Levitiko 21 - Biblia ande chib Romani

E santidad e poponengi

¹ O Del phenda e Moiseseke: De orba e poponenchar chaurre e Aaronoke, ta phen lenge te achen pokalime cheres iek mulo katar lengo foro.

² Ni ka achen pokalime te avela iek familia kai si pase, sargo leki dei o leko dad, o leko chaurro o leko phlal,

³ a pala pi phiorri kai si chei, kai zivisarda lea kai ni zinisaili palala sai achel pokalime.

⁴ A ni ka achel pokalime sargo varesavo lleno katar o foro.

⁵ Nasti ka jaliaven po soro, ta nasti ka rranden pe chor, ta nasti ka cheren peke rrane pe pe esnage.

⁶ Soke sante ka aven pe Devleke, ta ni ka muken ando lallao o anav pe Devleko, soke e ofrende phabarde e Devleke ta o marrno e Devleko von sikaven len goleke von morabi te achen sante.

⁷ Ta nasti ka zininpe iekhe kurvichkaia, ni diskiniaia kai si mukli ta ni iekhe diskiniaia kai asundile bune pe late, soke o popo so santo si pe Devleke.

⁸ Tumen morabi te cheren von te achen sante soke von sikaven o marrno che Devleko, von ka aven sante chuke, soke me o Del sem santo ta me sem kai cherav len sante.

⁹ A e chorri katar iek popo te thovela pe ando lallao ta te cherdola iek kurvichka, golea thovel ando lallao pe dade ta morabi te avel phabardi llundi.

¹⁰ O mai baro popo lia sa e zor te thovel pe pete e patave sante, cheres o zeitino kai santifikil kai thode pe leko soro. Goleke morabi te na mukel pe bal mukliarde te na rranden pe patave te dikhol kai si zalosno,

¹¹ ta ni ka del kote kai si iek lleno mulo, ni pala po dad ni pala pi dei ni ka achel pokalime.

¹² Ta ni ka likel katar o santuario, ta ni ka mukel ando lallao o santuario pe Devleko, soke pe lete thode o zeitino santo kai si e Devleko. Me sem o Del.

¹³ Kana ka zinilpe morabi te lel pala pe iekhe diskinia te avel chei.

¹⁴ Ta nasti ka zinilpe iekhe diskiniaia kai si phivli o mukli o te asundile bune pe late ni iekhe kurvichka, leki rromi morabi te avel chei ta te avel katar leko foro,

¹⁵ te na mukel ando lallao pe porodo maskar pe llene, Soke, me sem o Del kai santifikiu le.

Save ezgode ni muken iekhe llene te avel popo

¹⁶ O Del dia orba e Moisesea ta phenda leke:

¹⁷ Phen e Aaronoke kai katar angle niko katar leko porodo kai si len varesavo nasualipe pe lengi esnaga nasti ka sikavel e ofrenda katar o parrno pe Devleko.

¹⁸ O chachipe niko kai si le varesavo nasualipe pe pi esnaga nasti ka avel pase te sikavel: O lleno korro, bango, o chindo vareso katar leki esnaga,

¹⁹ O te avela phago leko porrno o leko va,

²⁰ o te avela kurkuncho, o te na barilo, o te avela oblako ande leke akha, o te avela pe lete e ller o kai si leke pele chaladine.

²¹ Ni iek lleno kai si katar o porodo e Aaronoko o popo de avela leki esnaga nasuali nasti ka avel pase te sikavel e ofrende kai phabardon, soke si le iek nasualipe pe leki esnaga nasti ka sikavel e ofrenda katar o marrno pe Devleko.

²² Sai ka jal katar gua marrno ta katar e ezgode sante ta e santisime,

²³ a nasti ka del palal katar e kortina ta nasti ka avel pasa o altar, soke si nasualo, te na del ando lallao mo santuario, soke me sem o Del kai santifikiu tumen.

²⁴ Ta o Moises phenda sa gala alava e Aaronoke ta leke chaurrenge ta sa e israelenge.