Кэздэто 46 - Biblia ande chib Romani

O Jakob ando Ejipto

¹ O Israel likisto katar o Kanaan sa pe ezgodenchar kai saia le, ta kana avilo ando Berseba, dia kurbanura e Devle, o Del katar leko dad o Isaak.

² Goia riat o Del dia orba e Israelea ando suno, ta phenda: Jakob, Jakob. A o Jakob phenda: Kate sem.

³ Ondaka o Del phenda leke: Me sem o Del che dadeko. Na dara te lla ando Ejipto, soke kote me ka cherav tutar iek baro foro.

⁴ Me ka llav tuia ando Ejipto, ta me ka cherav te iri tut, ta kana ka mere, o Jose ka phandel che akha.

⁵ Mapalal o Jakob llelotar katar o Berseba. E chaurre katar o Israel thode pe dade ta pe chaurren ta e diskinien ande bordona kai o Faraon bichaldaia te inllaren le.

⁶ Ta lie pe guruven ta sa so cherdea ande phuv katar o Kanaan, ta avile ando Ejipto, o Jakob ta sa leko porodo.

⁷ Ta sa leke chave chorra ta unukura lleletar lea ando Ejipto.

⁸ Gala si e anava katar e Israelitura kai llele ando Ejipto: O Jakob ta leke chave. O Ruben, o chavo o mai purano e Jakobeko.

⁹ E chave katar o Ruben: O Janok, o Falu, o Jesron ta o Karmi.

¹⁰ E chave katar o Simeon: O Jemuel, o Jamin, o Oad, o Jakin, o Sojar, ta o Saul kai saia o chavo katar iek kananea.

¹¹ E chave katar o Levi sea: O Gerson, o Koat ta o Merari.

¹² E chave katar o Juda: O Er, o Onan, o Sela, o Fares ta o Zeraj. O Er ta o Onan mulea ando Kanaan. E chave katar o Fares sea o Jesron ta o Jamul.

¹³ E chave katar o Isakar: O Tola, o Fuva, o Job ta o Simeron.

¹⁴ E chave katar o Zabulon: O Sered, o Elon ta o Iajelel.

¹⁵ Gala sea e chave kai e Lea dia e Jakobe kana sea ando Padan Aram, ta leki chorri e Dina. Sa leko porodo sea tranda ta trin llene, saurre katar leke chaurre ta katar leke chorra.

¹⁶ E chaurre katar o Gad sea: O Sifon, o Jagi, o Ezbon, o Suni, o Eri, o Arodi ta o Areli.

¹⁷ A e chaurre katar o Aser sea: O Imna, o Isua, o Isui, o Beria, ta e Zeraj lengi phei. E chaurre katar e Beria sea: O Jeber ta o Malkiel.

¹⁸ Gala si e chaurre kai e Zilpa dia e Jakobe, voi saia e sluga kai o Laban diaia pe chorra e Lea, ta lako porodo sea desusov llene.

¹⁹ E chaurre katar e Rakel e rromi e Jakobeki sea gala: O Jose ta o Benjamin.

²⁰ E chaurre kai o Jose avila le e Asenataia sea: O Manases ta o Efrain, kai biandile ando Ejipto. E Asenat saia e chorri katar o Potifera, o popo katar o On.

²¹ E chaurre katar o Benjamin sea: O Bela, o Beker, o Asbel, o Jera, o Naman, o Eji, o Ros, o Mupim, o Jupim ta o Ard.

²² Gava si o porodo kai likista katar e Rakel ta o Jakob, desustar llene.

²³ O chaurro katar o Dan saia: O Jusim.

²⁴ E chaurre katar o Neftali sea: O Iajsel, o Guni, o Ieser ta o Silem.

²⁵ Gala sea e chaurre kai e Bila dia e Jakobe. Voi saia e sluga kai o Laban diaia pe chorra e Rakela, ta lako porodo sea efta llene.

²⁶ Sa e llene kai avile lea ando Ejipto ta kai sea katar leki vicha, sea sovardes ta sov, bi te llindon e rromia leke chaurrenge.

²⁷ A e chaurre katar o Jose sea dui kai biandile ando Ejipto. Goleke sa e llene kai avile ando Ejipto sea eftavardes llene kai sea katar e familia e Jakobeki.

²⁸ O Jakob bichalda e Judae angla pete karing o Jose te phenel leke kai vou ka aduricharel le ando Gosen. Kana avile ando Gosen,

²⁹ o Jose phenda te lacharen leko bordon ta llelo te maladol pe dadea. Ta kana o Jose dikhla le abrasisarda le, ta thoda te rovel pe leke dume but vreme.

³⁰ Ondaka o Israel phenda e Joseeke: Akana kai dikhlem tut ta maladem tut llundo, akana sai merav.

³¹ O Jose phenda pe phlalenge ta i e llenenge kai sea katar e familia leke dadeki: Ka llav te dikhav e Faraono, ta ka phenav leke kai me phlal ta e familia me dadeki kai zivina ando Kanaan, avile te achen manchar,

³² ta kai ande pe bakren ta pe guruven ta sa so saia len, soke lengo rado si te arakhen e bakren ta te bariaren e guruven.

³³ Ta kana o Faraon ka ikharel tumen, ta kana ka puchel tumen ande so radin,

³⁴ ondaka tumen ka phenen leke kai iek rado si tumen, te arakhen bakren isto gia sar cherenale tumare purane. Gia sai ka achen te zivin ando Gosen, soke e ejipsiura nasti zivin e llenenchar kai arakhen bakren.