Levitiko 12 - Biblia ande chib Romani

Sar chistolpe e diskinia mapalal kana maladol lake

¹ O Del dia orba e Moisesea ta phenda leke:

² De orba e israelenchar ta phen lenge: E diskinia kana ka maladol lake iek minono, ka achel pokalime efta llive, isto gia sargo kana aven lake llivesa kai achel pokalime.

³ Ta pala e ojto llive ka cheren e minoneke e sirkunsision.

⁴ A e dei ka achel tranda ta trin llive te chistolpe katar po rat. Nasti ka dodil ni iek ezgoda santa, ta ni ka avel ando santuario lligo ni ka nakhen e llivesa te chistolpe.

⁵ A te maladola lake iek minoni, ka achel pokalime desustar llive, prema lake llivesa te chistolpe. Ta sovardes ta sov llive ka chistolpe katar po rat.

⁶ Kana ka nakhen e lllivesa kai chistolpe, te avela minono o minoni, e dei morabi te anel kote katar delpe ende chara kai chidiniaon iek bakro iekhe burseko te del le kurbano phabardo, ta iek gulubo terno ta iek tortola sargo o kurbano pala o bilachipe. Ka del len kai o popo,

⁷ ta o popo ka sikavel len angla o Del te sai mangel o prostipe lako. Gia voi ka achel chisti katar po rat. Gava si o zakono katar e diskinie kai maladona lenge, minono o minoni.

⁸ A goia dei te na avela la te del iek bakro, sai ka lel dui tortole te del len ofrenda o dui gulubura terne, iek te del le phabardo a o gua kurbano pala o bilachipe. Ta o popo ka del gua kurbano te sai lel o prostipe ta voi ka achel chiste.