Кэздэто 9 - Biblia ande chib Romani

O Del achel pe iek orba e Noeea

¹ O Del blagosisarda e Noee ta leke chaurren, ta phenda lenge: Te avel tumen but chaurre ta tumaro porodo te pherel e phuv.

² Ta sa e zivirinie pe phuv ka daran angla tumende, ta sa e chiriklia, ta sa gola kai terrinpe pe phuv, ta sa e mache e morake, tumen ka gazdarin pe lende.

³ Sai jan sa e zivirinie ta e patra zelene kai mangena te pravaren tumen. Me dav len tumenge.

⁴ A si iek ezgoda kai morabi te na jan, o mas e ratea, soke ando rat si o zivoto.

⁵ Me ka chinav kris pe suako manus, ta pe suako zivirinia kai mundarela vareka tumendar. Ta ka chinav kris pe vareka kai mundarela avere.

⁶ Vareko te mundarela iekhe manuse, aver manus ka mundarel le, soke o manus si cherdo prema o Del.

⁷ A tumen, ¡te avel tumen but chaurre, ta pheren e phuv tumare chaurrenchar!

⁸ Ta o Del phenda e Noeeke ta leke chaurrenge:

⁹ Dikhen, me akana achav po alav tumenchar ta tumare porodoia,

¹⁰ ta i sa e zivirinienchar e phuviake kai si tumenchar, ta e chiriklienchar, ta i golenchar kai likiste katar e bari llimia.

¹¹ Ta pe gaia orba ka achav tumenchar, kai ni ka zatriv ios e manusen ta ni e zivirinien iekhe paiea gia baro te zatril e phuv.

¹² Ta o Del phenda: Gava si so ka mukav te dikhol te sai llanen pe savi orba achilem tumenchar ta i e zivirinienchar ostade.

¹³ Muklem mi kustik ande oblakura te sai dikhol, ta gia te llanen pe savi orba achilem e phuviaia.

¹⁴ Ta kana ka cherav te aven e oblakura, e kustik ka dikhol ande oblakura.

¹⁵ Ondaka ka dav man golli katar e orba kai achilem tumenchar ta i sa e zivirinienchar, ta ni ka avel ios iek pai gia baro te zatril tumen.

¹⁶ Ta kana ka avel e kustik ande oblakura, me ka dikhav la ta ka dav man golli katar e orba kai achilem tumenchar ostade, sa e manusenchar ta sa e zivirinienchar kai si pe phuv.

¹⁷ Ta i o Del phenda e Noeeke: Gava si so muklem te dikhol te sai llanen pe savi orba achilem e manusenchar ta e zivirinienchar kai si pe phuv.

O Noe ta leke chaurre

¹⁸ E chave e Noeeke kai likiste katar e bari llimia sea o Sem, o Kam, ta o Jafet. A o Kam saia o dad katar o Kanaan.

¹⁹ Gala sea e trin chaurre e Noeeke, ta katar lengo porodo pherdili pale e phuv.

²⁰ Mapalal o Noe thoda te radil e phuv, ta bariarda drakha.

²¹ Ta iek llive o Noe pila mol ta matilo, ta achilo nango ande pi chara.

²² Ta o Kam kai saia o dad katar o Kanaan, dikhla pe dade nango ta llelo te phenel le pe duie phlalenge kai sea avri.

²³ Ondaka o Sem ta o Jafet lie iek chiti ta thodele pe pe zea, ta die e zea karing po dad ta phirde palpale te na dikhen pe dade nango.

²⁴ Kana o Noe trazosailo ta llangla so cherdaia lea leko chaurro o mai terno,

²⁵ phenda: ¡Proketo te avel o Kanaan! ¡Ka avel o sluga e slugengo pe phlalenge!

²⁶ Ta i phenda: Blagosime te avel o Gazda, o Del katar o Sem, ta o Kanaan te avel leko sluga.

²⁷ Ta o Del te bariarel e phuv katar o Jafet, ta te zivil ande chare katar o Sem, ta o Kanaan te avel leko sluga.

²⁸ Ta kana nakhle a bare paia kai uchardea e phuv, o Noe zivisarda trin stotine ta pinda burs.

²⁹ Ta sa e bursa kai zivisarda o Noe sea inia stotine ta pinda burs, ta mulo.