Levitiko 15 - Biblia ande chib Romani

O zakono kana o murus achel pokalime

¹ O Del dia orba e Moisesea ta phenda leke:

² Phenen e israelenge gala alava: Vareko te avela nasualo soke mutarelpe phum, pala goia phum ka achel pokalime

³ i te mutarelape phum o te nasti mutarelape phum.

⁴ Pe varesavo than kai gua lleno inzola, ta te perela o muter phumiaia, gua than achel pokalime. Ta pe varesavo than kai besela, gua than ka achel pokalime.

⁵ A vareko te dodila o than kai gua lleno inzilo, morabi te jalavel pe patave ta te jalavel e isto vou pe e paiea, ta ka achel pokalime lligo ni perel e riat.

⁶ A vareko te besela kote kai beslo gua lleno kai mutarelpe phum, morabi te jalavel pe patave ta te jalavel isto vou pe e paiea, ta ka achel pokalime lligo ni ka perel e riat.

⁷ A vareko te dodila gole llene kai perel letar e phum, morabi te jalavel pe patave ta te jalavel isto vou pe e paiea, ta ka achel pokalime lligo ni ka perel e riat.

⁸ A o lleno kai perel letar e phum te chungardela pe iek lleno chisto, gua lleno morabi te jalavel pe patave ta te jalavel isto vou pe e paiea, ta ka achel pokalime lligo ni ka perel e riat.

⁹ Ta suako zen kai llala upral pe late o lleno kai perel letar e phum, ka achel pokalime.

¹⁰ A vareko te dodila vareso pe so beslo gua lleno kai mutarelpe phum, ka avel pokalime lligo ni ka perel e riat.

¹¹ A vareko te dodila gole llene kai mutarelpe phum ta ni jalavela pe va, gua lleno morabi te jalavel pe patave ta isto vou pe e paiea, ta ka achel pokalime lligo ni ka perel e riat.

¹² A e piri kai dodila gua lleno kai mutarelpe phum morabi te phagol. Ta varesavi kavi kastuni morabi te jaladol e paiea.

¹³ A o lleno kai mutarelpe phum te sastola, kotar angle, morabi te llinel efta llive te sai chistolpe ta ka jalavel pe patave, ta ka jalavel isto vou pe e paiea kai likel katar e phuv, ondaka ka achel chisto.

¹⁴ Ta o ojtoto llive ka lel dui tortole o dui gulubura ternorre, ta ka llal kote kai delpe ande chara kai chidiniaon te del len kai o popo angla o Del.

¹⁵ A o popo ka del iek lendar kurbano pala o bilachipe ta o gua sargo ofrenda phabardi, ta gia o popo ka chistol e llene kai mutarelpe phum.

¹⁶ Kana iek lleno mutarelpe phum, ka jalavel e paiea sa pi esnaga ta ka achel pokalime lligo ni ka perel e riat.

¹⁷ Varesave patave o morchi kai pe lende perela e phum, morabi te jaladon e paiea ta ka achen pokalime lligo ni ka perel e riat.

¹⁸ Kana iek murus ta iek diskinia soven ande iek than ta aminpe ande goia riat, e dui morabi te jalaven pe e paiea ta ka achen pokalime lligo ni ka perel e riat.

O zakono katar e diskinia kana si pokalime

¹⁹ Kana iek diskinia avel lako chon te nasuaol, ka achel pokalime efta llive. Ta vareko te dodila la, ka achel pokalime lligo ni ka perel e riat.

²⁰ Pe varesavi ezgoda kai voi inzola kana ka avel lako chon te nasuaol, goia ezgoda ka achel pokalime.

²¹ Vareko te dodila o than kai voi inzili, morabi te jalavel pe patave ta i voupe e paiea, ta ka achel pokalime lligo ni ka perel e riat.

²² A vareko te dodila vareso pe so voi besli, gua lleno morabi te jalavel pe patave ta te jalavel isto vou pe paiea, ta ka achel pokalime lligo ni ka perel e riat.

²³ I te dodila o than kai voi inzili o besli, gua lleno ka achel pokalime lligo ni ka perel e riat.

²⁴ A vareko te sovela laia, ka lel o pokalipe lako ta ka achel pokalime lligo ni ka perel e riat, ta suako than kai sovela vou ka achel pokalipe.

²⁵ A te avela iek diskinia kai peravela rat na pe llivesa kai nasuaol, ta gua rat avela pe late but llivesa sa gola llivesa kai ka achel nasuali ka achel pokalime sargo kana avila lako chon te nasuaol.

²⁶ Pe varesavi than kai voi sovela ta pe vareso kai voi besela, ka achel pokalime sargo kana avila lako chon te nasuaol.

²⁷ A vareko te dodila gala ezgode ka achel pokalime. Morabi te jalavel pe patave ta te jalavel isto vou pe e paiea, ta ka achel pokalime lligo ni ka perel e riat.

²⁸ Ta kana ka achel o rat, ka llinel efta llive, ta mapalal ka achel chisti.

²⁹ Ando ojtoto llive ka lel dui tortole o dui gulubura terne, ta ka inllaren len kai o popo, kote kai delpe ande chara kai chidiniaon.

³⁰ O popo ka del iek lendar kurbano pala o bilachipe, ta o gua ofrenda phabardi. Gia o popo angla o Del ka chistol gole diskinia pala o rat kai peravela,

³¹ gia tumen ka duriaven e israelen katar lengo bilachipe, te na meren soke makhle pe pokalimaia mo santuario kai si maskar lende.

³² Gava si o zakono katar e llene kai peraven rat ta katar e llene kai mutarenpe phum, ta kai cheres gua nasualipe achen pokalime.

³³ Ta cheres e diskinie kai avel lengo chon te nasuaon, ta cheres e llene kai peraven rat o mutarenpe phum te avena diskinie o murus, ta cheres e murusa kai soven iekhe diskiniaia kai avila lako chon te nasuaol.