Кэздэто 26 - Biblia ande chib Romani

O Isaak llaltar ando Gerar

¹ Ande gua vreme ni saia so te jan ande sa goia phuv, isto gia sar saia ande llivesa e Abraameke. Goleke o Isaak llelotar ando Gerar, kote kai zivila o Abimelek, o charo katar e filisteura.

² Ta kote o Del sikadilo leke, ta phenda leke: Na lla ando Ejipto. Achi ande phuv kai me ka phenav chuke,

³ ta zivisar ande gaia phuv. Me ka avav tuia ta ka blagosiv tut, soke tut ta che porodo ka dav sa gala phuvia. Gia ka cherav e alava kai phendem che dadeke e Abraameke.

⁴ Ka cherav cho porodo te avel pe gachin sargo e cheraia kai si ando miloso, ta i ka dav len sa gala phuvia, ta sa o sueto e phuviako ka aven blagosime katar cho porodo,

⁵ soke o Abraam asunda mo avazi ta cherda sa so phendem leke, ta kandia sa me alava ta me zakonura.

⁶ Ondaka o Isaak achilo te zivil ando Gerar,

⁷ ta kana e llene kai zivina kote puchle le cheres e Rebeka, o Isaak darailo te phenel lenge kai voi saia leke rromi, ta phenda lenge kai voi saia leki phiorri, soke e Rebeka saia gia sukar kai o Isaak mislisailo kai e llene kotar ka mundarel le cheres late.

⁸ Nakhlo o vreme ta vou achilo kote. A iek llive kana o Abimelek, o charo katar e filisteura, dikhela katar e penllerava, dikhla kai o Isaak malmila pe rromia e Rebeka.

⁹ Ondaka bichalda te ikharen le, ta phenda leke: Akana llanav kai voi si chi rromi, ¿A soke phendan kai voi si chi phiorri? A o Isaak phenda leke: Me mislisailem kai ka mundaren man cheres late.

¹⁰ A o Abimelek phenda leke: ¿Soke cherdan amenge gava? Cherricha mai but ta vareko katar o foro sai sovtoia che rromiaia, ta tu sai andana pe amende o bilachipe.

¹¹ Ondaka o Abimelek dia pe po foro ta phenda: Vareko te cherela varesavo bilachipe gale lleneke o leke rromiake, ka merel.

¹² Ande gua burs o Isaak thoda ande phuv simiche ta chidia stotina droma mai but neko so thodaia ande phuv, soke o Del blagosisarda le.

¹³ Gia o Isaak cherdilo but barvalo ta avilale but ezgode.

¹⁴ Sea le pe gachin bakre, guruva, ta pegachin sluge, kai e filisteura jolaile lea.

¹⁵ Ta kana leko dad o Abraam zivila, leke sluge e Abraameke putardea bunaria, a mapalal e filisteura phanglea len ta pherdea len chik.

¹⁶ Ondaka o Abimelek phenda e Isaakeke: Llatar katar, soke cherdilan mai barvalo neko amen.

¹⁷ Ta o Isaak llelotar kotar, ta inzarda pi chara ande bari umal katar o Gerar, ta kote achilo te zivil.

¹⁸ Ta putarda pale e bunaria paieke kai putardea kana leko dad zivila ta kai e filisteura phanglea kana leko dad muloa, ta thoda lenge isto gola anava kai thodaia lenge leko dad.

¹⁹ A kana e sluge e Isaakeke anade ande goia bari umal, malade iek bunari kai likel pai llundo.

²⁰ E chobanura kai arakhena e bakren ando Gerar mardepe e chobanonenchar kai arakhena e bakre e Isaakeke, ta phenena: Gava pai si amaro. Goleke o Isaak ikharda gua pai Maripe, soke mardeape pala o pai.

²¹ Mapalal leke sluge putarde aver bunari, ta i pala gua bunari mardepe, goleke o Isaak thoda o anav katar gua bunari Sitna.

²² O Isaak llelotar dur kotar, ta putarda aver bunari, ta sar ni mardepe pala le, thoda leko anav Rejobot, soke phenda: Akana o Del mukla amen te llal amenge sukar ande gaia phuv.

²³ Ta kotar o Isaak llelotar ando Berseba.

²⁴ Ta ande goia riat o Del sikadilo leke ta phenda leke: Me sem o Del che dadeko e Abraameko. Na dara, me sem tuia. Cheres mo sluga o Abraam ka blagosiv tut ta ka bariarav but cho porodo.

²⁵ Ondaka o Isaak vazdia iek altar kote ta balagosisarda o anav e Devleko, ta kote vazdia pi chara ta leke sluge putarde iek bunari ande gua than.

O Isaak ta o Abimelek achen pe iek orba

²⁶ Iek llive o Abimelek avilo katar o Gerar te del orba e Isaakea. Llana lea leko amal o Ausat, ta o Fikol, kai saia o kapitan katar leke boñikura.

²⁷ A o Isaak phenda lenge: Tumen murzin pe mande, ta dradien man katar tumari phuv, ¿a pala so aven te dikhen man?

²⁸ Von phende leke: Amen dikhlam kai o Del si tuia, ta mislisailam te acha tuia pe iek orba. Ta gaia si e orba:

²⁹ Tu te na chere amenge nisavo bilachipe, soke amen ni cherdamle chuke. So amen cherdam chuke si o lachipe ta bichaldam tut ande pas, ta akana o Del blagosil tut.

³⁰ Ondaka o Isaak thoda lenge bari sinia, ta von jale ta pile.

³¹ Thiarinako rano ustile ta jale sovel iek avereke. Mapalal o Isaak mukla len te llantar, ta von lleletar ande pas lea.

³² Isto ande gua llive, e sluge e Isaakeke avile te den le e viasta kai malade pai ando bunari kai putarena.

³³ O Isaak thoda o anav katar gua bunari Seba. Goleke gua foro llik akana ikhardol Berseba.

³⁴ Kana o Esau saia leke saranda burs, zinisailo e Juditaia chorri katar o Beeri o jitita, ta i zinisailo e Basemataia, kai saia chorri katar aver jitita kai ikhardola Elon.

³⁵ Gala dui diskinie tristosarde o zivoto e Isaakeko ta e Rebekako.