Levitiko 24 - Biblia ande chib Romani

O zeitino e lamparenge

¹ O Del dia orba e Moisesea ta phenda leke:

² Phen e israelenge te anen chuke zeitino lacho katar e maslinke, te sai aven phabarde e lampare ta gia nikada te na mundardon.

³ O Aaron ka lacharel len, te sai aven phabarde sorro riat angla o Del ande chara kai chidiniaon, avri katar e kortina kai si pasa e arka katar e alava. Gava si iek zakono ostade tumare porodoke.

⁴ Morabi te lacharel e lampare ando kandelero desneto sunakuno te sai phabon angla o Del.

O marrno katar e proposision

⁵ Le katar e mai lachi arina ta pek desudui marrne, te phariaven star kile ta dopas suako iek,

⁶ ta thov len upral me mesa kai si desneto sunakuni kai si angla o Del, thode pe dui fisie de sov marrne suako iek.

⁷ Thov pe suako fisia taimano gua ka avel e marrnenge sargo meriso, ofrenda phabardi e Devleke.

⁸ Gava morabi de thodol suako drom angla o Del suako sabado, sargo alava ostade ando anav katar e israelitura.

⁹ Ta ka avel e Aaronoke ta leke chaurrenge, kai von ka jan le pe rig santa, soke leke si but sante katar e ofrende phabarde e Devleke, lenge ka avel gaia ofrenda ostade.

E duk e llenenge kai kusen e Devle

¹⁰ Ande gua vreme saia maskar e israelitura iek lleno kai leki dei saia israelita a leko dad saia ejipsio. Leki dei ikhardola Selomit, ta saia chorri katar o Dibri, katar e vicha katar o Dan. Gava lleno ta iek israelita jalepe ando pero,

¹¹ Ta o chaurro katar e diskinia israelita kusla ta dia armaia e Devle, ondaka inllarde le kai o Moises,

¹² Ta thodele ande rubie, lligo ni o Del ni phenela lenge so te cheren.

¹³ Ta o Del dia orba e Moisesea ta phenda leke:

¹⁴ Kan gole llene kai dia armaia, ta te thoven pe va pe leko soro sa e llene kai asunde le, ta te mundaren le e barrenchar sa o foro.

¹⁵ Ta mapalal de orba e israelenge ta phen lenge: Kai ko kusela ta dela armaia pe Devle, ka inllarel po bilachipe,

¹⁶ ta ka avel mundardo e barrenchar sa e forotar. I te avela katar aver phuv o te avela katar e phuv, te kusela e devle ka chindol pe leke te merel.

¹⁷ Ko mundare avere llene, ka chindol pe leke te merel.

¹⁸ Ko mundarela iek zivirinia morabi te del aver zivirinia, zivirinia pe zivirinia.

¹⁹ A ko dukhavela vareka katar po foro isto goia duk morabi te jal vou:

²⁰ phagipe po phagipe, iak pe iak, dan po dan, morabi te dukhadol isto pe masea e duk kai dia.

²¹ Kor mundarela iek zivirinia morabi te del aver zivirinia. Ko mundarela iekhe llene, kai chinen leke te merel.

²² Isto gava zakono si e llenenge kai aven katar aver phuv ta i e llenenge katar e phuv. Me sem o Jeova Del tumaro Del.

²³ Ondaka o Moises dia orba e israelenge, ta von ikande katar o pero gole llene kai diaia armaia e Devle, ta kote mundarde le e barrenchar. Ta e israelitura cherde le gia sar o Del phendaia e Moiseseke te cheren le.