Кэздэто 29 - Biblia ande chib Romani

O Jakob ando Jaran

¹ O Jakob pale thoda te llal pe po drom ta llelo kai e llene kai zivin pe rig katar likel o kham.

² Ta ande goia umal dikhla iek bunari ta trin stoke bakrenge kai sea pasa o bunari, soke katar gua bunari piena e zivirinie, ta upral pe lete saia iek barr.

³ Ta chidena sa e stoke, ta ikanena o barr kai saia upral po bunari te sai den te pien e bakren ta mapalal thovena pale o barr upral po bunari:

⁴ Ondaka o Jakob phenda e chobanonenge: Phlalalen, ¿katar sen tumen? Von phende leke: Amen sam katar o Jaran.

⁵ O Jakob phenda lenge: ¿Pinllaren tumen e Labane, o chaurro katar o Najor? Von phende: Ea, pinllara le.

⁶ O Jakob phenda lenge: ¿Sar si sastimaia? E chobanura phende: Ea, vou si sasto. Dik kote avel leki chorri e Rakel pe bakrenchar.

⁷ Ondaka o Jakob phenda lenge: Ollivesea si ta rano te phanden e bakren, ¿soke ni den len pai ta inllaren len te jan char?

⁸ Von phende leke: Nasti cherale, morabi te adurichara te chidiniaon sa e stoke ta e chobanura te ikanen o barr kai si upral po bunari, te sai da te pien e bakren.

⁹ So vou dela orba lenchar, e Rakel avili pe dadeke bakrenchar, soke voi saia kai arakhela len.

¹⁰ Ta avilape kai samo kana o Jakob dikhla e Rebeka, e chorri katar o Laban, o phlal katar leki dei ta dikhla e bakre katar o Laban, ikanda o barr kai saia upral po bunari, ta dia te pien e bakren.

¹¹ Mapalal chumidia e Rakela ta thoda te rovel.

¹² Ta kana o Jakob phenda lake kai vou saia o phlal lake dadeko ta kai saia chavo katar e Rakel, ondaka e Rakel llelitar prastindo ta phenda pe dadeke sa so nakhlaia.

¹³ Kana o Laban asunda cheres o Jakob o chaurro leke pheako, llelo prastindo te lel le ta abrasisarda le ta chumidia le ta inllarda le kai po cher, ta mapalal o Jakob phenda leke sa so nakhlaia.

¹⁴ A o Laban phenda leke: Chachimaia tu san iek katar mo rat, ta o Jakob achilo lea iek chon.

O Jakob radil pala e Rakel ta pala e Lea

¹⁵ Ondaka o Laban phenda e Jakobeke: Tu ni ka radi mange samo gia, samo soke san mo sinoucho. Phen mange pe gachin mange te pochinav chuke.

¹⁶ O Laban saia le dui chorra, e mai purani ikhardola Lea, a e mai terni ikhardola Rakel.

¹⁷ E Lea saia la iek akha sukar, a e Rakel saia but sukar.

¹⁸ A o Jakob volila e Rakela, ta phenda: Pala chi chorri e Rakel e mai terni, ka radiu chuke efta burs.

¹⁹ Ondaka o Laban phenda: Mai sukar te dav la chuke neko avere lleneke, achi manchar.

²⁰ Ta gia o Jakob radisarda e Labaneke efta burs pala e Rakel, a Jakobeke ni saia leke but vreme soke but volila la.

²¹ Ta kana nakhle e efta burs, o Jakob phenda e Labaneke: De man akana e Rakela te ziniuman laia soke getosailo o vreme kai phendem te radiu chuke te sai laula.

²² Ondaka o Laban chidia sa e llenen katar gua than, ta vazdia o biav.

²³ Ta kana peli e riat o Laban inllarda kai o Jakob pe chorra e Lea, ta o Jakob sovto laia.

²⁴ Ta o Laban dia pe chorra iek sluga kai ikhardola Zilpa, te sai pomozil la.

²⁵ Thiarinako rano llangla o Jakob kai sovtoia e Leaia, ta phenda e Labaneke: ¿So si gava kai cherdan mange? ¿Ni ratisardem chuke pala e Rakel? ¿A soke kojadan man?

²⁶ A o Laban phenda leke: Kate ni cherdol gia, ni delpe e mai terni te zinilpe mai anglal neko e mai purani.

²⁷ Akana achi te nakhen e efta llive katar o biav e Leako, ta mapalal ka da tut e Rakela, te achea manchar po alav kai ka radi mange efta burs ios.

²⁸ O Jakob mangla, ta kana getosaile e efta llive katar o biav e Leako, o Laban dia le pe chorra e Rakela te avel leki rromi.

²⁹ Ta o Laban dia i e Rakela iek sluga piri kai ikhardola Bila, te sai pomozil la.

³⁰ O Jakob sovto i e Rakelaia, ta volisarda la ios mai but neko e Lea. Ta o Jakob saia te radil efta burs ios e Labaneke.

E chaurre e Jakobeke

³¹ Kana o Del dikhla kai o Jakob ni thovela sama e Leake, cherda te aven la minone. A e Rakela nasti avena la minone.

³² E Lea achili khamni ta maladila lake iek minono, ta thoda leko anav Ruben, soke phenda: O Del dikhla mi zalba, akana mo rrom ka volil man.

³³ Mapalal avila la aver minono, kai thoda leko anav Simeon, ondaka phenda: O Del dikhla kai ni thovena mange sama, goleke dia man aver minono.

³⁴ Mapalal avila la aver chaurro, ta thoda leko anav Levi, soke phenda: Akana mo rrom ka avel mai but manchar, soke diem le trin chaurre.

³⁵ Ta mapalal e Lea avila la aver minono, ta thoda leko anav Juda, soke phenda: Akana ka blagosiv e Devle. Ta mapalal katar gala ezgode ni avila la ios minone.