Кэздэто 44 - Biblia ande chib Romani

O taso e Joseeko

¹ Mapalal o Jose phenda pe slugake kai arakhela leko cher: Pher lliu e vreche gale llenenge so mai but sai inllarena, ta thov lenge love po mui katar suakoneki vrecha.

² Ta thov mo taso, o taso rupuno po mui katar e vrecha e mai terneki e lovenchar kai pochinda o lliu. Ondaka o sluga kai arakhela leko cher cherda gia sar phenda leke o Jose.

³ Kana llivosaola, o Jose mukla pe phlalen te llantar pe magarchenchar.

⁴ Ni likistea but dur katar o foro, kana o Jose phenda pe slugake kai arakhela leko cher: Lla pala gola llene, ta phen lenge gia kana ka malave len: ¿Soke pochinden mange o lachipe e bilachimaia? ¿Soke chorden o taso rupuno

⁵ kai mo gazda piel letar ta i dikhel letar so si te avelpe? ¡Tumen cherden baro bilachipe!

⁶ Kana o sluga kai arakhel o cher malada len, phenda lenge isto gola alava.

⁷ A von phende leke: ¿Soke phenel amaro gazda gola alava? ¡Amen nikada ni maka chera gola ezgode!

⁸ Te irisailam katar o Kanaan, irisailam te iri e love kai maladam ando mui katar amare vreche. ¿A pala so maka chora rup ta sunakai katar o cher che gazdako?

⁹ ¡Te merel vareko katar gala sluge, te malavena lete o taso, ta amen ka ava che sluge!

¹⁰ Ondaka o lleno kai arakhela o cher phenda: Ka cherdol gia sar phenen tumen, o lleno kai malavaia lete o taso ka avel mo sluga, a ogola sai ka llantar bi dosako.

¹¹ Ondaka suako lleno fuliarda oma pi vrecha llik kai e phuv ta putarde la.

¹² A o lleno kai arakhela o cher rodia ande suako vrecha, katar o purano llik kai o terno, ta malada o taso ande vrecha e Benjamineki.

¹³ Ondaka von chinde pe patave te dikhol lengi duk. Mapalal suako iek pale chidie pe pe magarchura ta irisaile ando foro.

¹⁴ Kana o Juda ta leke phlal avile kai o cher e Joseeko, o Jose saia ande po cher. Ondaka von die tenemava lligo ni dodisarde pe chikatea pe phuv.

¹⁵ A o Jose phenda lenge: ¿Soke cherden gava? ¿Ni llanen kai iek manus sargo me llanav te dikhav so ka avelpe mai angle?

¹⁶ Ondaka o Juda phenda leke: ¿So ka phena chuke akana? ¿Sar ka sikava kai amen ni sam dosale? O Del malada amen ando bilachipe. Akana amen sam che sluge e llenea kai malade lete o taso.

¹⁷ O Jose phenda: Me nikada ni ka cherav gaia ezgoda. Samo gua kai saia lete o taso ka avel mo sluga. Tumen llantar esmiro kai tumaro dad.

O Juda molilpe pala o Benjamin

¹⁸ Ondaka o Juda avilo pasa o Jose ta phenda leke: Me molivman chuke gazda, Muk te phenav chuke vareso po chorial. Cher mange gava sebapi, te na joliao manchar, soke tu san sargo o Faraon.

¹⁹ Gazda, tu puchlan amen dal saia amen dad o aver phlal,

²⁰ ta amen phendam chuke kai saia amen iek dad phuro ta iek phlal but terno kai biandilo kana amaro dad ia saia phuro. Ta i phendam chuke kai amaro dad but volil le, soke gua chaurro saia le iek phlal kai mulo ta samo vou achilo katar e chaurre leke dake.

²¹ Ondaka tu phendan amenge te ana le soke mangea te pinllare le.

²² Ta amen phendam chuke kai o chaurro nasti mukela pe dade, soke te mukela le, leko dad ka merel.

²³ Ta tu phendan amenge kai te na avela amenchar, tu ni ka muke te dikha tut.

²⁴ Ta kana irisailam kai mo dad, phendam leke sa so tu phendan amenge.

²⁵ Ondaka amaro dad phenda amenge: Irin tumen te chinen mai but lliu,

²⁶ a amen phendam leke: Amen nasti lla, te na avela amenchar amaro phlal o mai terno, soke vou te na llala amenchar amen nasti ka lla te dikha gole manuse.

²⁷ Ta amaro dad phenda amenge: Tumen llanen kai mi rromi dia man dui chaurre,

²⁸ iek lendar llelotar mandar, ta sar kotar kai ni dikhav le. Me llanav kai iek zivirinia divi chinda le pe kotora.

²⁹ Akana te inllarena i gale chaurre mandar, ta te nakhela leke varesavo bilachipe, tumen ka aven e dosale gava phuro te merela zalbatar.

³⁰ Goleke o zivoto me dadeko si phanglo po zivoto e chaurreko, a te na avela o chaurro manchar kana ka iriu man,

³¹ amaro dad te na dikhla le ka merel. Ondaka amen ka ava e dosale te merela zalbatar amaro dad ande po phuripe.

³² Me phendem me dadeke kai me ka achav lacho pala o chaurro, ta i phendem leke: Te na andem le chuke pale, me ka avav angla tu o dosalo ostade.

³³ Goleke me molivman chuke: Muk me te achav sargo cho sluga, ando than e chaurreko, ta muk vou te llaltar pe phlalenchar.

³⁴ Soke ¿sar ka iriu man kai mo dad, kana o chaurro ni ka avel manchar? Me ni kamam te dikhav pe kabor duk te nakhel mo dad.