Levitiko 7 - Biblia ande chib Romani

O zakono katar e kurbanura pala e dos

¹ E kurbanura pala e dos si iek ezgoda but santa. Gala si e zakonura pala e dos:

² E zivirinia kai delpe pala o bilachipe morabi te mundaren la po than kote kai mundardon e zivirinie kai denpe te phabardon, ta lake ratea morabi te makhol truial upre katar o altar.

³ Ta morabi te delpe sa e khoi katar e zivirinia kai si pe pori, ta kai ucharel e porra,

⁴ e dui bubreskura ta e khoi kai si upral pe lende, ta e khoi kai si upral pe leke zea, ta e khoi kai si po buko, morabi te ikanen len.

⁵ Mapalal o popo ka phabarel sa gala ezgode upral po altar, sargo ofrenda phabardi ando liubao e Devleke. Gava si kurbano pala o bilachipe,

⁶ sa e popura sai ka jan letar po than santo, soke gaia ezgoda si but santa.

⁷ O kurbano pala e dos si sargo o kurbano pala o bilachipe, ta o zakono si isto iek e duienge. So ka delpe, ka avel e popoke kai ka radil pe gua kurbano pala o bilachipe.

⁸ Ta isto gia o popo kai mundarel e zivirinia kai vareko anda te del kurbano phabardo. E morchi katar goia zivirinia ka avel e popoke.

⁹ Ta i sa e septelie kai denpe ofrende kai pekon ande furnava, ta sa so chiradola ande kavi ta ande chiai, ka avel e popoke kai radila te del e ofrenda.

¹⁰ Ta isto gia sa e septelie, cherde e zeitinoia, o suke, ka aven sa e chaurrenge katar o Aaron. Ka fulaven len pe suako lleno.

O zakono te na marenpe

¹¹ Isto gia si o zakono katar o kurbano kai del pe pala e pas e Devleke,

¹² a o kurbano kai den fala, ka delpe marne kai ande lende inai levadura cherde e zeitinoia, phalia kai ande lende inai levadura makhle ando zeitino, ta marrne cherde katar e arina lachi cherde e zeitinoia.

¹³ Kana ka den o kurbano pala e pas, ka den i e ofrenda pala e pas ta i e parrne kai ande lende si levadura.

¹⁴ A katar sa e ofrenda iek kotor ka avel vazdini e Devleke, ta ka avel e popoki kai makhla e ratea katar e kurbanura te avel pas.

¹⁵ O mas katar e zivirinia kai die kurbano pala e pas te den fala, morabi te jalpe isto gua llive kai delpe, nasti gurudol ni iek kotor thiarinake.

¹⁶ A te avela kai o kurbano delpe soke die po alav, o te avela iek ofrenda kai den la soke von mangle, morabi te jalpe isto gua llive kai diape, a so achela sai ka jalpe thiarinako.

¹⁷ A pala e trin llive te achela mas katar o kurbano morabi te phabardol sa.

¹⁸ A vareko te jala pala e trin llive katar gua mas kai diape kurbano pala e pas, gua kurbano ni ka blazil leke ta ni ka llindolpe leke kai dia le. Gua mas ka avel pokalime, ta o lleno kai jala gua mas ka inllarel pe pete gua bilachipe.

¹⁹ O mas kai dodila vareso pokalime nasti ka jalpe, morabi te phabardol. Sa e llene kai inai pokalime sai ka jan mas.

²⁰ A o lleno kai si pokalime, te jala o mas katar o kurbano kai delpe pala e pas kai si kurbano e Devleko, gua lleno morabi te traden le katar e phuv.

²¹ O lleno kai dodila varesavi ezgoda pokalime, katar o manus o katar e zivirinia, o varesavi ezgoda pogani, ta mapalal jala katar o mas katar o kurbano kai diape pala e pas kai si e Devleko, ka traden le katar e phuv.

O zakono katar e khoi ta katar o rat

²² O Del dia orba e Moisesea ta phenda leke:

²³ Phen e israelenge gala alava: Te na jan niso katar e khoi e guruveki, o bakreki o busniaki.

²⁴ E khoi katar e zivirinie mule o chinde pe kotora kai mundarde len e zivirinie dive, lenchar sai cherdol aver ezgoda, a na te jan len.

²⁵ Vareko te jala khoi katar e zivirinie kai denpe sargo ofrende phabarde, morabi te traden le katar e phuv.

²⁶ Kaigo te zivina, te na jan katar nisavo rat ni chirikliengo ni katar e zivirinie.

²⁷ O lleno kai jala katar varesavo rat, ka traden le katar e phuv.

So si e popoko

²⁸ O Del dia orba e Moisesea ta phenda leke:

²⁹ Phen e israelenge kai ko anela kai o Del kurbano pala e pas, morabi te anel le angla o Del.

³⁰ Isto pe vastenchar morabi te inllarel le angla o Del e ofrenda phabardi. E khoi kai ucharel o brek ta i o brek te sai miskonle sargo o kurbano kai miskon le angla o Del.

³¹ Ta o popo ka phabarel e khoi po altar, a o brek ka avel e Aaronoke ta leke chaurrenge.

³² E plieska chachi katar e zivirinie kai denpe kurbano pala e pas, ka delpe e popoke kai anda e ofrenda.

³³ Goia plieska chachi si e popoke kai radila kana delpe e khoi ta o rat katar o kurbano pala e pas.

³⁴ Katar e kurbanura kai den man e israelitura pala e pas, o brek kai miskon le ta e plieska kai vazdiniaol sargo ofrenda, kai diem le e popoke o Aaron ta leke chaurrenge. Gava si iek zakono ostade e israelenge.

³⁵ Katar e ofrende kai phabardon ando liubao e Devleke, gala si e kotora kai si e Aaronoke ta leke porodoke, katar o llive kai o Del chinada len te aven leke popura.

³⁶ O Del phenda e israelenge te den len lenge sar kana chinadalen, sargo iek zakono ostade lenge porodoke.

³⁷ Gava si o zakono katar o kurbano kai phabardol, katar e ofrenda, katar o kurbano pala o bilachipe, katar o kurbano pala e dos, katar o chinadipe e poponengo ta katar o kurbano pala e pas.

³⁸ Gala si e zakonura kai o Del dia kai Moises po burdo katar o Sinai, kana po pusto katar o Sinai o Del phendaia e israelenge te den le ofrende.