: Niko ni ikhardol gia ande chi familia.

⁶² Ondaka puchle e vastenchar, e minoneke dade te llanen savo anav mangela te thovel vou.

⁶³ Ondaka o dad e minoneko mangla te pisil leko anav pe iek kotor kas, ta pisisarda: Leko anav si Juan. Ta sa chudisaile.

⁶⁴ Isto ondaka o Zakarias pale dia orba ta blagosila e Devle.

⁶⁵ Sa e llene kai zivina pase chudisaile, ta ande sa e phuv e burdonengi katar e Judea dena goia orba.

⁶⁶ Sa e llene kai asunena, mislinape ta puchenape: ¿Sar ka avel gava minono kana ka avel baro? Soke chachimaia o Del blagosila le.

O Zakarias blagosil e Devle

⁶⁷ O Zakarias, o dad e minoneko, pherdo katar o Santo Duo dia orba sargo iek profeta, ta phenda:

⁶⁸ ¡Blagosime te avel o Gazda, o Del katar o Israel, soke avilo te braduil pe foro!

⁶⁹ Bichalda amenge iek zuralo Braduimari.

⁷⁰ Gua si so phendaia tumenge omanglal kana dia po alav ta phenda pe santone profetananchar:

⁷¹ Kai ka braduil amen katar amare dusmanura ta katar sa gola kai murzin pe amende,

⁷² ta kai ka avel leke zalba katar amaro foro ta kai ni bristarelpe katar po Santo alav kai dia amen.

⁷³ Gia phenda o Del kana dia po alav amare dadeke o Abraam: kai ka mukel amen

⁷⁴ te zivi bi darako, ka tradel amendar amare dusmanonen, te radi leke bi darako,

⁷⁵ te zivi samo leke ta ando chachipe, ta te ava lea sa amaro zivoto.

⁷⁶ A tu, chaurrea, ka ikharen tut profeta katar o Del e milosoko, soke ka lla angla o Gazda ta ka lachare leke droma,

⁷⁷ te sai cherel te llanel leko foro kai lengo bilachipe ka avel prostime, ta kai del len o braduipe.

⁷⁸ Soke pala e zalba kai avila e Devleke, anel amenge upral iek Braduimari sargo kana si o kham katar iek nevo llive,

⁷⁹ te del villelo golen kai zivin ando mai baro truniariko, ta te inllarel amare estope po drom e lachimako.

⁸⁰ Ta o minono bariola ta cherdola zuralo ando Duo, ta zivisarda po pusto llik kai o llive kai sikadilo e llenenge katar o foro katar o Israel.