Кэздэто 5 - Biblia ande chib Romani

O porodo e Adaneko

¹ Gava si o lil katar e vicha e Adaneki. Kana o Del cherda e muruse, cherda le prema pete.

² Cherda len murus ta diskinia, ta blagosisarda len. O llive kana cherda len o Del phenda: Ka ikhardon manusa.

³ O Adan saia leke stotina ta tranda burs kana biandilo leko chaurro, kai saia sargo vou, ta thoda leko anav Set.

⁴ Mapalal kana biandilo o Set, o Adan zivisarda ojto stotine burs, ta avila le chaurre ta chorra.

⁵ Ta sa e bursa kai zivisarda o Adan, sea inia stotine ta tranda burs ta mulo.

⁶ O set saia leke stotina ta panch burs kana biandilo leko chaurro o Enos.

⁷ Ta mapalal kana biandilo o Enos, o Set zivisarda ojto stotine ta efta burs, ta avila le chaurre ta chorra.

⁸ Ta o Set zivisarda iniavardes ta desudui burs, ta mulo.

⁹ O Enos saia leke iniavardes burs kana biandilo leko chaurro o Kainan.

¹⁰ Ta mapalal kana biandilo o Kainan, o Enos zivisarda ojto stotine ta desupanch burs, ta avila le chaurre ta chorra.

¹¹ Ta zivisarda o Enos inia stotine ta panch burs, ta mulo.

¹² O Kainan saia leke eftavardes burs kana biandilo leko chaurro o Malalel.

¹³ Mapalal kana biandilo o Malalel, o Kainan zivisarda ojto stotine ta saranda burs, ta avila le chaurre ta chorra.

¹⁴ Ta zivisarda o Kainan inia stotine ta des burs, ta mulo.

¹⁵ O Malalel saia leke sovardes ta panch burs kana biandilo leko chaurro o Jared.

¹⁶ Ta mapalal kana biandilo o Jared, o Malalel zivisarda ojto stotine ta tranda burs ta avila le chaurre ta chorra.

¹⁷ Ta zivisarda o Malalel ojto stotine ta iniavardes ta panch burs ta mulo.

¹⁸ O Jared saia leke stotina ta sovardes ta dui burs kana biandilo leko chaurro o Enok.

¹⁹ Mapalal kana biandilo o Enok, o Jared zivisarda ojto stotine burs, ta avila le chaurre ta chorra.

²⁰ Ta zivisarda o Jared inia stotine ta sovardes ta dui burs, ta mulo.

²¹ O Enok saia leke sovardes ta panch burs kana biandilo leko chaurro o Matusalen.

²² Ta kana biandilo leko chaurro o Matusalen, o Enok phirda e Devlea ta zivisarda trin stotine burs, ta avila le chaurre ta chorra.

²³ Ta zivisarda o Enok trin stotine ta sovardes ta panch burs.

²⁴ Ta phirda o Enok e Devlea, ta sumbisailo soke o Del inllarda le.

²⁵ O Matusalen saia leke stotina ta ojtovardes ta efta burs kana biandilo leko chaurro o Lamek.

²⁶ Ta mapalal kana biandilo o Lamek, o Matusalen zivisarda efta stotine ta ojtovardes ta dui burs, ta avila le chaurre ta chorra.

²⁷ O Matusalen zivisarda inia stotine ta sovardes ta inia burs ta mulo.

²⁸ O Lamek saia leke stotina ta ojtovardes ta dui burs kana biandilo leke iek chaurro,

²⁹ ta thoda leko anav Noe, soke phenda: O Del dia armaia e phuvia ta morabi te radi but zurale e phuv te sai del amen te ja, a gava minono ka cherel te lelpe amendar o chiñipe.

³⁰ Mapalal kana biandilo o Noe, o Lamek zivisarda panch stotine ta iniavardes ta panch burs, ta avila le chaurre ta chorra.

³¹ Ta o Lamek zivisarda efta stotine ta eftavardes ta efta burs, ta mulo.

³² Ta o Noe saia leke panch stotine burs kana biandile leke chaurre o Sem, o Kam ta o Jafet.