Кэздэто 49 - Biblia ande chib Romani

O Jakob blagosil pe chaurren

¹ O Jakob ikharda pe chaurren ta phenda lenge: Aven mai pase ta ka phenav tumenge so ka avelpe mai angle:

² Aven mai pase te asunen, chaurre katar o Jakob, asunen tumare dade e Israele.

³ Tu, Ruben, san mo chaurro o mai purano. Mi zor ta e purvi septelia katar mo ternipe. O purvo ando liubao ta ande zor.

⁴ A ni ka ave ios o purvo, soke san sargo e mora divi kai nasti achadol, tu dukhadan man zurale, soke sovtan iekhe diskiniaia kai saia katar murne diskinie.

⁵ O Simeon ta o Levi si phlal, suako drom marenpe pe jarniea divomaia.

⁶ ¡Nikada ni kamam te avav lenchar kote kai von chidiniaon! Soke kana joliaona mundarena llenen, ta samo ande joli phagle e porrne e guruvenge.

⁷ ¡Proketo, te avel lengi joli gia divi! ¡Me ka rispiu len saurren ande sa e phuv katar o Israel!

⁸ A tut Juda che phlal ka blagosin, ta ka istare katar e korr che dusmanen, ta isto che phlal ka den tenemava angla tu.

⁹ ¡A tu, Juda mo chaurro! San sargo iek liono terno kana mukel po jape kai istarda ta inzol pe phuv, sargo kana si iek liono baro. ¿A ko ka tromal te llungavel le?

¹⁰ Niko ni ka lel e zor katar o Juda, ni e rovli kai si maskar leke porrne lligo ni ka avel o Silo, gazda katar e rovli gole kai o foro ka kandel.

¹¹ Gua kai phandel po magarcho po krango e drakhako, gua kai jalavel sa pe patave e moliaia, ta ando rat e drakhako jalada po gertachi.

¹² Leke akha lole katar e drak, ta leke danda parrne katar o thud.

¹³ O Zabulon ka zivil pasa e mora kote kai ka aven e llimie bare. Lenge phuvia ka resen llik kai o Sidon.

¹⁴ O Isakar si iek magarcho zuralo kai inzol maskar e rindura.

¹⁵ Kana dikhla kai e phuv saia lachi ta sukar te zivil esmiro, bangarda pe zea te inllarel pharipe, ta mangla te cherdol sluga.

¹⁶ A o Dan ka gazdaril isto pe pe llene sargo iek vicha katar o Israel.

¹⁷ O Dan ka avel sargo sap kai si pasa o drom, kai dandarel e kukuia e grasteke ta cherel te perel e zeenchar e llene kai llal po gra.

¹⁸ ¡Devla aduricharav cho braduipe!

¹⁹ O Gad, ka marelpe lea iek baro sueto, a vou mapalal ka llal pala lende te marel len.

²⁰ O Aser ka avel le but marrno ta ka del jape sargo jape e charoko.

²¹ O Neftali si sargo iek bakriorri mukliardi kai si la sukar minone.

²² O Jose si sargo patra kai barion pasa o pai kai lake krangura barion upral po zido.

²³ Llene bilache vazdinaile pe lete ta chudie llide ande lete.

²⁴ A o Jose si le va zurale ta istarel zurale po arko, ¡Fala e Devleke o Del katar o Jakob kai si le sa e zor! ¡Pala o anav e Chobanoko, e pechina e Israeleki!

²⁵ ¡Fala e Devleke o Del che dadeko kai ka pomozil tut, o Del kai si le sa e zor kai ka blagosil tut! ¡E blagosimaia kai avel upral katar o miloso! ¡E blagosimaia kai avel telal katar e mora! ¡E blagosimaia kai avel katar e dea kai den te pien pe minonen!

²⁶ Mai baro si o blagosipe kai avel katar cho dad, neko o blagosipe kai avel katar e burdura ta katar e pechine ostade. Sa gava blagosipe si chuke Jose, soke sana esvirime maskar che phlal.

²⁷ A tu Benjamin san sargo iek ruv divo, kai thiarinako rano jal so istarda ta pasa racha fulavel so achel.

²⁸ Gala si e desudui viche katar o Israel, ta gava si so phenda kana blagosisarda len, ta suakone vicha dia la iek blagosipe.

O meripe e Jakobeko

²⁹ Mapalal kana blagosisarda len, mukla lenge gala alava te cheren: Me oma ka merav. Goleke me molivman tumenge, prajon man ando limori kai si me purane, ando limori kai si anado ando barr ande umal katar o Efron o jitita.

³⁰ Kai si ande umal katar o Makpela, kai si angla o Mamre, ande phuv katar o Kanaan, e umal kai chindaia o Abraam katar o Efron o jitita te cherel la limori.

³¹ Kote prajosarde e Abraame ta leke rromia e Sara, ta e Isaake ta leke rromia e Rebeka, ta kote me prajosardem e Lea.

³² O limori kai si anado ando barr ta e umal chindela katar e jititura.

³³ Kana o Jakob getosarda te mukel gala alava pe pe chaurre, thodape pale ande pi postelia ta mulo ta chidinailo pe puranenchar.