Кэздэто 2 - Biblia ande chib Romani

¹ Gia o Del getosarda o miloso ta e phuv ta sa so si ande lende.

² Ta o eftato llive o Del getosarda sa so cherda, ta gua llive ni radisarda ios pe so thodaiape te cherel.

³ Ondaka o Del blagosisarda o eftato llive, ta phenda te avel santo, soke ande gua llive achilo te radil katar sa pe so thodaiape te cherel.

O manus ando Eden

⁴ Gia si sar cherdilo o miloso ta e phuv. Ando llive kana o Del o Gazda cherda o miloso ta e phuv,

⁵ ondaka ni sea e patra ta ni barilaia o zelenipe, soke o Del ni ios ni cherdaia te delpeke pe phuv ta ni saia niko te radil e phuv.

⁶ A katar e phuv likela o pai sargo iek aburo kai chingarela sa e phuv.

⁷ Ondaka o Del o Gazda cherda e muruse katar o prajo e phuviako, ta phurdia ande leko nak balav zivotoki. Gia o manus thoda te zivil.

⁸ Mapalal o Del o Gazda cherda iek vostano karing likel o kham katar o Eden, ta thoda kote e muruse kai cherdaia.

⁹ A o Del o Gazda cherda te bariol katar e phuv suako kasta sukar kai den septelie lache te janpe, a po maskaral katar o vostano thoda i o kas e zivotoko, ta o kas katar o llanglipe katar o lachipe ta o bilachipe.

¹⁰ Ta likela katar o Eden iek len kai chingarela o vostano, ta kotar fuladola pe star riga.

¹¹ E purvo len ikhardola Pison, gaia si kai nakhel truial katar sa e phuv katar e Javila, kote kai si sunakai,

¹² ta o sunakai katar goia phuv si lacho, ta i si barra bedelio ta onise.

¹³ E duito len ikhardol Gijon, gaia si kai llal truial katar sa e phuv katar o Kus.

¹⁴ A e trito len ikhardol Jidekel, gaia si kai nakhel katar e rig katar perel o kham katar e Asiria. A e starto len si o Eufrates.

¹⁵ Kana o Del o Gazda thoda e muruse ando vostano katar o Eden, te sai radil ande lete ta te sai arakhel le,

¹⁶ mukla leke gala alava: Sai ja katar suako septelia e kastengi kai si ando vostano,

¹⁷ a katar o kas katar o llanglipe katar o lachipe ta o bilachipe, ni ka ja katar leke septelie. Soke o llive kai jaia letar, chachimaia ka mere.

¹⁸ Mapalal o Del o Gazda phenda: Inai sukar te avel korkorre o murus. Ka cherav leke, ko te pomozil le.

¹⁹ Ondaka o Del o Gazda cherda katar e phuv suako zivirinia divi ta i golen kai inai dive, ta suako chirikli e milosoki, ta anda len kai o Adan te sai vou thovel lenge anava. Ta o Adan thoda anava sa e zivirinienge kai si len zivoto, ta gia achilo lengo anav.

²⁰ Ta thoda o Adan anav sa e zivirinienge kai inai dive, ta sa e chiriklienge, ta sa e zivirinienge kai si dive. A o Adan ni malada ko te pomozil le.

²¹ Ondaka o Del o Gazda cherda te perel iek bari lindri po Adan, ta kana vou sovela, ikanda iek katar leke pasuare, ta phangla o mas pe po than.

²² Ta katar o pasuaro kai ikanda letar, o Del o Gazda cherda iek diskinia ta andala kai o manus.

²³ Ondaka kana dikhla la phenda: ¡Gava si akana kokala katar me kokala, ta mas katar mo mas! Voi ka ikhardol diskinia, soke o Del ikandala katar o murus.

²⁴ Goleke o murus ka mukel pe dade ta pe da te avel pe diskiniaia, ta e dui ka aven sargo iek mas.

²⁵ Ta e dui sea nange, o manus ta leki diskinia ta ni lallana.