Кэздэто 47 - Biblia ande chib Romani

¹ O Jose llelo te phenel e viasta e Faraonoke ta phenda leke: Mo dad, me phlal, lenge bakre ta lenge guruva ta sa pe ezgodenchar avile katar e phuv katar o Kanaan, ta akana si ande phuv katar o Gosen.

² Ta esvirisarda panch katar pe phlal ta anda len angla o Faraon te pinllarel len.

³ Ondaka o Faraon puchla e Joseeke phlalen: ¿Ande so radin tumen? A von phende leke: Amen che sluge sam chobanura, arakha bakren gia sar cherenale amare purane.

⁴ Amen avilam te acha ande gaia phuv, soke bari bok si ando Kanaan ta inai char amare bakrenge. Goleke moli amen chuke, muk amen te zivi ande phuv katar o Gosen.

⁵ Ondaka o Faraon phenda e Joseeke: Cho dad ta che phlal avile tute.

⁶ E phuv katar o Ejipto si angla tu. De len e phuv katar o Gosen kai si e mai lachi, te sai zivin kote. A te malavea llene maskar lende kai llanen te cheren buchi, thov len te arakhen me guruven.

⁷ A o Jose inllarda i pe dade te pinllarel le o Faraon, ta o Jakob blagosisarda e Faraono.

⁸ A o Faraon puchla le: ¿Pe gachin burs si chuke?

⁹ A o Jakob phenda leke: Si mange stotina ta tranda burs kai llav katar iek rig pe aver rig. Inai but bursa ta bilache, soke ni reslem te ziviu so zivisarde me purane.

¹⁰ Ondaka o Jakob blagosisarda e Faraone ta likisto kotar katar saia o Faraon.

¹¹ Gia o Jose dia phuv pe phlalalen ande mai lachi phuv katar o Ejipto, te sai zivin kote gia sar o Faraon phendaia leke. Gia si sar leko dad ta leke phlal avila len phuv ande mai lache umalia katar o Rameses.

¹² Ta o Jose dela te jal sa pe familia prema so trubula suako familia.

O Jose thovel iek zakono te sai zivin e ejipsiura

¹³ Pe ni iek rig ni saia lliu, ta e bok sa mai bariola. Ta resli e bok ando Ejipto ta i ando Kanaan ta e llene merena bokhatar.

¹⁴ O Jose chidia sa e love kai saia ando Ejipto ta kai saia ando Kanaan pala o lliu kai bichinela, ta thoda sa e love ando cher e Faraonoko.

¹⁵ Kana ni saia love ando Ejipto ta ni ando Kanaan, e ejipsiura llele te phenen e Joseeke: De amen tu te ja, inai sukar te muke amen te mera bokhatar samo soke inai amen love.

¹⁶ Ondaka o Jose phenda lenge: Te inai tumen love, anen tumare zivirinie ta me ka pharruvav len tumenge po lliu.

¹⁷ A von ande pe gra, pe bakre, pe guruven ta pe magarchura kai o Jose, a o Jose dia len lliu sa gua burs.

¹⁸ Mapalal kana nakhlo gua burs, ta avilo o duito burs, avile lete ta phende leke: Nasti guruva tutar kai inai amen love, ta amare zivirinie si chire. Akana so si amen si amare phuvia ta amare esnage.

¹⁹ Goleke chin amen tu ta i amare phuvia, ta de amen pe lende lliu. A amen ka ava sluge e Faraonoke ta ka radi leke amare phuvia, ta de amen simiche te na mera ta e phuv te na murilpe. ¿Soke tu ka muke amen te mera amare phuviaia?

²⁰ Ondaka o Jose chinda sa e phuvia katar o Ejipto e Faraonoke, soke e ejipsiura bichinde pe phuvia cheres e bari bok kai avila pe lende, gia si sar e phuv nakhla ande va e Faraonoke,

²¹ ta gia sa e ejipsiura cherdile sluge ande sa e phuv katar o Ejipto,

²² samo e phuvia kai o Jose ni chinda sea e poponenge, soke e popura pravarela len o Faraon, goleke e popura ni bichinde pe phuvia.

²³ Mapalal o Jose phenda e foroke: Akana tumen ta tumare phuvia sen e Faraonoke, soke me chindem len leke. Akana len simiche te sai thoven len ande phuv,

²⁴ ta o panchto katar so ka chiden ka avel e Faraonoke, ta o starto katar so ka chiden ka avel te thoven pale simiche ande phuv ta te sai jan tumen, tumare chaurre ta e llene kai zivin tumenchar.

²⁵ A von phende: Tu san but lacho amenchar, soke braduisardan amaro zivoto. ¡Ka ava sluge e Faraonoke!

²⁶ Ondaka o Jose thoda gava zakono ande sa e phuv katar o Ejipto, te sai delpe o panchto katar so chidelpe katar e phuv. Gava zakono si llik allive, samo e popura ni pochinen niso, soke lenge phuvia nikada ni avile e Faraonoke.

E alava kai mukla o Jakob

²⁷ Gia si sar e israelitura achile te zivin ando Ejipto ande phuv katar o Gosen, ta kote but barilo lengo porodo.

²⁸ Ta o Jakob zivisarda desefta burs ando Ejipto, ta resla te aven leke stotina ta saranda ta efta burs.

²⁹ Iek llive o Israel acharda kai leko llive te merel saia pase. Ondaka ikharda pe chaurre e Josee ta phenda leke: Te avela de istina kai mange te chere mange iek sebapi, thov cho va telal tala mi chang, ta ja mange sovel kai ka chere so me ka mangav tutar. ¡Moliv man chuke na prajo man ando Ejipto!

³⁰ Kana ka sovav me puranenchar, ikan man katar o Ejipto ta prajo man ande lengo limori. A o Jose phenda leke: Gia sar phendan mange gia ka cherav.

³¹ Ondaka o Israel phenda leke: Ja mange sovel. A o Jose jala leke sovel. Ondaka o Israel inzilo po seran katar pi kama.