Кэздэто 23 - Biblia ande chib Romani

O meripe e Sarako

¹ E Sara zivisarda stotina ta bis ta efta burs,

² ta muli ando Kiriat Arba, kai si o foro katar o Jebron, ande phuv katar o Kanaan. Ta avilo kote o Abraam zalosno te rovel pala o meripe e Sarako.

³ Ta kana o Abraam achilo te rovel pala e Sara, likisto kotar ta llelo kai e jititura, ta phenda lenge:

⁴ Me maskar tumende sem iek lleno kai avel katar aver phuv, bichinen mange iek than limoreke te prajou me rromia.

⁵ A e jititura phende leke:

⁶ Asun amen amaro gazda, tu san maskar amende iek lleno ezvirime e Devletar. Prajosar che rromia ande mai lache katar amare limoria, soke niko amendar ni ka phenel chuke na ande mo limori, ta niko ni ka achavel tut te prajo che rromia.

⁷ O Abraam ustilo ta bangilo angla o foro katar goia phuv angla e llene kai ikhardon jititura,

⁸ ta phenda lenge: Te avela de istina kai tumen mangen te prajou me rromia kate, llan kai o Efron, chaurro katar o Sojar ta phenen leke kai me mangav letar

⁹ te bichinel mange o putardipe kai si ande pechina kai si le ande Makpela, kai si ande iek than katar leke umalaia. Te mangel mange so mol, me ka pochinavle, ta gia ka avel man iek limori maskar tumende.

¹⁰ Ta sar o Efron saia kote maskar e jititura, dia orba e Abraamea te sai asunen le sa leke llene ta i gola kai nakhena katar o udar e foroko, ta phenda leke:

¹¹ Na murno gazda, molivman chuke, me dav tut gaia umal ta o putardipe kai si ande pechina, prajosar kote che rromia.

¹² Ondaka o Abraam bangilo angla o foro katar goia phuv,

¹³ ta phenda angla o Efron ta angla sa e llene: ¡Cher mange iek sebapi, asun man! Moliv man chuke, le gala love pala e umal ta mapalal ka prajou kote me rromia.

¹⁴ Ondaka o Efron phenda leke:

¹⁵ Asun man murno gazda: E umal mol la star stotine tolaria rupune. Gava inai bari ezgoda maskar amende, goleke lla ta prajosar che rromia.

¹⁶ O Abraam mangla te pochinel so mangla leke o Efron angla e jititura, ta pochinda leke gia sar sea sikade te cheren le e llene kai radin.

¹⁷ Gia si sar e umal katar o Efron kai saia ande Makpela, kai si pe rik katar likel o kham katar o Mamre, e umal ta o putardipe kai si ande pechina, ta sa e kasta kai sea andre ande umal,

¹⁸ nakhle te aven e Abraameke. E jititura sea kote pe orba ta sa e llene kai nakhena katar o udar e foroko.

¹⁹ Mapalal katar gava, o Abraam prajosarda e Sara ando putardipe kai saia ande pechina ande umal katar e Makpela, katar likel o kham katar o Mamre, kai ikharenle Jebron, kai si ando Kanaan.

²⁰ Gia si sar avila leki e umal ta o putardipe kai si ande pechina, kana bichinde leke goia umal e jititura te avel kote limori.