Levitiko 3 - Biblia ande chib Romani

E kurbanura katar e pas

¹ Vareko te lela katar pe guruva iek guruvmi o iek guruv te del le kurbano e Devleke te avel len pas, o kurbano kai ka den morabi te na avel nasualo.

² O lleno kai del o kurbano ka thovel po va upral po soro katar e zivirinia kai dia, mapalal ka mundarel la kote katar delpe ande chara kai chidiniaon. A e popura e chaurre e Aaronoke ka makhen e ratea e riga truial katar o altar.

³ Mapalal ka del katar o kurbano te avel pas sargo e ofrenda phabardi e Devle, e khoi kai ucharel e porra katar e zivirinia,

⁴ trubul te ikane e dui bubreskura ta e khoi kai si upral pe lende, ta upral po buko ta ka ikane e bubreskura ta e khoi kai si upral pe purra kai si upral po buko.

⁵ Ta e chaurre e Aaronoke ka phabaren len po altar, upral po kurbano kai si upral pe kasta kai ka avel upral pe iag. Gaia si iek ofrenda phabardi kai khandel sukar e Devleke.

⁶ A vareko te dela iek zivirinia katar pi stoka kurbano e Devle pala e pas, avela bakro o bakri, morabi te na avel nasualo.

⁷ A te dela ofrenda iek bakro ka del le angla o Del.

⁸ Ka thovel po va upral pe leko soro ta mapalal ka mundarel le angla e chara kai chidiniaon. Ta e chaurre e Aaronoke e ratea katar e zivirinia ka makhen e riga upre katar o altar.

⁹ Ta o kurbano kai delpe katar e pas ka del le sargo ofrenda phabardi e Devleke, e khoi, ta sa e pori, e khoi kai ucharel sa e porra,

¹⁰ e dui bubreskura ta e khoi kai si upral pe lende, ta e khoi kai si upral pe leke zea, ta e khoi kai si po buko, morabi te ikanen len.

¹¹ Mapalal o popo ka phabarel sa gala ezgode upral po altar. Gaia si ofrenda jamaki phabardi ando liubao e Devleke.

¹² A te avela busni e ofrenda, ka del la angla o Del.

¹³ Ka thovel po va upral pe lako soro, ta ka mundarel la angla e chara kai chidiniaon, ta e chaurre e Aaronoke ka makhen e ratea e riga upre katar o altar.

¹⁴ Mapalal ka del latar pi ofrenda phabardi e Devleke, sa e khoi kai ucharel e porra,

¹⁵ e dui bubreskura ta e khoi kai si upral pe lende, ta e khoi kai si upral pe leke zea, ta e khoi kai si po buko, morabi te ikanen len.

¹⁶ Mapalal o popo ka phabarel sa gala ezgode upral po altar. Gaia si ofrenda jamaki kai phabardol kai khandel sukar e Devleke, sa e khoi si e Devleke.

¹⁷ Gava si iek zakono ostade ka nakhel kai e dada kai e chaurre kaigo te zivina. Na jan katar ni iek khoi ta ni rat.