Levitiko 18 - Biblia ande chib Romani

Te na cheren kurvaluko

¹ O Del dia orba e Moisesea ta phenda leke:

² Phen e israelenge gala alava: Me sem o Jeova tumaro Del.

³ Na cheren sargo e ejipsiura ande phuv kai zivisarden, ta na cheren sargo e llene ando Kanaan, e phuv kai ka inllarav tumen, ta na zivin prema lenge zakonura.

⁴ Kanden me zakonura ta zivin prema lende. Me sem o Del tumaro Gazda.

⁵ Goleke kanden me zakonura, ta me alava ta ko kandela len, ka zivil prema lende. Me sem o Del.

⁶ Ni iek lleno te na amilpe iekhe diskiniaia kai si but leki familia. Me sem o Del.

⁷ O nangipe che dadeko ta che dako ni ka pinllare. Chi dei si, ni ka dikhe lako nangipe.

⁸ O nangipe katar e rromi che dadeki ni ka pinllare, soke si o nangipe che dadeko.

⁹ O nangipe che phiorrako, chorri che dadeki o chorri che daki, biandi ando cher o avri katar o cher, lako nangipe ni ka pinllare.

¹⁰ O nangipe katar e chorri che chaurreki, o e chorri che chorraki, lako nangipe ni ka pinllare, soke si o nangipe chiro.

¹¹ O nangipe katar e chorri katar e rromi che dadeki, kai si chi phiorri dadetar, lako nangipe ni ka pinllare.

¹² O nangipe katar e phiorri che dadeki, ni ka pinllare lako nangipe, soke si leki phiorri.

¹³ O nangipe katar e phiorri che daki ni ka pinllare lako nangipe, soke si e phei che daki.

¹⁴ O nangipe katar o phlal che dadeko ni ka pinllare, ni ka ami tut leke rromiaia, soke si e rromi katar che dadeko phlal.

¹⁵ O nangipe che boriako ni ka pinllare, soke si e rromi che chaurreki, ni ka pinllare lako nangipe.

¹⁶ O nangipe katar e rromi che phlaleki ni ka pinllare, soke si o nangipe che phlaleko.

¹⁷ O nangipe katar leki rromi ta katar leki chorri, ni ka pinllare lengo nangipe. Ni ka le e chorra katar leki chorri, ni e chorra katar laki chorri, te na pinllare lako nangipe soke sen but familia, soke te chere gua si bilachipe.

¹⁸ Na le rromi e diskinia kai si phiorri che rromiaki so avela llundi chi rromi te na marenpe maskar pete.

¹⁹ Te na ami tut iekhe diskiniaia kana voi si ande po chon kai nasuaol.

²⁰ Te na ami tut e diskiniaia kai si avere lleneki, te na ache pokalime.

²¹ Te na de ni iek katar che chaurre ofrenda te phabaren le e deleke kai ikhardol Molok. Gia te na muke ando lallao o anav che Devleko me o Jeova.

²² Ni ka ami tut iekhe murusea sargo iekhe diskiniaia. Gava si iek baro gado.

²³ Te na ami tut ni iekhe ziviriniaia, te na ache pokalime cheres gava. Ta ni e diskinia te na amilpe ni iekhe ziviriniaia. Gava si iek baro bilachipe.

²⁴ Te na a chen tumen pokalime gale ezgodenchar, soke gale ezgodenchar cherdile pokalime e forura kai me ka chudav len angla tumende,

²⁵ ta i lengi phuv achili pokalime, a me chindem kris pe lende cheres lengo bilachipe ta e phuv chudia petar e llenen kai zivina kote.

²⁶ Goleke tumen e israelitura ta e llene kai aven katar aver phuv ta kai zivin maskar tumende, kanden me zakonura, ta na cheren ni iek katar gava baro bilachipe,

²⁷ soke gala familie kai cherde gava baro bilachipe, von kai zivisarde mai anglal neko tumen ande gaia phuv, pala lengo bilachipe e phuv achili pokalime.

²⁸ ¡Te na avelpe kai e phuv ka chudel tumen soke cherden la te avel pokalime, gia sar chudia e llenen kai sea mai anglal neko tumen!

²⁹ Ko cherela gava baro bilachipe, morabi te avel tradino katar tumaro foro.

³⁰ Goleke, morabi te kanden me alava ta te na cheren so cherde kote e manusa kai sea mai anglal neko tumen, ta te na a chen pokalime gale bilache ezgodenchar. Me o Jeova tumaro Del.