Кэздэто 43 - Biblia ande chib Romani

Inllaren e Benjamine ando Ejipto

¹ Bari bok saia ande phuv,

² goleke kana o Jakob ta leke chaurre jale so achela len katar o lliu kai andea katar o Ejipto, o Jakob phenda lenge: Llan pale ta chinen lliu amenge.

³ A o Juda phenda leke: Gua lleno phenda amenge silnomaia: Te na anena kate tumare phlale e mai terne, te na aven te dikhen man.

⁴ A te bichalea amenchar amare phlale, amen ka lla ta ka china chuke lliu,

⁵ a te na mukea le, amen ni ka lla. Soke gua lleno phenda amenge: Te na anena kate tumare phlale e mai terne, te na aven te dikhen man.

⁶ Ondaka phenda o Israel: ¿Soke cherden mange pe kabor bilachipe? ¿Soke phenden gole lleneke kai saia tumen aver phlal?

⁷ A von phende leke: Soke vou puchela but cheres amende ta katar amari familia. Ta phenela: ¿Tumaro dad zivil? ¿Si tumen aver phlal? Ta amen phendam leke so vou puchela amen. ¿A sar amen maka llana kai vou ka phenel amenge: Anen tumare phlale?

⁸ O Juda phenda pe dadeke e Israeleke: Te mangaia te zivi, muk te avel o chaurro ta me ka arakhav le, ta gia ka llatar isto akana. Gia ni ka mera amen, ni tu, ta ni amare chaurre.

⁹ Me dav tut mo alav kai me ka arakhav le. Me achav lacho pala le te avila leke varesavo bilachipe. A te na iriva le chuke isto pe gava than, ka avav dosalo angla tu ostade.

¹⁰ Te na achilama pe gachin kate ¡Llelama ta i avilama dui droma!

¹¹ Ondaka lengo dad o Israel phenda lenge: Te trubula te cheren le gia, cheren le. Inllaren ande tumare vreche gole lleneke o mai lachipe katar e phuv, cherricha balsamo, aullin, meriso, mirra, akhora ta almendre.

¹² Ta inllaren dui droma mai but love, ta inllaren ande tumare va e love kai maladen ande tumare vreche, sai avelpe kai von kojadile.

¹³ Llan ta len tumare phlale, ta llan pale te dikhen gole llene.

¹⁴ Ta o Del kai si le sa e zor te avel leke zao tumendar angla gua lleno, ta te mukliarel tumare phlale ta i e Benjamine. A me te si te achav bi chaurrengo, ¡ka achav bi chaurrengo!

¹⁵ Ondaka inllarde so saia te den, ta inllarde dui droma mai but love, ta e Bejamine. Ta lleletar ando Ejipto, ta avile angla o Jose.

¹⁶ Kana o Jose dikhla kai o Bejamin aviloa lenchar, phenda e lleneke kai arakhela leko cher: Inllar gale llenen ande mo cher, ta mundar iekhe guruve ta lachar iek jape, soke von ka jan manchar ando dopas e lliveseko.

¹⁷ Ta o lleno kai arakhela leko cher cherda gia sar o Jose phendaia leke te cherel, ta isto vou inllarda len kai o cher e Joseeko.

¹⁸ Ondaka von daraile kana inllarde len kai o cher e Joseeko, ta phenena: Pala e love kai irisarde amenge e purvo drom si kai akana ande amen kate, te sai phanden amen ta te cheren amen te radi lenge sargo sluge, amen ta i amare zivirinie.

¹⁹ Goleke kana avile kai o udar katar o cher, avile pasa o lleno kai arakhela o cher te den orba lea,

²⁰ ta phende leke: ¡Ioi gazda! Ogoia drom kana avilam, de istina, avilam te china lliu.

²¹ Ta kana avilam kote kai saia te nakha e riat, putardam amare vreche, ta po mui katar e vreche, sea suakoneke love, llik kai iek tolari. Ta akana andam e love te iri len,

²² ta andam ios love te sai china lliu. A amen ni llana ko thodaia amare love ande amare vreche.

²³ O lleno kai arakhela o cher phenda lenge: Achen esmiro ta na daran soke tumaro Del ta o Del tumare dadeko si kai thoda gala love ande tumare vreche, soke me sema kai liema tumare love kana pochinden. Ta ikanda e Simeono, ta anda le lende.

²⁴ Mapalal inllarda saurren ando cher e Joseeko, ta dia len pai te jalaven pe porrne, ta dia te jan lenge magarchen.

²⁵ Ta von lacharde so andea te den ta aduricharena te avel o Jose ando dopas e lliveseko, soke asundea kai kote saia te jan.

²⁶ Kana o Jose avilo kai o cher, von die le so andea, ta die tenemava lligo ni dodisarde pe chikatea pe phuv.

²⁷ O Jose puchla len sar sea, ta phenda lenge: ¿Sar si tumaro dad, o phuro goletar kai diena mange orba? ¿Llundo si?

²⁸ Von die tenemava ta phende leke: Amaro dad cho sluga, si llundo.

²⁹ O Jose dikhla truial, ta dikhla e Benjamine leko phlal datar ta i dadetar, ta phenda: ¿Si gava tumaro phlal o mai terno, kai diena mange orba letar? ¡O Del te avel leke zao tutar bre chaurrea!

³⁰ O Jose pherdilo zao kana dikhla pe phlale, ta sigarda te del ande pi soba, ta kote thodape te rovel.

³¹ Kana achadape te rovel, jalada po mui, likisto ta phenda: ¡Thoven o jape!

³² E Joseeke thode leke te jal pe iek sinia, a e chave e Jakobeke pe aver, ta pe aver sinia thode e ejipsionenge kai jana lea, soke e ejipsiure nasti jan e llenenchar kai si ebreura.

³³ E phlal katar o Jose besle kana o Jose phenda le, ta besle prema e bursa kai saia lenge, katar o mai purano llik kai o mai terno, ta von but chudinape ta dikhena iek pe aver.

³⁴ Ta o Jose dia len te jan katar piri sinia, ta e Benjamine thoda panch droma mai but neko ogolen. Ta pile lea ta but beselisaile.