Кэздэто 42 - Biblia ande chib Romani

E phlal katar o Jose llan ando Ejipto

¹ Kana o Jakob llangla kai ando o Ejipto saia lliu, phenda pe chaurrenge: ¿Soke dikhen iek pe aver?

² Me asundem kai ando Ejipto si lliu, llan incha ta chinen amenge te sai zivi ta te na mera.

³ Ondaka des phlal e Joseeke llele ando Ejipto te chinen lliu.

⁴ A o Jakob ni mukla te llal o Benjamin, o phlal e Joseeko, soke darala te na avel varesavi zatrania pe lete.

⁵ Llele e chaurre katar o Israel te chinen ta i llana aver llene, soke ande phuv katar o Kanaan saia but bari bok.

⁶ O Jose gazdarila ande phuv ta vou bichinela o lliu e llenenge kai avena katar suako rig. Kana avile leke phlal, die tenemava angla le lligo ni dotisarde pe chikatea e phuv.

⁷ A o Jose kana dikhla pe phlalen pinllarda len, a vou cherda sargo kana ni pinllarela len, ta dia orba lenchar silnomaia ta phenda lenge: ¡Tumen! ¿Katar aven? Von phende leke: Ava katar o Kanaan te china lliu.

⁸ O Jose pinllarda pe phlalen, a von ni pinllarde le.

⁹ Ondaka o Jose diape golli katar e sune kai dikhlaia lendar, ta phenda lenge: Tumen sen amare dusmanura ta avilen te dikhen sar ka zatrin amare foro.

¹⁰ Von phende leke: Iok gazda, che sluge avile te chinen lliu.

¹¹ Sa amen sam chaurre iekhe dadeke, amen sam llene lache. Nikada ni cherdam gua bilachipe, amen ni avilam te dikha sar ka mara amen tumenchar.

¹² A o Jose pale phenda lenge: Tumen aven te dikhen sar ka zatrin amare foro.

¹³ A von phende leke: Che sluge sam desudui phlal, chave iekhe dadeke ta zivi ando Kanaan. Amaro phlal mai terno achilo amare dadea, ta o gua phlal inai amenchar.

¹⁴ A o Jose pale phenda lenge: Gia sar phendem tumenge, tumen avilen te dikhen sar ka zatrin amare foro.

¹⁵ Ka chera gaia ezgoda te sai zumava tumen: Jav tumenge sovel po Faraon kai ni ka liken katar lligo ni ka avel tumaro phlal o mai terno.

¹⁶ Te llal iek tumendar te anel le. A ogola ka achen phangle. Ta gia ka dikha o si o chachipe so phendem. ¡A jav tumenge sovel po Faraon kai tumen avilen te dikhen sar ka maren tumen amenchar!

¹⁷ Ondaka o Jose thoda len ande rubie trin llive,

¹⁸ a pala e trin llive, o Jose phenda lenge: Me darav e Devletar. Cheren gaia ezgoda ta ka zivin:

¹⁹ Te avena chache, muken ande rubie iekhe katar tumare phlal, ta ogola te llan ta te inllaren lliu te jan tumare familie.

²⁰ Ta anen mange tumare phlale e mai terne, ta gia ka dikha dal phenden o chachipe. Ta ni ka meren. A von phende leke: Gia ka cherale.

²¹ A von phenena iek avereke: Chachimaia cherdam o bilachipe amare phlalea kana molilape amenge te avel amenge zao letar, a amen ni asundam le. Goleke akana avila pe amende gaia duk.

²² Ondaka o Ruben phenda lenge: Me phenden tumenge te na cheren nisavo bilachipe e chaurreke, a tumen ni thoden mange sama ta akana, morabi te phena so avilape letar.

²³ Von ni llanena kai o Jose acharela lenge, soke o Jose dela lenchar orba ande aver chib ta iek lleno phenela lenge te sai von acharen.

²⁴ A o Jose durailo lendar, ta thoda te rovel. Kana irisailo kote kai sea von, dia orba lenchar ta lia maskar lende e Simeono, ta cherda te phanden le angla sa.

²⁵ Mapalal phenda te pheren lliu lenge vreche ta te irin suakone lleneke love ta te thoven len ande lenge vreche, ta te den len jape e dromeke. Ta gia cherde le.

²⁶ Ondaka von thode o lliu upral pe pe magarchura, ta lleletar kotar.

²⁷ Kana avile kai o than kote kai saia te nakhen e riat, iek lendar putarda pi vrecha te del te jal pe magarcho, ta dikhla kai leke love sea kote po mui e vrechako.

²⁸ Ondaka phenda pe phlalenge: ¡Dikhen irisarde me love kate si ande mi vrecha! Saurre daraile zurale, ta izdrana daratar ta phenena iek avereke: ¿So cherda amenge o Del?

²⁹ Kana avile ando Kanaan, phende pe dadeke e Jakobeke sa so nakhle ta phende leke:

³⁰ O Lleno kai gazdaril ande goia phuv dia orba amenchar silnomaia, ta phenda kai amen llelam ande leki phuv te dikha sar ka mara amen lenchar.

³¹ A amen phendam leke kai amen sam llene lache ta kai nikada ni llelam te dikha sar ka mara amen lenchar,

³² ta kai sam desudui phlal iekhe dadeke, ta kai iek inai amenchar, ta kai o mai terno achilo tuia ando Kanaan.

³³ Ondaka gua lleno phenda amenge: Gale ezgodaia kai ka cherav ka llanav dal tumen sen llene lache. Muken kate manchar iekhe katar tumare phlal, ta llan te muken nesavo lliu kai tumare familie,

³⁴ ta anen mange tumare phlale e mai terne. Ta gia me ka llanav kai tumen sen llene lache ta kai ni avilen te dikhen sar ka maren tumen amenchar, ta ondaka ka mukav tumare phlale, ta tumen sai ka llan te phiren ande gaia phuv bi darako.

³⁵ A kana chucharde pe vreche, ta dikhle kai ande suako vrecha sea lenge love von daraile ta i lengo dad.

³⁶ Ondaka o Jakob phenda lenge: Tumen ka muken man bi chaurrengo. O Jose inai amenchar ta ni o Simeon. ¡Ta akana ka len mandar e Benjamine! Ta suako drom me achav ios mai dukhado.

³⁷ Ondaka o Ruben phenda pe dadeke: Muk me te arakhav e Benjamine, ta me ka anav le pale. A te na anava le, mundar me duie chaurren.

³⁸ A o Jakob phenda: Mo chaurro ni ka llal tumenchar. Leko phlal o Jose mulo ta samo vou achel. A te nakhela leke varesavo bilachipe po drom kai llan, tumen ka aven e dosale gava phuro te merel tristomaia.