Lamentasiones 2 - Biblia ande chib Romani

E zalba katar o Jerusalem avel katar o Del

¹ Gia bari saia e joli e Devleki kai thoda o truniariko pe chei katar o Sion, perada o sukaripe katar o Israel, katar o miloso llik tele pe phuv ta ande pi joli ni diape golli katar o than kai thovela pe porrne.

² O Del ande pi joli ni prostisarda ta perada sa e chare katar o Jakob, ande pi joli perada e zidura katar e chei katar o Juda, mukla ando lallao e foro ta golen kai gazdarina le.

³ Ande pi joli lia o gazdaripe katar o Israel. Lia amendar po va o chacho kai pomozila amen angla o dusmano, ¡phabarda ando Jakob iek iag kai phabarel sogo si truial!

⁴ Chapenisarda po arko sargo iek dusmano ziriarda po va o chacho sargo kana marelpe amenchar, phagla so dikhola sukar. Sargo iag chudia pi joli pe chara katar o Sion.

⁵ O Del cherda so cherel iek dusmano zatrisarda e Israele, phagla sa e bare chera, phagla leke zidura, ta cherda te pherdol zalba ta roipe e chea katar o Sion.

⁶ Ikanda pi chara sargo te ikanel e cherorra patrenge, zatrisarda o than kai chidiniaona, o Del cherda te bristarenpe ando Sion katar e slave ta katar e sabadura. Ta ando phabardipe katar leki joli, chudia e charo ta e popo.

⁷ O Del chudia po altar, ta mukla pe iek rig pi chara, mukla te gazdaril o dusmano pe zidura kai arakhen o foro. ¡Baro urkipe si ando cher e Devleko! sargo kana si iek llive slavako.

⁸ O Del mangla te phagel e zidura e cheake katar o Sion. Phenda sar ka avel zatrime, ni achada po va pe zatrania, achile zalosne e dui zidura ta peletar ande iek than.

⁹ Leke udara chudie len pe phuv, leke alkave achile zatrime. Leko charo ta leke gazda si ande phuvia kai ni pachan, akana inai len o zakono e Devleko, ni lenge poraukura inai len poroka katar o Del.

¹⁰ E phure e cheake katar o Sion besen pe phuv ta ni den orba, chudie o prajo pe po soro ta thode pe pete patave zalosne, e chea katar o Jerusalem thode po soro pe phuv.

¹¹ Me akha phanglion katar e ausa, ta lel te pharrol mo lio, inai man vlaga pala e zalba kai nakhen mo foro soke dikhav kai e minone kai pien kolin meren bokhatar ando foro ta pe droma.

¹² E minone phenena pe dake: ¿Kaitalo o lliu ta e mol? perena sargo kana ranisarde len pe droma katar o foro, ta chirdena o lli ta merena ande angali pe daki.

¹³ ¿Sar sai phenav kai san chei katar o Jerusalem? ¿Pe ka sai phenav kai san chuti te dav tut zor chei katar o Sion? Soke bari sargo e mora si chi zatrania, ¿ko ka sastarel tut?

¹⁴ So phende kai dikhle che poraukura saia kojaipe ta so ni mol le niso, ta ni sikade cho bilachipe te achaven cho phanglipe, von phende chuke poroke kojamne, te cheren te kojado.

¹⁵ Sa e llene kai nakhena po drom marena espurnia ta marena ande palme, dena sol ta miskona po soro espurniaia, ta phenena katar e chei katar o Jerusalem: ¿Gava si o foro kai phenen letar kai si o mai sukar katar e phuv?

¹⁶ Sa che dusmanura den bilache orbe tutar. Marde espurnia basalde pe danda ta phende: Sa zatrisardam la. Gava si o llive kai aduricharaia akana reslam le, akana diklham le.

¹⁷ O Del cherda so mangela te cherel, cherda e sovel kai jala. So phendaia kai ka zatril omanglal zatrisarda ta ni prostisarda, cherda te veselilpe o dusmano pe tute, ta bariarda e zor katar che dusmanura.

¹⁸ ¡Mang te pomozil tut o Del, chei katar o Jerusalem! ¡Orachaia ta ollivesea muk te llan che ausa sargo iek len! ¡Te na achel cho roipe, na achav o roipe katar che akha!

¹⁹ Uste, urkisar orachaia urkisar suako saiato, chuchar sa so si ande cho lio angla o Del, muk te llal sargo o pai vazde che va karing lete ta molisao leke pala zivoto che minonengo kai pe droma katar o foro meren soke inai len so te jan.

²⁰ Dik Devla, ta mislisao kake cherdan gaia ezgoda. ¿Trubul e diskinie te jan pe minonen kai den len kolin? ¿Trubul ande Devleki chara te mundaren e poponen ta e porauken?

²¹ chudine pe droma dikhon e terne ta e phure, me terne ta me chea mundarde len e jarnienchar ando llive katar chi joli mundardan. ¡Mundardan ta ni prostisardan!

²² Cherdan te avel mi dar katar suako rig, sargo te aven pe iek slava. Devla, ando llive katar chi joli niko nasti naslo, sa mule. Golen kai bariardem ta pravardem mundarda len o dusmano.