Кэздэто 22 - Biblia ande chib Romani

O Del zumavel o pachape e Abraameko

¹ Kana nakhle gala ezgode, o Del zumada o pachape e Abraameko ta ikharda le, a o Abraam phenda leke: Kate sem.

² A o Del phenda leke: Le e Isaake, cho edino chaurro kai pe gachin voli, ta llatar ande phuv katar e Moria. Kana ka ave incha, dele kurbano po burdo kai me ka phenav chuke.

³ O Abraam ustilo thiarinako rano, lacharda po magarcho, chinda kasta e kurbanoke ta llelotar po than kai o Del phendaia leke te llal, ta inllarda pea pe chaurre e Isaake ta dui katar pe sluge.

⁴ Kana nakhle trin llive, o Abraam vazdia pe akha ta dikhla o than duratar.

⁵ Ondaka o Abraam phenda pe slugenge: Tumen achen kate e magarchoia, me ta o chaurro ka lla angle, ka blagosi e Devle ta mapalal ka iri amen.

⁶ O Abraam lia e kasta e kurbanoke ta thoda len pe zea e Isaakeke, mapalal lia e churi ta e iag, ta lleletar e dui.

⁷ Ondaka kana phirena, o Isaak phenda e Abraameke: ¡Dade! A o Abraam phenda leke: ¿So mange chaurrea? A o Isaak phenda leke: Dik, si amen e kasta ta e iag, a ¿kaitalo o bakro e kurbanoke?

⁸ O Abraam phenda: Chaurrea, o Del ka del iek bakro e kurbanoke. Ta e dui phirena.

⁹ Ta kana avile kai o than kai o Del phendaia leke, o Abraam lacharda iek altar ta lacharda e kasta, mapalal phangla pe chaurre e Isaake ta thoda le po altar, upral pe kasta.

¹⁰ A kana o Abraam inzarda po va ta lia e churi te chinel e korr pe chaurreki.

¹¹ Ondaka o suecho e Devleko ikharda le katar o miloso, ta phenda leke: ¡Abraam! ¡Abraam! A o Abraam phenda: Kate sem.

¹² O suecho phenda leke: Na vazde cho va po chaurro, ta na cher leke niso, soke llanav kai dara katar o Del, soke ni dian tut palpale ta llelan angle te de man che edine chaurre.

¹³ Ondaka o Abraam vazdia pe akha ta dikhla kai palal katar leke zea, saia iek bakro kai achilo phanglo katar pe singa maskar e kasta. Ondaka llelo o Abraam, lia e bakre ta dia le kurbano po than pe chaurreko.

¹⁴ Ta o Abraam thoda o anav katar gua than, o Del del so trubul. Goleke phendol allive: Po burdo o Del ka del so trubul.

¹⁵ Ta o suecho e Devleko ikharda pale o duito e Abraame katar o miloso,

¹⁶ ta phenda leke: Soke cherdan gaia ezgoda, ta ni achadan te de man che edine chaurre, me o Del jav sovel pe ma,

¹⁷ kai ka blagosiv tut. Ka cherav cho porodo te avel gia baro sargo e cheraia e milosoke, ta sargo e chisai kai si pase pasa e mora. Ta cho porodo suako drom ka dobin pe dusmanonenge forura.

¹⁸ Ta katar chi vicha ka avel blagosime sa o sueto e phuviako, soke kandian man.

¹⁹ Mapalal o Abraam irisailo kote kai sea leke sluge, ta saurre lleletar ando Berseba, ta kote achilo te zivil.

E chaurre katar o Najor

²⁰ A kana nakhla nesavo vreme kotar, ande e viasta kai o Abraam, ta phende leke kai e rromi katar leko phlal o Najor, e Milka, avila la minone.

²¹ O purvo chaurro saia o Uz, mapalal biandilo leko phlal o Buz, mapalal o Kemuel, kai saia o dad katar o Aram.

²² Mapalal biandile o Kesed, o Jazo, o Pildas, o Idlaf ta o Betuel.

²³ Gava Betuel saia o dad katar e Rebeka. Gala si e ojto chaurre kai e Milka dia e Najore, o phlal katar o Abraam.

²⁴ A o Najor avila le aver chaurre katar leki duito rromi e Reuma. Gala si lenge anava: O Teba, o Gajam, o Tajas ta o Maaka.