Levitiko 27 - Biblia ande chib Romani

Sar pochindon e llene kai si e Devleke

¹ O Del dia orba e Moisesea ta phenda leke:

² Phen e israelenge gala alava: Kana vareko mangel pochinel iekhe llene kai si e Devleko, morabi te pochinel prema e llenen kai si te pochindon.

³ E llene kai si lenge bis burs llikai e sovardes ka pochindon pinda tolaria rupune, prema so pochindol ando santuario.

⁴ A te avela diskinia, ka pochinela tranda tolaria.

⁵ A e murusa kai si lenge panch burs llik kai e bis ka pochindon bis tolaria rupune, ta de des tolaria te si diskinie.

⁶ A e minone kai si lenge iek chon llik kai e panch burs, ka pochindon panch tolaria rupune ta trin tolaria te si diskinie.

⁷ A e llene kai si lenge sovardes burs, o mai but, ka pochindon desupanch tolaria e murusenge te des e diskinienge.

⁸ A o lleno te si but chorro te pochinel gola love, ka inllardol kai o popo te sai vou thovel aver love te pochinel prema so sai pochinel.

⁹ A te avena zivirinie kai denpe e Devleke, gola zivirinie ka aven sante e Devleke.

¹⁰ Nasti ka parrudol pe aver zivirinia i te avela mai lachi o mai bilachi.

¹¹ A te avela goia zivirinia iek zivirinia kai si pokalime kai nasti delpe e Devleke, ondaka goia zivirinia ka inllardol kai o popo,

¹² ta o popo ka phenel pegachin mol le avela lacho o bilacho. Ta so phenela o popo kai mol le gia si sar ka avelpe,

¹³ a o lleno kai anda goia zivirinia te mangela pochinel la morabi te pochinel o isi panllengo mai but prema so mol le.

¹⁴ A vareko te dela po cher e Devleke, o popo si kai ka phenel so mol le prema sar si o cher. Ta so phenela o popo morabi te kanden le.

¹⁵ A o lleno kai dia o cher te mange la pale po cher, morabi te pochinel o panchto isi mai but prema so mol o cher, ondaka o cher ka avel pale leko.

¹⁶ A vareko te dela iek kotor katar pi phuv, goia phuv ka mol la prema so dela septelie. Pe dui stotine litrura simiche sebada ka pochindol pinda tolaria rupune.

¹⁷ A te dela goia phuv katar o burs kai ni radilpe e phuv, ka pochindol prema so molale.

¹⁸ A goia phuv te dela pe mapalal katar o burs kai ni radilpe e phuv, o popo ka phenel pe gachin mol le prema e bursa kai trubul te nakhen te avel pale o burs kai ni radilpe e phuv.

¹⁹ A o lleno kai dia e phuv te mangela pale te lel pi phuv, morabi te del o panchto mai but prema so mol e phuv, ta e phuv ka avel pale leki,

²⁰ A o lleno kai dia e phuv ni pochinela la, ta e phuv bichindola avere lleneke, vou nasti ka chinel le.

²¹ Kana ka avel o vreme kana ande gua burs ni radilpe e phuv ta e phuv ka avel mukliardi, ka avel dino e Devleke sargo phuv santa, ta goia phuv ka avel e poponengi.

²² A vareko te chinela phuv kai ni liala katar pe purane katar pi familia.

²³ O popo ka del orba gole llenea so mol goia phuv lligo ni ka avel o burs katar o mukliardipe kai ni radilpe e phuv, ta gua lleno ka pochinel isto gua llive so mol goia phuv, ta ka del la e Devleke.

²⁴ Ando burs katar o mukliardipe, e phuv ka avel pale ande va katar o lleno kai bichinda le, kai o chachuno gasda katar e phuv.

²⁵ Sa so pochindol ka pochindo prema o tolari kai si katar o santuario kai phariavel desuiek gramura rupune.

²⁶ E purve zivirinie kai biandon, te avela ie telcho o iek bakro, e Devleko si.

²⁷ A te avela katar e zivirinie pokalime, sai ka lel len pale te pochinena so mol le, ta ka thoven upral o panchto isi prema so mol le, a te na pochinena le, sai ka bichindol prema so mol le.

²⁸ Nasti ka bichindol niso katar so diape e Devleke sogo avela i te avena manusa, zivirinie o phuvia kai si ande lenge va, sa so diape ka avel santisimo e Devleke.

²⁹ Ni iek lleno kai si pe iek rig soke si anatema nasti ka pochindol morabi te merel.

³⁰ O diesmo katar so del e phuv, simiche o kasta kai den septelie, si e Devleke ta si dino e leke.

³¹ A vareko te mangela te lel pale vareso katar o diesmo, morabi te del opanchto upral katar so mol le.

³² Ta suako diesmo katar e guruva bakre, sogo nakhela telal katar o kas, o diesmo ka avel dino Devleke.

³³ Ni ka dikhol o e zivirinia si lachi o bilachi, ta ni ka pharruvel le iek pala aver soke o purvi zivirinia ta ogoia kai diape pala ogoia zivirinia ka aven e dui dine e Devleke, ta nasti ka len len pale.

³⁴ Gala si e zakonura kai o Del dia e Moisese e israelenge, po burdo katar o Sinai.