Кэздэто 33 - Biblia ande chib Romani

O Jakob ta o Esau lachardon

¹ Kana o Jakob dikhla kai o Esau avela star stotine llenenchar, fulada e minonen maskar e Lea, ta e Rakel ta e dui sluge diskinie.

² Mai anglal thoda e sluge diskinie pe minonenchar, mapalal thoda e Lea pe minonenchar, ta mapalal thoda e Rakela ta e Josee.

³ Mapalal llelo mai anglal lendar, ta bangilo lligo ni reslo te dodil e phuv pe chikatea, ta gua cherda le efta droma lligo ni avilo kai po phlal.

⁴ A o Esau prastio kai po phlal ta abrasisarda le ta chumidia le, ta e dui thode te roven.

⁵ Mapalal o Esau dikhla e diskinien ta e minonen ta phenda: A gala ¿ko si? O Jakob phenda: Gala si e minone kai o Del dia che sluga.

⁶ Ondaka e sluge diskinie ta lenge chaurre avile ta bangile llik pe phuv,

⁷ mapalal avili e Lea pe chaurrenchar, ta bangile sargo ogola, ta mapalal avilo o Jose ta e Rakel ta i von bangile.

⁸ Ondaka o Esau phenda: ¿A so misli te chere sa gale e stokenchar kai maladem? O Jakob phenda: Te sai achav lacho tuia.

⁹ O Esau phenda: Na murrno phlal, man si but. Te achel tuia so si chiro.

¹⁰ A o Jakob phenda: Na, moliv man chuke. Te dikhlan pe ma lachimaia, le so me mangav te dav tut, soke kana dikhlem cho mui, mange avila sargo kana dikhlem o mui e Devleko, soke lian man lachimaia.

¹¹ Moliv man chuke, le so andem chuke soke o Del cherda man barvalo, ta niso ni trubul man. Pe gachin mangla o Jakob te lel so andaia leke, kai o Esau lia letar so anda,

¹² ta phenda leke: Aitar katar, me ka llav angla tu.

¹³ A o Jakob phenda: Gazda, tu llane kai e minone inai len zor, ta morabi te misliv man ande bakre ta ande guruva kai si len telchura, ta te chinile but ande iek llive, sai meren sa e bakre.

¹⁴ Mai sukar lla tu mai angle katar cho sluga, a me ka llav sa poloke, gia sar ka phiren e zivirinie angla ma ta prema sar phiren e minone lligo ni ka maladivav tuia ando Seir.

¹⁵ A o Esau phenda: Ka mukav chuke akana nesave llenen kai aven manchar. A o Jakob phenda: ¡Na, moliv man chuke! ¿Soke te chere gava? Dosta mange kai avilan lacho manchar.

¹⁶ Ta isto gua llive, o Esau irisailo ando Seir.

¹⁷ A o Jakob llelotar ando Sukot, ta cherda peke iek cher, ta iek cherorra patrenchar e zivirinienge. Goleke, gua than ikharda le Sukot.

¹⁸ Kana o Jakob irisailo katar o Padam Aram avilo sasto ta braduime ando foro kai ikhardol Sikem, kai si ande phuv katar o Kanaan, ta inzarda pi chara angla o foro.

¹⁹ Ta chinda iek kotor katar e umal, ta kote thoda pi chara, ta goia umal dia lake stotina tolaria. Chindala katar e chaurre katar o Jamor o dad katar o Siken.

²⁰ Ta kote vazdia iek altar, ta ikharda le El Eloe Israel.