Levitiko 25 - Biblia ande chib Romani

O burs kai ni radin ta o burs katar o mukliardipe

¹ O Del dia orba e Moisesea po burdo Sinai, ta phenda leke:

² Phen e israelenge gala alava: Kana tumen ka den ande phuv kai me ka dav tumen, e phuv morabi te na radil ando liubao e Devleko.

³ Sai ka thoven simiche ande tumare umalia sov burs. Ta ande gola bursa sai ka chine e patra katar che drakha ta ka chide lake septelie,

⁴ a o eftato burs niso ni ka radin e phuv ando liubao e Devleko, na radin e phuv gua burs tumare umalia ta na chinen e patra katar tumare drakha.

⁵ Ta na chinen o lliu kai bariol vou pea kana tumen ia chidien tumare septelie, ta na chiden tumare drakha katar tumaro vostano soke gua burs ni ka radin niso e phuv.

⁶ So dela e phuv voi pea kana ni ka radin la, ka resel te jan tumen, ta i tumare sluge diskinie ta i tumare sluge murus, ta i e llene kai radi tumenge ta kai si katar aver phuvia ta kai zivin maskar tumende,

⁷ Ta chi zivirinia ta e zivirinia divi kai si ande chi phuv ta sa so dela e phuv, ka avel tumenge te jan.

⁸ Ta ka lline efta llive bursenge, morabi te llinen efta droma efta burs, burs gua ka del tumen saranda ta inia burs.

⁹ Ta o llive des katar o chon eftato, kai si ollive katar o prostipe, ka cheren te basaldol sing ande sa e phuv.

¹⁰ O burs pinda ka cheren le santo: ka avel iek burs katar o mukliardipe ta ande gua burs ka phenen kai sa e llene ka aven mukliarde ande sa e phuv. Suako lleno ka irilpe kai pi familia ta ka irin leke leki phuv kai saia leki.

¹¹ O burs pinda ka avel tumenge iek burs katar o mukliardipe, ta ande gua burs ni ka thoven ande phuv e simiche, ta ni ka chinen o lliu kai bariol vou pea, ta ni ka chinen e patra katar e drakha ta ni ka chiden e drakha,

¹² soke si iek burs santo ta katar o mukliardipe tumenge, ka jan samo so dela e phuv voi petar.

¹³ Ande gava burs katar o mukliardipe sa tumen ka len pale tumare phuvia.

¹⁴ Vareko te bichinela o te chinela katar aver lleno varesavi bar, te na kojavel gole llene.

¹⁵ Ko chinela morabi te pochinel prema o vreme kai nakhla katar o burs katar o mukliardipe, ta ko bichinela morabi te mangel prema e bursa kai achen te chiden e septelie katar goia phuv:

¹⁶ Te achen mai but bursa te chiden e septelie mai but ka mol le, a te achena cherricha bursa ka mol le mai eftino, soke so bichindol si e bursa kai si te chiden e septelie.

¹⁷ Niko te na kojavel avere llene. Sikaven kai si tumen liubao tumare Devleke, Me sem o Jeova tumaro Del.

¹⁸ Kanden me zakonura, kanden me alava. Kanden len ta ka zivin esmiro ande phuv,

¹⁹ e phuv ka del septelie lligo ni ka achen chalie.

²⁰ A sai avelpe kai isto tumen sai puchen tumen: ¿A so ka ja ando eftato burs, te na thovaia simiche ande phuv ta te nasti chidaia e septelie?

²¹ Goleke me ka blagosiv tumen o sovto burs, ta so ka chiden ka resel tumenge trine bursenge,

²² Gia ka jan katar e septelie kai guruden so tumen thoven pale e simiche ande phuv u burs ojtongo, llik kai o burs iniango sai ka jan katar e septelie kai guruden, lligo ni avel o vreme kana chiden pe e septelie.

²³ E phuv ni ka bichindol ostade, soke e phuv si murni, a tumen sen sargo llene kai inai katar sargo llene kai aven katar aver phuvia gua si so sen mange.

²⁴ Goleke, varesavi phuv kai si ande tumare va, morabi te den e llenen kai mai anglal e phuv saia lengi o liubao te chinen pale pi phuv.

²⁵ Kana iek israelita chorraola ta bichinela varesavi katar pi phuv, ondaka o lleno kai si mai leki familia sai avel te del e love ta te lel pale goia phuv kai bichinda leko familiar.

²⁶ A vareko te na avela le iek familiar te pochinel leki phuv, ta isto vou te chidela ta te resela te pochinel isto vou pi phuv,

²⁷ ka llinel o vreme sar kai bichinda e phuv, ta ka iril e lleneke e love prema o vreme kai nakhla ta leki phuv ka nakhel pale ande leke va.

²⁸ A te na resela te chidel so trubul le te lel pi phuv goia phuv ka achel ande va gole lleneki kai chinda la lligo ni avela o burs katar o mukliardipe ta ande gua burs e phuv ka achel mukliardi, ta o lleno kai bichinda la pale ka achel ande leke va.

²⁹ A vareko te bichinela iek cher ande iek foro kai si zidura truial, vou sai ka chinen la pale mai anglal te nakhel o burs kai bichinda la.

³⁰ A te avelape kai ande gua burs o lleno kai bichinda la ni chinela la, ka achel ostade gole lleneke kai chinda la ta leke porodoke. Ando burs katar o mukliardipe nasti ka irin la.

³¹ A e chera kai si ande forura kai inai len zidura ka aven sargo e phuvia kai si ande umalia: sai ka aven mukliarde ande burs katar o mukliardipe.

³² A e levitura sai ka chinen pale pe chera kai si ande lenge forura.

³³ A vareko te chinela katar iek levita, morabi te likel latar ando burs katar o mukliardipe ta te llaltar ando foro kote kai le si le phuv, soke sa so si len e levitura maskar e israelitura si e chera kai si len ande forura.

³⁴ A e phuvia kai si len te jan e zivirinie ande forura ni ka bichindon soke si ostade lenge.

³⁵ A kana varesavo israelita chorraola ta llala tute, tu morabi te pomozi le sargo kana avela katar aver phuvia ta ka thovele ande cho cher te zivil tuia.

³⁶ Ni ka le letar intarese pe love kai ka de le, ta ka avel chuke dar katar cho Del ta gua israelita ka thove le te zivil ande cho cher.

³⁷ E love kai ka de lete ni ka le letar interes, ta na phen kai mol le mai but o jape kai dele.

³⁸ Me sem o Del tumaro Gazda, kai ikandem tumen katar e phuv katar o Ejipto, te sai dav tumen e phuv katar o Kanaan, te avav tumaro Del.

³⁹ A iek katar e israelita te chorraola kana si tuia, ta bichinela pe chuke, na cherle te radin sargo iek sluga,

⁴⁰ Dikhle sargo iek lleno kai radil o sargo iek gosto. Ka radil chuke lligo ni ka avel o burs katar o mukliardipe,

⁴¹ ondaka ka achel mukliardo te llaltar katar cho cher pe chaurrenchar, ta sai ka irilpe kai po porodo ta e phuv katar pi familia ka irin la leke.

⁴² Soke von si me sluge kai ikandem len katar o Ejipto ta nasti aven bichinde sargo esklavura,

⁴³ Ni ka de orba lenchar silnomaia, so ka chere si te avel chuke dar katar cho Del.

⁴⁴ Te mangea te avel tut esklavura o esklave, chin len katar ogola phuvia kai si truial tutar.

⁴⁵ Ta i sai ka chine e chaurren katar e llene kai aven katar aver phuvia kai zivin maskar tumende, ta katar e familie lenge kai biandile ande tumari phuv, len sai chinen len te aven tumare.

⁴⁶ Ta sai ka muken len tumare chaurrenge kana tumen ka meren, ta ostade ka aven tumare esklavura. A niko tumendar katar e israelitura nasti ka aven gazda tumare phlalenge kai si israelitura.

⁴⁷ A lleno kai avel katar aver phuv kai zivil tuia barvaola, a iek lleno kai si israelita chorraola, kai zivil pasa o lleno kai avel katar aver phuv, ta bichindola gole llene o avere llene kai avel katar aver phuv,

⁴⁸ I te avela bichindo sai ka chinen leko mukliardipe. Sai ka cherel le iek katar leke phlal,

⁴⁹ o leko kako, o leko pharnavo o vareko te avela leki familia, ta isto vou sai pochinel po mukliardipe de si le e love,

⁵⁰ sai llinel gole llenea katar bichindilo llik kai o burs katar o mukliardipe. So ka pochinel ka avel prema e bursa, ta o vreme kai radisarda prema so pochindol e llenenge kai radin.

⁵¹ Te achena but bursa angle, prema gola bursa ka pochinel ta ka iril prema e love kai bichindilo.

⁵² A te achela cherricha vreme te avel o llive katar o mukliardipe, ka pochinel prema gola bursa.

⁵³ Tumen morabi te na muken gua kai chinda le te gasdaril pe lete zilnomaia.

⁵⁴ A gua kai bichindinailo te na pochinen le ande gua vreme te mukliaren le ka avel mukiardo, ando burs katar o mukiardipe ka avel vou mukliardo ta leke chaurre.

⁵⁵ Soke e israelitura si me sluge, murne sluga, me ikandem len katar o Ejipto. Me sem o Del tumaro Gazda.