Кэздэто 17 - Biblia ande chib Romani

E sirkunsision te sai dikhol pe savi orba achile

¹ Kana o Abram saia leke iniavardes ta inia burs, o Del sikadilo leke ta phenda leke: Me sem o Del kai si le sa e zor. Zivisar iek zivoto orta angla ma.

² Ta me ka achav pe iek orba tuia: Ka cherav te avel cho porodo but baro.

³ Ondaka o Abram bangilo lligo ni leko chikat dodisarda e phuv, ta o Del phenda leke:

⁴ Pe gaia orba achav tuia: Tu ka ave o dad bare suetoko.

⁵ Ta tu ni ka ikhardo ios Abram, katar angle tu ka ikhardo Abraam, soke ka cherav tut dad bute phuviengo.

⁶ Ka cherav cho porodo te avel but baro ta tutar ka liken charura ta phuvia.

⁷ Ta pe orba kai achav tuia ta che porodoia kai ka avel mapalal tutar, si ostade. Me ka avav Cho Del ta i o Del che porodoko kai ka avel mapalal tutar.

⁸ Ta tut ta che porodo kai ka avel mapalal tutar ka dav len sa e phuv katar o Kanaan. Kate kai tu zivi akana, ka avel lengo ostade, ta me ka avav lengo Del.

⁹ Ta i phenda o Del e Abraameke: A tu kande e orba kai achilem tuia, tu ta i sa cho porodo kai ka avel mapalal tutar.

¹⁰ Gaia si e orba kai ka achav tumenchar ta kai morabi te kandel sa cho porodo kai ka avel mapalal tutar: Sa e murusa maskar tumende, morabi te cheren lenge e sirkunsision.

¹¹ E sirkunsision ka avel iek ezgoda te dikhol kai tumen ta me, achilam pe iek orba.

¹² Katar angle sa e minone kai ka biandon maskar tumende, kana ka avel lenge ojto llive morabi te cheren lenge e sirkunsision. Gala alava si i e slugenge kai chinden, ta e llenenge kai zivin tumenchar kai si katar aver phuvia.

¹³ Morabi te sirkunsidin e minonen kai biandile ande cho cher, ta i golen kai chindan che lovenchar. Gia e orba kai achilem tumenchar ka inllaren la pe tumari esnaga, sargo pe alava kai achilam kai si sa ostade.

¹⁴ A o lleno kai ni cherde leke e sirkunsision, ni del liubao gale alavenge kai achilam. Gua lleno nasti ka zivil tumenchar.

¹⁵ Ta i phenda o Del e Abraameke: Chi rromi e Sarai ni ka ikhardol ios gia, katar angle voi ka ikhardol Sara.

¹⁶ Ta me ka blagosiv la, ta ka dav tut iek minono latar. Ea, me ka blagosiv la. Voi ka avel e dei bute phuviengi, ta katar lako porodo ka liken charura e phuvienge.

¹⁷ Ondaka o Abraam bangilo lligo ni leko chikat dodisarda e phuv, ta thoda te asal ta mislilape ande po lio: ¿Sai avel le minone iekhe llene kai si leke stotina burs? ¿A e Sara kai si lake iniavardes burs, sai ka avel la iek minono?

¹⁸ Ondaka o Abraam phenda e Devleke: ¡De e Ismaele gua blagosipe!

¹⁹ A o Del phenda leke: So me phenden si kai chi rromi e Sara ka del tut iek minono, ta tu ka thove leko anav Isaak.

²⁰ A cheres o Ismael, asundem tut so manglan mandar ta ka blagosiv le, ta ka cherav te aven le but minone, ta te bariol leko porodo. O Ismael ka avel o dad katar desudui gazda, ta ka cherav letar iek phuv but bari.

²¹ A mo alav kai diem ka avel e Isaakea, o chaurro kai e Sara ka del tut ande gava vreme, burs llive ios.

²² Ta kana o Del getosarda te del orba e Abraamea llelotar kotar.

²³ Ondaka o Abraam lia pe chaurre e Ismaele, ta sa pe slugen kai biandile ande leko cher, ta golen kai chindaia pe lovenchar, ta sa e murusen kai zivina ande leko cher ta kai radina leke, ta cherde lenge e sirkunsision, gia sar o Del phendaia leke te cherel le.

²⁴ O Abraam saia leke iniavardes ta inia burs kana cherde leke e sirkunsision.

²⁵ A o Ismael saia leke desutrin burs kana cherde leke e sirkunsision.

²⁶ Ta isto ande gua llive cherde e sirkunsision e Abraameke ta leke chaurreke e Ismaeleke.

²⁷ Ta sa e murusenge katar leko cher, ta i e slugenge kai biandile ande leko cher, ta i e slugenge chinde lovenchar katar e llene kai si katar aver phuvia.