Levitiko 19 - Biblia ande chib Romani

O zakono katar e santidad ta o chachipe

¹ O Del dia orba e Moisesea ta phenda leke:

² Phen e israelenge gala alava: Te aven tumen sante, soke me, o Del tumaro Gazda, sem santo.

³ Suako lleno tumendar morabi te del liubao pe dade ta pe da. Ta me sabadura den len liubao. Me o Jeova tumaro Del.

⁴ Na llan kai e dela, ta na cheren tumenge dela katar o sastri biladino. Me sen o Del tumaro Gazda.

⁵ Kana ka den kurbanura pala e pas e Devle, cheren le sukar te sai o Del lel len tumendar.

⁶ E zivirinia kai dien kurbano, morabi te jalpe isto gua llive, ta i sai jalpe thiarinako, a so achela pala e trin llive morabi te phabardol.

⁷ A te jalape o trito llive, ka avel iek ezgoda but bilachi ta o Del ni ka lel gua kurbano.

⁸ A ko jala le ka inllarel po bilachipe ta ka avel tradino katar tumari phuv katar gava bilachipe kai cherda e ezgodenchar kai si sante e Devleke.

⁹ Kana ka avel o vreme te chide katar so del e phuv, na chide sa pe suako rig katar e phuv, ta na rode e kuchina kai achile.

¹⁰ Ta ni ka chide sa katar cho vostano, ta ni ka chide e drakha kai pheren, ka mukelen e churrenge ta e llenenge kai aven katar aver phuvia. Me o Del tumaro.

¹¹ Na choren, ta na kojaven iek avere.

¹² Na ja sovel bange pe ma gia te na thove e Devleko anav ando lallao. Me sem o Del.

¹³ Te na ave silno e llenenchar ta na achav tute llik thiara e love kai pochindol e lleneke kai radil.

¹⁴ Na de armaia e kasuke. Na thov niso po drom e korreko. Morabi te de liubao e Devle. Me sem o Del.

¹⁵ Kana ka chine kris na chin la kojaimaia, ni e chorreke ni e barvaleke. Kana ka chine kris, chin la chachimaia.

¹⁶ Na inllar bune maskar cho foro. Ni ka thove tut te mundare vareka. Me sem o Del.

¹⁷ Na guruv e murzania ande cho lio pe cho phlal. De pe llene kana si te de pe lende. Na thov tut ande iek than ande lengo bilachipe.

¹⁸ Na ikan chi duk pe llene ta na cher o bilachipe isto che foroke. Volisar e llenen sargo isto tu tut. Me sem o Del.

¹⁹ Kande me zakonura. Na amisar che guruven avere zivirinienchar katar aver viche. Na thov ande chi phuv katar suako simiche amime. Na thov pe tute ni iek patave cherde bute tavenchar amime.

²⁰ A vareko te amilape iekhe diskiniaia kai si sluga ta kai si dini avere lleneke, ta kai ni ios ni pochinde la ta kai ni ios ni mukliarde la, e dui ka aven mardine e bichoia a ni ka aven mundarde, soke voi inai mukliardi.

²¹ Ta gua lleno morabi te anel iek bakro kurbano pala o bilachipe, ta morabi te inllarel le kote katar delpe ande chara kai chidiniaon.

²² Gale bakrea katar o kurbano pala o bilachipe, o popo ka mangel e Devletar te prostil o bilachipe gole lleneko, ta o bilachipe kai cherda ka avel prostime leke.

²³ Kana tumen ka den ande phuv ta ka bariaren kasta kai den septelie, nasti ka chinen ta nasti ka jan katar gola septelie trin burs.

²⁴ A pala e star burs sa e septelie ka aven chinade llilabimaia e Devleke.

²⁵ A pala e panch burs kote tumen sai ka jan e septelie. Gia e kasta ka del tumen mai but. Me sem o Del tumaro Gazda.

²⁶ Te na jan niso kai si le rat. Te na cheren chirimate ta te na phenen kai tumen llanen so ka avelpe mai angle.

²⁷ Na muken iek jalipe sargo kolo pe tumaaro soro ta na chinen tele tumare chor.

²⁸ Na chinen tumaro mas pala iek mulo, ta na cheren ni iek rrane pe tumare esnage. Me sem o Del.

²⁹ Na de ando lallao che chorra te cherela iek kurvichka. Gia te na murilpe e phuv ta te na pherdol bilachipe.

³⁰ Me llivesa kai si sabadura, te guruven len, ta mo santuario den le liubao. Me sen o Del.

³¹ Na llan kai e llene kai cheren chirimate ta kai e llene kai phenen so si te avelpe mai angle te na achen pokalime. Me sem o Del tumaro Gazda.

³² Angla e llene phure ka thove tut pe porrne te de len liubao. Sikav kai de liubao che Devleke. Me sem o Del.

³³ Na dukhav e llenen kai aven katar aver phuvia ta kai zivin maskar tumende.

³⁴ Dikhen len sargo iek tumendar, ta ka voli len sargo isto tu tut. Soke i tumen sena katar aver phuvia ando Ejipto. Me sem o Del tumaro Gazda.

³⁵ Na kojav pe kris. Na kojav kana ka dikhe pe gachin pole si le iek bar o kana ka dikhe so phariavel vareso.

³⁶ Phariav chachimaia. Llin e pole chachimaia. Me o Del tumaro Gazda.

³⁷ Goleke kanden me zakonura ta me alava. Me sem o Del.