Кэздэто 21 - Biblia ande chib Romani

Biandol o Isaak

¹ Isto gia sar o Del phendaia, e Sara achili khamni,

² ta e Sara achili khamni ta dia iek minono e Abraame ande po phuripe, ando vreme kai o Del phendaia lake.

³ Ta o Abraam thoda e minoneko anav kai e Sara dia le, Isaak.

⁴ Ta pala e ojto llive kai biandilo o Isaak o Abraam cherda leke e sirkunsision, gia sar o Del phendaia leke te cherel.

⁵ Ta o Abraam saia leke stotina burs kana biandilo leko minono o Isaak.

⁶ Ondaka e Sara phenda: O Del cherda man te asav, ta vareko te asunela, ka asal manchar.

⁷ ¿Ko phendaia e Abraameke kai me ka dav te piav kolin minonen? A me diem le iek minono ande leko phuripe.

E Agar ta o Ismael si tradine katar o cher e Abraameko

⁸ Ta o minono o Isaak barilo. Ta o llive kai e Sara ni dia le ios te piel kolin, o Abraam cherda iek bari slava.

⁹ A e Sara dikhla kai o chaurro kai diaia e Agar e ejipsia e Abraame, marela espurnia katar o Isaak lako chaurro.

¹⁰ Ondaka lleli kai o Abraam ta phenda leke: ¡Trade katar gole sluga ta lake chaurre! soke mo chaurro o Isaak ni ka fulavel o barvalipe kai si te lel.

¹¹ Gaia orba dukhada but e Abraame cheres leko chaurro.

¹² Ondaka o Del phenda e Abraameke: Na brigisao katar cho chaurro ni katar chi sluga, ta sa so ka mangel tutar e Sara cherle, soke chi vicha ka avel katar o Isaak.

¹³ A i katar e vicha katar che slugako chaurro ka cherav te avel iek bari phuv, soke si cho chaurro.

¹⁴ Thiarinako rano o Abraam dia kai e Agar marrno ta iek morchi paiea, ta thoda le pe lake zea, ta dia late e minone e Ismaele ta tradia la. A voi llelitar ta phirela po pusto katar o Berseba, a ni llanela kai llala.

¹⁵ Ta kana ni achila la ios pai ande morchi, thoda e minone telal tala iek kastorro,

¹⁶ ta lleli te besel na but dur katar o minono soke phenela: Ni kamam te dikhav e minone sar ka merel. Ondaka o minono thoda te rovel bare avazea.

¹⁷ Ta o Del asunda o avazi e minoneko kai rovela, ta katar o miloso o suecho e Devleko ikharda e Agare ta phenda lake: ¿So si chuke Agar? Na dara, soke o Del asunda o roipe e minoneko kote kai si.

¹⁸ Lla ta vazde e minone, ta istar le e vastetar, soke me ka cherav te likel letar iek bari phuv.

¹⁹ Ondaka o Del cherda te dikhel iek bunari paieko. Voi lleli ta pherda e morchi pai, ta dia te piel e Ismaele.

²⁰ Ta o Del pomozila e minone, ta vou barilo, ta saia but lacho te chudel e llide e arkoia.

²¹ Ta vou zivisarda ando pusto katar o Paran, ta leki dei zinisarda le iekhe diskiniaia katar o Ejipto.

O Abraam ta o Abimelek achen pe iek orba

²² Avilape isto ande gua vreme kai o Abimelek llelo te del orba e Abraamea ta llelo lea o Fikol, o mai baro katar leke boñikura. A o Abimelek phenda e Abraameke: Amen dikha kai o Del pomozil tut pe sa so chere.

²³ Goleke ja mange sovel po Del isto kate, kai tu ni ka chere o bilachipe mange, ni me chaurreke, ni me unukoke. Ja mange sovel kai gia sar me sema lacho tuia, isto gia tu ka ave lacho e llenenchar katar gaia phuv kai tu zivi.

²⁴ Ta o Abraam jala leke sovel.

²⁵ A o Abraam phenda leke kai leke ni pela drago so cherde e sluge katar o Abimelek, soke liea katar o Abraam iek bunari.

²⁶ A o Abimelek phenda: Me ni llanav ko cherda gaia ezgoda ta tu ni phendan mange niso, ta me iakom allive asundem le.

²⁷ Ondaka o Abraam lia bakre ta guruva, ta dia len kai o Abimelek. Ta isto gua llive e dui achile pe iek orba.

²⁸ A o Abraam thoda efta bakre pe iek rig,

²⁹ goleke o Abimelek puchla le: ¿Soke thodan gala efta bakria pe iek rig?

³⁰ A o Abraam phenda: Gale efta bakrienchar kai dav tut, si te llane kai me cherdem gava bunari.

³¹ Goleke gua than ikharda le Berseba, soke kote e dui jale sovel.

³² Ta kana von achile pe orba ando Berseba, o Abimelek ta o Fikol, o mai baro katar leke boñikura, irisaile kai e phuv katar e filisteura.

³³ Ta kote o Abraam thoda ande phuv te bariol iek kas, ta kote blagosisarda e Devleko anav o Gazda o Del o ostade.

³⁴ Ta o Abraam zivisarda but burs ande phuv katar e filesteura.