Levitiko 14 - Biblia ande chib Romani

O zakono sar te achen chiste e leprosura

¹ O Del dia orba e Moisesea ta phenda leke:

² Gava si o zakono katar o leproso kana ka chistolpe: O nasualo morabi te inllardol angla o popo,

³ ta o popo morabi te likel avri katar o pero te sai dikhel e nasuale. O popo te dikhela kai leko nasualipe maseko sastilo,

⁴ ka phenel te anen dui chiriklia llunde chiste, kas katar o sedro, chiti lolo ta patrorra te sai chistolpe.

⁵ Ta ka phenel o popo te mundaren iek chirikli ande iek piri te avel ande lete pai kai likel katar e phuv,

⁶ ta ka lel e chirikli llundi, o kas katar o sedro, o chiti lolo ta e patrorra, ta ka chingarel e chirikli llundi e ratea katar e chirikli muli upral katar o pai kai likel katar e phuv.

⁷ Mapalal ka chingarel efta droma e ratea e llene kai ka chistolpe katar e lepra, ta ka phenel kai si chisto. A e chirikli llundi ka mukliarel la ande umal.

⁸ Ta o lleno kai chistolpe morabi te inllarel pe patave, ta te jalavelpe isto vou pe, ta te rrandel sa pe bal katar pi ezgana te sai achel chisto. Mapalal sai ka del ando pero kana ka nakhen efta llive. Ande gola efta llive vou morabi te zivil ande umalia.

⁹ Ta o eftato llive ka rrandel sa e bal katar po soro, ka rrandel pe chor, pe burbe ta i sa pe bal, ta ka jalavel pe patave, ta ka jalavel pi esnaga ando pai, ta ka achel chisto.

¹⁰ Ta o ojtoto llive ka lel dui bakre kai inai nasuale, ta iek bakri iekhe burseki te na avel nasuali, ta i sov kile ta dopas katar e mai lachi arina te del la sargo iek ofrenda katar e septelie cherdi e zeitinoia, dopas litro zeitino.

¹¹ O popo kai ka chistol le, ka thovel gole llene kai ka chistolpe ta leke ezgode kote katar delpe ande chara kai chidiniaon, angla o Del.

¹² Mapalal ka lel iek katar e bakre ta ka del le e dopase litroia zeitino, ta ka miskol le sargo e ofrenda kai miskon la angla o Del.

¹³ Ta ka mundarel e bakre kote kai mundardol o kurbano pala o bilachipe ta o kurbano kai phabardol. O kurbano pala o bilachipe si e popoke, ta i o kurbano pala e dos si e popoko, soke si iek ezgoda but santa.

¹⁴ Mapalal ka lel o popo rat katar o kurbano pala e dos, ta ka makhel gole llene kai chistolpe pe rig tele katar leko kan o chacho, pe leko palcho katar leko va o chacho, ta pe leko palcho katar leko porrno o chacho.

¹⁵ Ta isto gia o popo ka lel cherricha zeitino, ta ka thovel le pe po va o stingo,

¹⁶ ta ka chingarel po nai o chacho ando zeitino kai si le ande po va o stingo, ta pe naiea ka chingarel efta droma angla o Del.

¹⁷ Ta katar o zeitino kai achel le ande leko va, ka thovel le po lleno kai chistolpe pe leko kan o chacho mai telorre, ta upral pe leko palcho katar leko va o chacho ta upral katar leko palcho katar leko porrno o chacho, upral katar o rat katar o kurbano katar e dos.

¹⁸ Ta so achela katar o zeitino ka thovel le upral po soro katar o lleno kai chistolpe. Gia o popo ka lel o prostipe katar o Del gole lleneke.

¹⁹ Mapalal ka del o popo o kurbano pala o bilachipe, ta gia ka cherel o chistope katar o lleno kai si pokalime. Mapalal ka mundarel o kurbano kai delpe phabardo,

²⁰ ta ka thovel le upral po altar, ta ka thovel i e simiche upral. Gia o popo ka lel o prostipe katar o bilachipe gole lleneke, ta gia ka achel chisto.

²¹ O lleno nasualo te si chorro ta nasti del pe gachin, ka lel iek bakro te delpe kurbano sargo e ofrenda kai miskon la pala e dos, te sai lel o prostipe katar po bilachipe, ta ka del dui kile katar e mai lachi arina cherdi e zeitinoia, dopas litro zeitino,

²² ta dui tortole, o dui gulubura terne, te avela le sar te cherel le, iek kurbano pala o bilachipe a o gua te avel phabardo.

²³ O ojtoto llive ka inllarel sa gala ezgode kai o popo, kotar katar del pe ande chara kai chidiniaon, angla o Del.

²⁴ O popo ka lel o bakro kai delpe kurbano pala e dos ta o dopas litro zeitino ta ka miskol len sargo ofrenda kai miskolpe angla o Del.

²⁵ Mapalal ka mundarel e bakre kai delpe kurbano pala e dos. Ka lel o rat e bakreko, ta ka thovel le po lleno kai chistolpe pe leko kan o chacho telorre, po palcho katar o va o chacho, ta po palcho katar o porrno o chacho.

²⁶ Ta o popo ka thovel katar o zeitino pe po va o stingo,

²⁷ ta pe naiea o chacho o popo ka chudel zeitino kai si pe leko va o stingo efta droma angla o Del.

²⁸ Ta i ka thovel o popo o zeitino kai si pe leko va po lleno kai chistolpe, pe leko kan o chacho mai tele, po palcho katar leko va o chacho, ta po palcho katar leko porrno o chacho, isto pe rig kai thoda leke o rat katar o kurbano kai delpe pala e dos.

²⁹ A so achela katar o zeitino kai si pe popoko va, ka thovel le upral po soro katar o lleno kai chistolpe, gia gava lleno ka lel katar o Del o prostipe katar po bilachipe.

³⁰ Mapalal ka del o popo iek katar e tortole o iek katar e gulubura terne, prema so sai del o lleno kai chistolpe.

³¹ Iek katar e chiriklia ka delpe kurbano pala o bilachipe, a ogoia chirikli ka phabardol, i e ofrenda katar e simiche. Gia ka lel o popo o prostipe katar o bilachipe e lleneke kai chistol pe.

³² Gava si o zakono pe ka saia o nasualipe katar e lepra, ta kai inai len te den mai but pala po chistope.

O zakono te sai chistonpe e chera kai si makle katar o nasualipe katar e lepra

³³ O Del dia orba e Moisesea ta e Aaronea ta phenda lenge:

³⁴ Kana tumen ka aven ande phuv katar o Kanaan, kai me dav la tumenge, a me te thodem e lepra ande varesavo cher katar tumari phuv,

³⁵ o gazda katar gua cher ka llal te dikhel e popo, ta ka phenel leke: Cherdol pe mange kai ande mo cher si iek nasualipe but baro.

³⁶ Ondaka o popo mai anglal te dikhel gua nasualipe, ka phenel te sai liken avri katar gua cher, gia tena achel pokalipe so si andre, mapalal o popo ka del andre te dikhel.

³⁷ Kana ka dikhel gua nasualipe, o popo te dikhela kai e zidura katar o cher si makhle ando zelenipe ta lole, kai si mai andre neko o zido,

³⁸ o popo ka likel katar o cher ta ka phenel te phanden gua cher efta llive,

³⁹ ta o eftato llive o popo ka irilpe ta ka dikhel pale o cher. Ta o nasualipe te barilo pe zidura e chereke,

⁴⁰ ka phenel te ikanen e barra kai si makhle ando nasualipe, ta te chuden len pe iek rig kai si pokalime avri katar o foro.

⁴¹ Ta ka phenel te rranden sa e zidura kai si andre ando cher, ta o prajo kai rrangle te chuden le po than kai si pokalime avri katar o foro.

⁴² Ta ka len aver barra te sai thodon po than kai sea ogola barra, ta glibo nevo te uchardol o cher.

⁴³ A o nasualipe te avela pale po cher i kana ikande e barra, ta rrangle leke zidura ta ucharde pale e gliboa leke zidura,

⁴⁴ ondaka o popo ka del te dikhel o cher. A o nasualipe te barilo ando cher, gua si e lepra bilachi ta o cher si pokalime.

⁴⁵ Goleke morabi te peraven le. Ta leke barra, leke kasta, ta sa so si e chereko, morabi te chuden len avri katar o foro pe iek rig pokalime.

⁴⁶ Vareko te dela andre ande gua cher ande llivesa kai o popo phenda te achel phanglo gua cher, gua lleno kai dia andre, ka achel pokalime lligo ni ka perel e riat.

⁴⁷ A vareko te sovela o te jala ande gua cher, morabi te jalavel pe patave te sai chisto len.

⁴⁸ A kana ka del o popo te dikhel o cher, ta te dikhela kai o nasualipe ni barilo kana ucharde le e gliboia, ka phenel kai o cher si chisto, soke o nasualipe llelotar.

⁴⁹ Ondaka te sai chistol o cher, ka lel dui chiriklia, kas katar o sedro, chiti lolo ta patrorra,

⁵⁰ ta ka mundarel iek chirikli ande iek piri, ta ande late te avel pai kai likel katar ephuv.

⁵¹ Mapalal ka lel o kas katar o sedro, e patrorra, o chiti lolo ta e chirikli llundi, ta ka chingarel len e ratea katar e chirikli muli ta e paiea kai likel katar e phuv, ta ka chingarel o cher efta droma.

⁵² Gia ka chisto o cher: E ratea katar e chirikli e paiea kai likel katar e phuv, e chiriklaia llundi, e kastea katar o sedro, e patrorrenchar ta e chitea lolo.

⁵³ Mapalal ka mukliarel e chiriklia avri katar o foro ande umal. Gia si sar ka chistol o cher, ta ka achel chisto.

⁵⁴ Gava si o zakono katar varesavo nasualipe katar e lepra,

⁵⁵ ta katar e lepra kai si ande patave ta ande chera,

⁵⁶ ta katar o suvlipe, phunia, ta kana parrniol o mas,

⁵⁷ te sai sikon kana si pokalime o kana si chisto. Gava si o zakono katar e lepra.