Кэздэто 8 - Biblia ande chib Romani

Achilo o baro bursin

¹ Ondaka o Del diape golli katar o Noe ta katar sa e zivirinie kai sea lea ande bari llimia. Ta cherda te phurdel iek balav pe phuv, ta e paia thode te fulien.

² Ta e paia kai sea telal katar e phuv phanglile, ta i e paia e milosoke ta o bursin achilo,

³ ta pala e stotina ta pinda llive, e paia sa poloke thode te fulien.

⁴ Ta o llive desefta katar o chon eftato, e bari llimia achili upral pe burdura katar o Ararat.

⁵ Ta e paia sa mai fuliena. Ta o purvo llive katar o chon desengo, sai dikhona e thana kai si mai vazdine katar e burdura.

⁶ Ta pala e saranda llive o Noe putarda e penllerava kai cherdaia katar e bari llimia,

⁷ ta mukliarda iek kuervo, ta furiala pe iek rig ta pe aver rig lligo ni sukilo o pai katar e phuv.

⁸ Mapalal o Noe mukliarda iek gulubo te sai llanel dal e phuv sukilia katar e paia.

⁹ Ta o gulubo irisailo soke ni malada ni iek than kai te achel, soke e paia sea upral pe sa e phuv, goleke o Noe inzarda po va, lia e gulubo ta thoda le andre ande bari llimia.

¹⁰ Ta o Noe aduricharda efta llive ios ta mukliarda pale e gulubo avri katar e bari llimia.

¹¹ Ta kana perela e riat o gulubo irisailo, ta anda ande po mui iek patrin maslinkaki. Kote llangla o Noe kai e paia fulistea, ta e phuv sukola katar e paia.

¹² Ta aduricharda efta llive ios ta mukliarda pale e gulubo, ta o gulubo ni irisailo ios kai o Noe.

¹³ Ando purvo llive katar o purvo chon, e Noeeke saia sov stotine ta iek burs. Ondaka e bare paia kai ucharena e phuv sukile, ta o Noe ikanda upral so ucharela e bari llimia ta dikhla kai e phuv saia suki.

¹⁴ Ta ando llive bis ta efta katar o duito chon, e phuv sukili katar e paia.

¹⁵ Ondaka o Del phenda e Noeeke:

¹⁶ Like katar e bari llimia che rromiaia, che chaurrenchar ta che borienchar.

¹⁷ Ta ikan sa e zivirinie, e zivirinie kai inai dive, ta golen kai terrinpe pe phuv, te sai bariol lengo porodo ta gia te pheren e phuv.

¹⁸ Ondaka likiste katar e bari llimia o Noe, leki rromi, leke chaurre ta leke boria.

¹⁹ Ta i likiste sa e zivirinie, gola kai inai dive, gola kai si dive, gola kai terrinpe pe phuv, ta i e chiriklia.

²⁰ Mapalal o Noe lacharda iek than te blagosil e Devle ta te del le kurbanura. Ta lia katar suako zivirinia chisti ta katar suako chirikli chisti, ta dia len kurbano e Devleke.

²¹ Ta kana avila kai o Del gaia khan gia sukar, o Del phenda: Nikada ios ni ka dav armaia e phuvia cheres e dos e manusengi, soke o manus sar kai si minono samo mislilpe te cherel o bilachipe. Ta ni ka zatriv pale so si le zivoto, gia sar cherdem akana.

²² Sogo avela e phuv, ka thoven simiche ande phuv ta ka chiden e septelie, ka cherel tatipe ta sil, ka avel o viend ta i o milai ta o llive ta i e riat.