Кэздэто 40 - Biblia ande chib Romani

O Jose sikavel so phenen dui sune

¹ Kana nakhlo nesavo vreme kotar, o lleno kai thovela o jape e charoke ta o lleno kai cherela o marrno e charoke, cherde iek bilachipe pe gazdake o charo katar o Ejipto.

² Ta o Faraon o charo jolailo gale duie llenenchar, po gazda katar e llene kai thovena e sinia e charoke, ta po gazda katar e llene kai cherena o marrno e charoke,

³ ta inllarda len phangle kai o cher e kapitaneko kai saia ande rubie, kote kai i o Jose saia phanglo.

⁴ Ta o kapitan katar e rubie thoda e Josee te arakhel len, ta von achile but llivesa ande rubie.

⁵ Ta isto ande iek riat e dui phangle dikhle iek suno, o lleno kai thovela e sinia angla o charo ta o lleno kai cherela o marrno e charoke, ta suako suno phenela vareso.

⁶ Thiarinako rano, kana o Jose avilo lende, dikhla len but brigime,

⁷ goleke puchla len: ¿Soke allive tumaro mui si gia brigime?

⁸ Von phende leke: Dikhlam iek suno ta inai niko te phenel amenge so phenel gua suno. Ondaka o Jose phenda lenge: Phenen mange e sune ta o Del ka sikavel amenge so phenen gola sune.

⁹ Ondaka o gazda katar e llene kai thovena e sinia e charoke phenda o suno e Joseeke gale alavenchar: Ande mo suno dikhava angla ma iek kas drakhako,

¹⁰ kai saia le trin krangura ta gola krangura dena lulunlla ta e lulunlla cherdona drakha resle,

¹¹ ta kai o taso e charoko saia ande me va, ta me lava e drakha ta chedova len ando taso. Ta mapalal isto me dava o taso ande va e charoke.

¹² Ondaka o Jose phenda leke: Gava si so phenel o suno kai dikhlan: E trin krangura si trin llive,

¹³ kana ka nakhen trin llive o charo ka chinel chuke kris, ta ka thovel tut pale ande cho rado, ta tu ka de pale o taso kai o Faraon, gia sar chereale omanglal.

¹⁴ Ta kana ka avenpe gala ezgode de tut golli mandar, ta cher mange gava sebapi, de orba e Faraonoke cheres ma te sai ikanel man katar, te avel chuke zalba mandar.

¹⁵ Me sem ebreo ta ande man kate pe zor. Me ni cherdem nisavo bilachipe te sai thoven man kate ande rubie.

¹⁶ Kana o gazda katar e llene kai cheren o marrno e charoke dikhla kai dia orba sukar katar o suno, phenda leke: I me dikhlem iek suno kai saia man trin kotariche parrne upral pe mo soro.

¹⁷ E kotaricha kai saia mai upre, ande late saia but sukar jape ta but lache marrne cherde e Faraoneke, a e chiriklia avena te jan katar e kotaricha kai saia pe mo soro.

¹⁸ Ondaka o Jose phenda leke: O suno kai dikhlan sikavel gaia ezgoda: E trin kotariche si trin llive,

¹⁹ ta katar trin llive ios o Faraon ka chinel chi kris ta ka cherel te unblaven tut pe iek kas, ta e chiriklia ka jan cho mas.

²⁰ Pala e trin llive o charo nakhela iek burs ios ande po zivoto, ta cherda iek baro jape e llenenge kai radina leke. Ta o Faraon phenda te ikanen e gazda katar e llene kai thovena e sinia angla o charo, ta i te ikanen e gazda katar e llene kai cherena o marrno e charoke, ta phenda te anen len angla sa e llene kai vou ikhardaia pe gua jape.

²¹ Ta cherda gole llene kai gazdarila pe llene kai thovena e sinia, te thoven le pale pe po rado, ta gua lleno pale anela o taso kai o charo gia sar cherelale omanglal,

²² Ta phenda te umblaven gole kai gazdarila pe llene kai cheren o marrno, ta cherde le isto gia sar o Jose phendaia leke so phenela o suno.

²³ A o gazda katar e llene kai thovena e sinia e charoke, ni diape golli katar o Jose, ta bristailo letar.