Кэздэто 7 - Biblia ande chib Romani

O baro bursin

¹ Mapalal o Del phenda e Noeeke: Nak tu ta cho porodo ande llimia, soke tut dikhlem chacho angla ma ande gaia vicha gale vremeki.

² Ta katar suako zivirinie kai si chiste, ka le efta zivirinie diskinie ta efta zivirinie murus, a katar suako zivirinie kai inai chiste, ka le samo iek zivirinia diskinia ta iek zivirinia murus.

³ Ta i katar e chiriklia e milosoke, efta zivirinie murus ta efta zivirinie diskinie, te sai aven katar suako chirikli pe phuv.

⁴ Soke pala efta llive ios me ka cherav te avel iek bursin pe phuv saranda llive ta saranda racha. Ta ka zatriv sa so cherdem kai si le zivoto pe phuv.

⁵ Ta o Noe cherda sa so o Del phendaia leke te cherel.

⁶ E Noeeke sea sov stotine burs kana avilo o baro pai ta ucharda e phuv.

⁷ Ta dia o Noe ande bari llimia pe chaurrenchar, pe rromiaia, ta pe borienchar, te na tason ando pai.

⁸ Katar e zivirinie chiste ta katar gola kai inai chiste, ta katar gola kai furian, ta katar gola kai terrinpe, pe phuv,

⁹ die e Noeea ande bari llimia dui po dui zivirinie, zivirinie diskinie ta zivirinie murus, gia sar o Del phendaia leke te cherel.

¹⁰ Pala e efta llive avile e bare paia, ta thode te ucharen e phuv.

¹¹ Kana saia e Noeeke sov stotine burs ando duito chon katar o llive desefta, thode te liken e paia kai si telal katar e phuv, ta phutardile ando miloso e bare paia.

¹² Ta diapeke pe phuv saranda llive ta saranda racha.

¹³ Ta isto ande gua llive dia ande bari llimia o Noe, ta leke chaurre, o Sem, o Kam ta o Jafet, ta leki rromi e Noeeki, ta leke trin boria.

¹⁴ Ta lenchar die ande bari llimia katar suako zivirinia, gola kai si dive ta gola kai inai dive, ta i gola kai terrinpe pe phuv ta i katar e chiriklia.

¹⁵ Sa e zivirinie die e Noeea andre ande bari llimia, dui po dui.

¹⁶ E zivirinie kai avile ta kai die sea katar suako zivirinia, zivirinie murus ta zivirinie diskinie, gia sar o Del phendaia e Noeeke, ta mapalal o Del phangla o udar katar e bari llimia.

¹⁷ Ta avile e bare paia pe phuv saranda llive, ta kana barile e paia, e bari llimia vazdinaili katar e phuv upral po pai.

¹⁸ Ta e paia sa mai but bariona, a e bari llimia achela upral pe gola bare paia.

¹⁹ Ta pe gachin barile e paia kai ucharde e mai bare burdura e phuviake.

²⁰ Ta barile e paia efta pole mai upre katar e mai bare burdura.

²¹ Ta gia mule sa e manusa kai zivina pe phuv, ta isto gia mule e chiriklia, e zivirinie kai inai dive, ta e zivirinie kai si dive, ta i gola kai terrinpe pe phuv.

²² Gia mula sa so saia le zivoto pe phuv.

²³ Samo o Noe ta gola kai sea ande bari llimia achile llunde. A sa ogola mule, e manusa, e zivirinie kai inai dive, e chiriklia e milosoke, ta e zivirinie kai terrinpe.

²⁴ Ta achile e paia upral pe phuv stotina ta pinta llivesa.