Lamentasiones 3 - Biblia ande chib Romani

Aduricharen te braduil len o Del

¹ Me sem o lleno kai nakhla e patnia man chalada e joli e Devleki.

² Inllarda man ando truniariko, inllarda man pe droma kai inai villelo.

³ Irilpe mande suako llive ta dukhavel man pe vastea.

⁴ Cherda te phuriol mo mas ta mi mozga, phagla me kokala,

⁵ Vazdia iek zido pe mande thoda truial mandar e zalba ta e patnia,

⁶ mukla man ando truniariko sargo gola kai mule ollikana.

⁷ Phangla man katar suako rig, cherda te pharion me lanchura.

⁸ I kana moliva man ta urkiva, phangla pe kan ta ni thoda mange sama,

⁹ phangla mo drom ande zidura barrustune. Bangarda me droma.

¹⁰ Vou saia mange sargo iek melledo kai prezol, sargo iek liono kai aduricharel gurudino.

¹¹ Bangarda me droma ta sa chinda man, mukla man zatrime.

¹² ¡Chapenisarda po arko ta thoda man te sai chudel ande mande pe llide!

¹³ O Del chudia pe llide ta die andre ande mo lli.

¹⁴ Sa mo foro marel mandar espurnia, maren mandar espurnia sorro llive.

¹⁵ Pherda man cherkipe, cherko si o pipe kai dia man.

¹⁶ Dia man ande phuv ta phagla me danda, cherda te jav o prajo,

¹⁷ ta mo lio durilo katar e pas bristrailem katar o lachipe,

¹⁸ ta phendem: Jasardem e zor, jasardem so aduricharava katar o Del.

¹⁹ De tut golli katar mi duk ta kai sem korkorre, katar mi zalba ta o cherkipe kai nakhav.

²⁰ Misliuman ande gala ezgode ta jasarav sa mi zor,

²¹ a iek ezgoda mangav te misliu man ta te avel so aduricharav:

²² Pala e Devleki zalba ni avilam mundarde, soke leki zalba pe amende inai la son,

²³ Suako llive nevardol. ¡Gia chacho si o Del!

²⁴ Ta phendem ande mo lio: ¡O Del si mange sa goleke uzdiu man ande lete!

²⁵ O Del si lacho golenchar kai uzdinpe ande lete, golenchar kai roden le.

²⁶ Mai sukar si te na da orba ta te adurichara te braduil amen o Del.

²⁷ Sukar si te inllaraldol o pharipe sar kana o manus si terno.

²⁸ Te besel korkorre ta te na del orba soke o Del thoda leke goia ezgoda.

²⁹ Trubul te thovel po mui pe phuv te avela le so aduricharel.

³⁰ Morabi te thovel po cham goleke kai dukhavel le, ta te mukel te kusen le zurale.

³¹ Soke o Del ni ka mukel amen ostade.

³² Vou dukhavel, ta i si leke zalba soke leko volipe si baro.

³³ Leke inai drago te tristol e manusen ni te dukhavel len.

³⁴ Te ustaven tala pe porrne sa e llenen kai si phangle,

³⁵ te nakhen upral pe so trubul e manuse angla o Del,

³⁶ te bangaren o chachipe katar iek kris, gola ezgode inai drago e Devleke.

³⁷ ¿Ko sai phenel kai nakhla iek ezgoda kai o Del ni phenda te cherdol?

³⁸ ¿Ni likel katar mui katar o Del e milosoko o lachipe ta i o bilachipe?

³⁹ ¿Soke tristolpe o manus kai zivil pe phuv? O manus si te tristolpe pala po bilachipe.

⁴⁰ Dikha pe ezgode kai chera, roda ta iri amen kai o Del.

⁴¹ Vazda karing o Del e milosoko amaro lio ta amare va.

⁴² Amen sam bilache ta ni kandiam, ta tu ni prostisardan amen.

⁴³ Barili chi joli ta llelan pala amende, lian amaro zivoto ta ni prostisardan.

⁴⁴ Thodan truial tutar oblakura te na resel tute amaro molipe.

⁴⁵ Amen sama chuke iek gadope maskar o sueto.

⁴⁶ Sa amare dusmanura die amare orbe,

⁴⁷ e dar, o kojaipe, e zatrania ta o phagipe, ¡gua si amaro chari!

⁴⁸ Me ausa peren sargo iek bari len pala e zatrania katar e chei me foroki.

⁴⁹ Peren me ausa ta ni achen soke ni achel e duk

⁵⁰ lligo ni ka dikhel pe amende o Del katar o miloso.

⁵¹ Dukhan man me akha ta mo lio, pala sa e chea katar mo foro.

⁵² Bi te avel len soke, me dusmanura istarde man sargo iek chirikli,

⁵³ chudie man llundo ande iek bunari ta ucharde le iekhe barrea.

⁵⁴ O pai ucharda man llik kai mo soro ta phenava me mange: ¡Kate ka merav!

⁵⁵ Devla, me ikhardem tut chak andral katar o phandipe,

⁵⁶ Asundan mo avazi, ¡na phande che kan pe mo roipe!

⁵⁷ Avilan gua llive kai ikhardem tut ta phendan mange: Na dara.

⁵⁸ Devla, tu arakhe man pe mo zivoto tu braduisardan mo zivoto.

⁵⁹ Tu Devla hiklhan sar dukhade man, ¡cher mange o chachipe!

⁶⁰ Tu dikhlan sar murzin pe mande, ta sar mislinpe te zatrin man.

⁶¹ Asundan sar kusen man ta sa e ezgode bilache kai mangen te cheren mange,

⁶² e alava kai phenen me dusmanura ta e orbe kai den mandar suako llive.

⁶³ Dik Devla kai sorro llive maren mandar espurnia.

⁶⁴ Devla, pochin lenge, pochin lenge prema so cheren.

⁶⁵ Zuriar lenge mislura, ta thov pe lende che armaia.

⁶⁶ Devla, lla pala lende jolinaia ta zatrisar len pe gava zivoto.