Levitiko 9 - Biblia ande chib Romani

O Aaron cherel po purvo rado popoko

¹ O ojtoto llive o Moises ikharda e Aarone ta leke chaurren, ta e phuren katar o Israel.

² Ta phenda e Aaroneke: Le iek telcho e kurbanoke pala o bilachipe, ta iek bakro te na avel nasualo te den len kurbano phabardo, ta anen len angla o Del.

³ Ta phen e israelenge te den iek busno kurbano pala o bilachipe, iek telcho ta iek bakro te avel lenge iek burs ta te na aven nasuale, te den len kurbano phabardo.

⁴ Ta iek guruv ta iek bakro te den len kurbano pala e pas angla o Del, ta iek ofrenda katar e septelie cherde e zeitinoia, soke o Del ka sikadol allive tumenge.

⁵ Ta e israelitura inllarde so o Moises phendaia lenge angla e chara kai chidiniaon, ta avile sa e israelitura ta thodepe angla o Del.

⁶ Ondaka o Moises phenda: Gava si so o Del phenda te cheren. Cheren le, ta o Del ka sikavel tumenge po baripe.

⁷ Mapalal phenda o Moises e Aaronoke: Lla pase pasa o altar, ta de cho kurbano pala o bilachipe ta e zivirinia kai ka de phabardi pala cho bilachipe ta pala o bilache e israelengo. Ta de e ofrenda e israelengi pala lengo bilachipe gia sar o Del phenda te cheren.

⁸ O Aaron avilo pase pasa o altar ta mundarta e telcho kai dela pala piro bilachipe.

⁹ Ta e chaurre e Aaronoke ande leke o rat, ta vou makhla po nai ando rat, ta makhla e singa katar o altar. Ta katar o rat kai achila, perada le angla o altar.

¹⁰ Mapalal phabarda upral po altar e khoi, e bubreskura ta khoi katar o buko katar e zivirinia kai diape pala o bilachipe, gia sar o Del phendaia e Moiseseke te cherel.

¹¹ A o mas ta e morchi phabarda len avri katar o pero.

¹² Ta mundarda e zivirinia kai phabardol, ta e chaurre e Aaronoke ande lete o rat ta vou e ratea makhla truial upral katar o altar.

¹³ Mapalal ande lete o soro ta e kotora chinde katar e zivirinia kai delpe phabardi, ta o Aaron phabarda len upral po altar,

¹⁴ mapalal jalada e porra ta e porrne, ta phabarda len upral po kurbano kai delpe phabardo po altar.

¹⁵ Ta i dia e ofrenda pala e israelitura. Lia o busno, kai saia kurbano pala o bilachipe e foroko, ta mundarda le, ta dia le pala o bilachipe isto gia sar cherdaia ogole ofrendaia.

¹⁶ Ta dia o kurbano phabardo ta cherda le prema o zakono.

¹⁷ Mapalal dia e ofrenda katar e simiche, ta pherda po va latar, ta phabarda la upral po altar, kote kai delpe o kurbano phabardo thiarinako rano.

¹⁸ Ta mundarda i e guruve ta e bakre sargo kurbano pala e pas kai saia e foroko, ta e chaurre e Aaroneke ande leke o rat, ta vou makhla truial upre katar o altar.

¹⁹ Ta i ande leke e khoi katar o guruv ta katar o bakro, e pori, e khoi kai ucharel e porra, e bubreskura ta e khoi katar e buke,

²⁰ ta thode e khoi upral po brek, ta vou phabarda len upral po altar.

²¹ A o brek ta e plieska chachi, o Aaron miskosarda len sargo ofrenda kai miskolpe angla o Del, gia sar o Del phenda e Moiseseke te cherel.

²² Mapalal o Aaron vazdia pe va karing e israelitura ta blagosisarda len, ta mapalal kana dia o kurbano pala o bilachipe ta o kurbano phabardo, ta o kurbano pala e pas, llelotar katar o altar.

²³ Mapalal o Moises ta o Aaron die ande chara kai chidiniaon, ta kana likiste blagosisarde e israelen. Ondaka o Del sikadilo bare zuriaia sa e foroke:

²⁴ Ta likista iag katar o Del ta phabarda e zivirinia ta e khoi upral po altar. Ta kana dikhla sa o foro, blagosisarde ta die changa lligo ni dodisarde e phuv pe chikatea.