Levitiko 23 - Biblia ande chib Romani

Slave Devlikane

¹ O Del dia orba e Moisesea ta phenda leke:

² Phen e israelenge gala alava: Gala si e slave Devlikane, ta ka phenen saurrenge kai ka ikhardo o chidipe santo.

³ Ka radi sov llive, a o eftato llive ni ka cheren ni iek rado, ua llive ka avel iek llive but sukar te na radin ta ka avel iek chidinipe santo. Kaigo te zivia, gua llive ka avel iek lleve te na radi ando liubao e Devleke.

⁴ Gala si e slave e Devleke kai ka chidiniaon, o chidinipe santo, kai ka ikharen ande lengo vreme:

⁵ Ando llive desustar katar o chon purvo ande dui pasaracha, ka slavin e paskua ando liubao e Devleko.

⁶ Ando llive desustar isto katar gua chon ka cheren e slava katar e marrne kai ande lende inai levadura ando liubao e Devleko. Efta llive ka jan marrno kai ande lete inai levadura.

⁷ O purvo llive ka avel iek santo chidinipe. Gua llive te na cheren ni iek rado pharo.

⁸ Efta llive tumen ka den ofrenda phabardi e Devleke, ta o eftato llive ka avel iek santo chidinipe ta ande gua llive ni ka cheren ni iek rado.

E slava kana chidiniaon e purve septelie

⁹ O Del dia orba e Moisesea ta phenda leke:

¹⁰ Phen gala alava e israelenge: Kana tumen ka den ande phuv kai me ka dav tumen, ta kana ka chiden o tumaro lliu, o purvi guzma kai ka chiden morabi te inllaren la kai o popo.

¹¹ Kana ka nakhel o llive eftato kai ni radilpe, o popo ka miskol o lliu angla o Del te sai tumen aven blagosime.

¹² Ta isto gua llive kai ka sikavel o lliu, ka sikavel iek bakre iekhe burseke, te na avel nasualo, sargo ofrenda phabardi ando liubao e Devleke.

¹³ Ta i ka anel star kile ta dopas katar e mai lachi arina cherdi e zeitinoia, ofrenda phabardi kai khandel sukar e Devleke. Ta e ofrenda kai chordol, iek litro mol.

¹⁴ Lligo ni ka avel o llive kai tumen ka anen tumari ofrenda e Devleke, nasti ka jan marrno, ni lliu peko o ialo. Gava si iek zakono ostade sa tumare bursenge kaigo tumen zivina.

¹⁵ Katar o llive kai inllarden o lliu sargo e ofrenda kai miskon la, morabi te llinen efta llive efta katar purvo llive kana ka nakhel o llive kai ni radin.

¹⁶ Ka llinen pinda llivesa, llik kai o llive kai ka nakhel katar o eftato llive kai ni radin, ondaka ka den ofrenda e Devle e neve kuchina lliu,

¹⁷ ta ka inllaren katar tumare chera dui marrne katar e mai lachi arina chirade kai pe lende si levadura, stare kilenge suako iek, sargo ofrenda sukar katar e purve septelie e Devleke.

¹⁸ E marrnenchar ka inllaren efta bakre iekhe bursenge te na aven nasuale, iek telcho ta dui busne ka aven phabarde ando liubao e Devleke, sargo ofrenda phabardi kai khandel sukar e Devleke, ta i tumari ofrenda katar e kuchina lliu ta e mol.

¹⁹ Ta i ka den iek busno kurbano pala o bilachipe, ta dui bakre kurbano pala e pas.

²⁰ O popo ka sikavel len sargo ofrenda kai miskon la angla o Del, e marrnea kai si katar e purve ta e dui bakre ka avel iek ofrenda santa e Devleke, ta kai si e popoke.

²¹ Isto gua llive morabi te cheren iek chidinipe santo, ta te na cheren ni iek rado pharo. Gava si iek zakono ostade tumenge ta tu mare porodoke kaigo zivina.

²² Kana ka avel o vreme de chide che septelie ni ka rode de chide pe suako rig o lliu katar chi umal ta na rode e kuchina lliu kai achile, muk len e chorrenge ta e llenenge kai aven katar aver phuvia. Me sem o Del tumaro Gazda.

E slava katar e tuturuge

²³ O Del dia orba e Moisesea ta phenda leke:

²⁴ Phen e israelenge gala alava: O llive purvo katar o chon eftato ka avel tumen iel llive te na radin, iek slava kana ka basen e tuturuge ta iek santo chidinipe

²⁵ Ande gua llive ni ka cheren ni iek rado kai cheren e sluge, ta ande mo liubao ka den iek ofrenda phabardi.

O llive e prostimako

²⁶ O Del dia orba e Moisesea ta phenda leke:

²⁷ Ando llive des isto katar gua chon eftato ka avel o llive katar o prostipe. Morabi te cheren iek chidinipe santo, ta gua llive ka thoven tumen te allunin, ta te phabaren iek ofrenda ando liubao e Devleke.

²⁸ Te na cheren ni iek rado ande gua llive, soke si o llive katar o prostipe, kai tumen ka len o prostipe angla o Del tumaro Gazda.

²⁹ A ko ni thovelape ande gua llive te cherel o alluno, kogo te avela, ka avel tradino katar tumari phuv.

³⁰ A vareko te radila ande gua llive kogo te avela, me gole llene ka zatriv le.

³¹ Ni iek rado ni ka cheren. Gava si iek zakono ostade tumenge ta tumare porodoke kaigo te zivina.

³² Gava llive ka avel tumenge iek llive te na radin ta te thoven tumen te allunin, ka llinen le katar perel e riat, katar o llive inia katar o chon lligo ni ka perel o kham thiarinako.

E slava katar e cherorra patrenge

³³ O Del dia orba e Moisesea ta phenda leke:

³⁴ Phen e israelenge gala alava: O llive desupanch isto katar gua chon eftato, ta ande e efta llive, ka cheren e slava katar e chariche patrenge ando liubao e Devleko,

³⁵ O purvo llive ka avel iek chidinipe santo. Ande gua llive te na cheren ni iek rado.

³⁶ Ande gola llive ka den ofrende phabarde e Devle, ta o llive iniango ka cheren iek chidinipe santo gaia si iek slava, te na cheren ni iek rado.

³⁷ Gala si e slave sante e Devleke, kai tumen morabi te chere iek chidinipe santo ta kote ka den ofrende phabarde, kurbanura, ofrende katar e septelie ofrenda moliaki prema o llivesa kai si te den,

³⁸ Ta i katar e llivesa kai tumen ni radi pala o liubao e Devleko ta katar so tumen den ta e ofrende kai dien tumaro alav ka den ta i so likista tumendar te den.

³⁹ Ando llive desupanch katar o chon eftato, kana tumen chidien e septelie ka cheren iek slava efta llive ando liubao e Devleke, o purvo llive ni ka radin ta o iniango.

⁴⁰ O purvo llive ka len e krangura kai pe lende si septelie katar e mai lache kasta, krangura katar e palmera ta katar e kasta vosake ta katar e sause kai barion pasa e paia, ta efta llive ka veselin tumen angla o Del tumaro Gazda.

⁴¹ Suako burs ando chon eftato, ka cheren iek slava efta llive ando liubao e Devleko. Gava si iek zakono ostade tumenge ta tumare porodoke.

⁴² Ande gala efta llive sa tumen e israelitura ka zivin ande chare cherde e patrendar,

⁴³ te sai llanel tumaro porodo kai kana ikandem katar Ejipto e israelitonen, cherdem len te zivin ande chare cherde e patrenchar. Me sem o Del tumaro Gazda.

⁴⁴ Gia o Moises dia orba e israelenchar katar e slave sante a Devleke.