Кэздэто 39 - Biblia ande chib Romani

O Jose ta e rromi katar o Potifar

¹ Kana e Josee inllarde le ando Ejipto, iek sudo ejipsio kai ikhardola Potifar, chinda le katar e ismaelitura gola kai inllardea le ando Ejipto.

² A o Del saia e Joseea, ta llela leke but sukar ando cher katar o ejipsio leko gazda.

³ Ta leko gazda acharda kai o Del saia e Joseea, ta kai goleke e Joseeke llala gia sukar pe suako ezgoda.

⁴ O Jose pela drago leke gazdake, ta goleke thoda ande leke va po cher ta sa so saia le.

⁵ Ta sar kana o Potifar thoda ande leke va po cher ta sa so saia le, o Del blagosisarda o cher e ejipsioko ta i leke umalia.

⁶ Kana mukla sa pe ezgode ande va e Joseeke o Potifar ni brigilape katar niso, samo te jal. A o Jose saia but sukar.

⁷ Avilape kai kana nakhlo nesavo vreme, e rromi katar leko gazda thoda pe akha pe lete, ta phenda leke: Sov manchar.

⁸ A o Jose ni kamla, ta phenda lake: Dik, mo gazda thoda tala mo va sa so si le ta sar kai sem kate, vou ni brigilpe katar niso.

⁹ Ta ande gava cher inai niko mai baro mandar, ta suako ezgoda mukla tala mo va. A tu san leki rromi, ta me te sovav tuia gua avela iek bilachipe but baro ta e Devleke ni avela drago me te cherav gava bilachipe.

¹⁰ Ta voi suako llive phenela leke te sovel laia, a vou ni thovela lake sama.

¹¹ A iek llive o Jose dia ando cher te cherel po rado, ta sar ni saia niko ando cher,

¹² voi istarda le katar e patave ta phenda leke: Sov manchar. Ondaka vou naslo prastindo ta mukla pe patave ande lake va.

¹³ Kana voi dikhla kai naslo avri ta kai mukla pe patave ande lake va,

¹⁴ ikharda e slugen katar o cher ta phenda lenge: Dikhen, mo rrom anda iek ebreo kai akana marel espurnia amendar. Avilo te dikhel man ta mangela te sovel manchar, a me urkisardem but zurale,

¹⁵ ta kana asunda kai urkinsardem sa me zoriaia likisto prastindo ta mukla pe patave.

¹⁶ Mapalal voi guruda leke patave lligo ni avilo lako rrom ando cher.

¹⁷ Ondaka voi phenda leke isto gola alava: O sluga ebreo kai andan amenge dia ande mi soba ta mangela te del man ando lallao.

¹⁸ A kana me urkinsardem sa me zoriaia, vou likisto prastindo ta mukla kate pe patave.

¹⁹ Gia cherda cho sluga manchar. Kana o Potifar asunda gala alava kai phenela leke leki rromi, but jolailo.

²⁰ Ondaka istarda e Josee ta phenda te thoven le ande rubie kote kai sea e phangle e charoke, ta kote achilo phanglo.

²¹ A o Del saia e Joseea ta sikavela leke po volipe, soke cherda te perel drago e lleneke kai gazdarila ande rubie.

²² Ta o gazda katar e rubie dia ande va e Joseeke te arakhel sa e phanglen kai sea ande goia rubie, ta vou phenela sa so saia te cherdol andre.

²³ Ta o gazda katar e rubie ni saia soke te brigilpe katar e ezgode kai cherela o Jose, soke o Del saia e Joseea ta sogo cherela o Jose o Del cherela te likel leke sa sukar.