Levitiko 6 - Biblia ande chib Romani

E kurbanura pala o kojaipe

¹ O Del dia orba e Moisesea ta phenda leke:

² Kana vareko cherela o bilachipe angla o Del ta achela e ezgodenchar kai die lete te guruven len, ta vou phenela kai ni die lete gola ezgode ta chorela ta kanela orbe kojamne pe llene,

³ o kana malavela vareso ta phenela kai ni malada le, o kana jala sovel bange pe varesave katar gala ezgode bilache kai cherel,

⁴ ka avel dosalo pala gua bilachipe. Ta morabi te lacharel e duk kai dia pala pe orbe kojamne kai phenda, ta morabi te iril so chorda o liaia peke pe zor o e ezgode kai diea lete te guruvel, o e ezgode kai maladaia kai sea jasarde,

⁵ o pe varesavi ezgoda kai jala sovel bange, morabi te iril gola ezgode e lleneke kake si gola ezgode, ta ka thovel upral o panllengo katar so liaia kana ka del kurbano pala po bilachipe.

⁶ Ta o kurbano kai ka del e Devle ka avel iek bakro te na avel nasualo, ta tu ka phene so mol, ta vou morabi te anel le katar pi stoka ta te inllarel le kai o popo te avel kurbano pala o bilachipe.

⁷ Ta o popo ka del le kurbano pala le angla o Del, ta gia ka lel o prostipe katar varesavo bilachipe kai cherda.

O zakono katar e kurbanura

⁸ O Del dia orba e Moisesea ta phenda leke:

⁹ Phen e Aaronoke ta leke chaurrenge so morabi te cheren katar o zakono katar e kurbanura: O kurbano morabi te avel upral pe iag phabardi upral po altar sorro riat te sai phabarel le e iag.

¹⁰ O popo ka thovel pe pete e patave katar o lino, ta e sostea katar lino upral pe pi esnaga, mapalal ka chidel o prajo katar e zivirinia kai phabili upral po altar ta ka thovel o prajo pe iek rig katar o altar.

¹¹ Mapalal ka thovel aver patave pe pete ta ka ikanel o prajo avri katar o pero pe iek than jalado.

¹² E iag ka phabol po altar, nikada morabi te na mundaren la. O popo morabi te thovel kasta suako thiarin ta te lacharel upral pe iag e zivirinia kai ka phabardol, ta ka phabarel upral pe lete e khoi katar e kurbanura pala e pas.

¹³ E iag ka phabol suako drom po altar, ta nikada ni ka mundardol.

O zakono katar e ofrende katar e septelie

¹⁴ Gava si o zakono katar e ofrende katar e simiche: E popura ka den la angla o altar, angla o Del.

¹⁵ Iek katar e popura ka pherel po va katar e arina kai die ta i ka lel katar lako zeitino, ta sa o taimano kai si upral pe ofrenda, ta ka phabarel la upral po altar te sai denpe golli ande khan kai si drago e Devleke.

¹⁶ Ta so achela katar e ofrenda ka jan la o Aaron ta leke chaurre, bi te avel ande late levadura pe iek than santo, ande bar katar e chara kai chidiniaon.

¹⁷ Nasti chiraven la ta te thoven ande late levadura. E popura ka jan so achela katar e ofrenda phabardi soke si dine lenge. Gaia ezgoda si but santa, sargo o kurbano pala o bilachipe, ta sargo o kurbano pala e dos.

¹⁸ Sa e murus katar e chaurre e Aaronoke ka jan latar. Gava ka avel iek zakono ostade tumare porodoke katar e ofrende phabarde e Devleke, varesavi ezgoda kai dodila gaia ofrenda ka achel santa.

E ofrenda e poponenge

¹⁹ O Del dia orba e Moisesea ta phenda leke:

²⁰ Gaia si e ofrenda kai o Aaron ta leke chaurre morabi te den e Devle kana ka aven chinade te aven popura e Devleke: Dui kile katar e mai lachi arina sargo e ofrenda katar e simiche. Dopas thiarinako rano ta o gua dopas pasa racha, ta gia suako llive.

²¹ Morabi te lacharen e ofrenda ande iek chiai amime e zeitinoia, ta mapalal ka anel la phagi pe kotora sargo ofrenda kai khandel sukar e Devleke.

²² Gia morabi te lacharel e ofrenda o mai baro popo maskar o porodo e Aaronoko kai si thodo pe leko than. Gaia ofrenda ka avel ostade e Devleke, ta morabi te phabardol sa.

²³ Sa e ofrende e poponenge ka phabardon sa, ta niko nasti ka jal lendar.

O zakono katar e kurbanura pala o bilachipe

²⁴ O Del dia orba e Moisesea ta phenda leke:

²⁵ De orba e Aaronoia ta leke chaurrenchar, ta phen lenge: Gava si o zakono katar e kurbanura pala o bilachipe: E zivirinia kai ka den la kurbano pala o bilachipe morabi te mundaren la angla o Del. Gaia ezgoda si but santa.

²⁶ O popo kai ka anel o kurbano pala o bilachipe, sai ka jal katar gua kurbano ande bar katar e chara kai chidiniaon.

²⁷ Sa so dodila o mas katar o kurbano ka achel santo, a e patave te achen makhle katar o rat, morabi te jaladon po than santo.

²⁸ A e kavi barrastuni kai chiradola o mas katar gua kurbano morabi te phagol, a te chiradela ande iek kavi tucheki, samo morabi te mordol ta te jaladol paiea.

²⁹ Gava kurbano si santo. Samo e popura sai ka jan letar.

³⁰ A nasti ka jalpe ni iek zivirinia kai diape kurbano pala o bilachipe ta kai leko rat inllarde le ande chara kai chidiniaon. Gava kurbano morabi te phabardol ande iag.