Levitiko 2 - Biblia ande chib Romani

E ofrende

¹ Kana vareko anela ofrenda e Devleke, morabi te anel arina katar e mai lachi, ta pe late ka thovel zeitino ta taimano,

² mapalal ka inllarel la kai e chaurre e Aaronoke, ta iek lendar iekhe vastea ka istarel so sai katar e arina e zeitinoia ta e taimanoa, ta ka phabarel len upral po altar sargo so si dino phabardo te sai denpe golli, gaia si iek ofrenda phabardi kai khandel sukar e Devleke.

³ Ta so achela katar e ofrenda ka avel e Aaronoke ta leke chaurrenge, gaia ofrenda si but santa katar e ofrende kai phabardon e Devleke.

⁴ Kana ka de iek ofrenda marrnengi cherde ande furnava, ka aven cherde katar e arina mai lachi ta cherde zeitinoia, ta ande lende morabi te na avel levadura, ta phalia kai ande lende inai levadura makhle ando zeitino.

⁵ A chi ofrenda te aven simiche chirade ande chiai, mora bi te avel e mai lachi arina cherdi e zeitinoia, ta ande late te na avel levadura,

⁶ ka phagela pe kotora ta ka thove zeitino upral soke si ofrenda kai si simiche.

⁷ Chi ofrenda te avela simiche chirade ande kavi, ka cherdon katar e arina lachi ta zeitinoia.

⁸ Kana ka avel lachardi gaia ofrenda gale ezgodenchar, ka anela angla o Del ta ka dela kai o popo, ta vou ka inllarel la kai o altar.

⁹ Kote ka lel cherricha katar e ofrenda te phabarel la po altar sargo e ofrenda phabardi te denpe golli, gaia si iek ofrenda kai kandel sukar e Devleke.

¹⁰ Ta so achela katar e ofrenda ka avel e Aaronoke ta leke chaurrenge, soke si but santa katar e ofrende kai phabardon e Devleke.

¹¹ Te na thoven levadura pe ni iek ofrenda katar e simiche kai den e Devle, soke ni levadura ni aullin nasti den phabardi sargo ofrenda e Devleke.

¹² Sai ka den e levadura ta o aullin e Devle sargo ofrenda katar e purve septelie, a na po altar sargo khan sukar.

¹³ Sa e ofrende katar e simiche morabi te thove pe lende lon. Pe sa che ofrende katar e simiche morabi te avel lon katar e alava katar cho Del. Pe sa che ofrende morabi te thove lon.

¹⁴ Ta te dea e Devle iek ofrenda katar e simiche katar che purve septelie, morabi te avel katar che grangura resle. Ta e kuchina resle, ka peke len unzarde pe iag.

¹⁵ Ta ka thove upral pe lende zeitino ta taimano, soke si ofrenda.

¹⁶ Mapalal o popo ka phabarel cherricha kuchina unzarde ta zeitino e taimanoa, ta ka avel iek ofrenda te denpe golli, soke si iek ofrenda phabardi e Devleke.