Кэздэто 16 - Biblia ande chib Romani

E Agar ta lako chaurro o Ismael

¹ E Sarai, e rromi e Abrameki, nasti dela le minonen, a la saia iek sluga ejipsia kai ikhardola Agar.

² Ondaka e Sarai phenda e Abrameke: Dik, o Del ni mukla man te avel man minone, goleke molivman chuke, thov tut ande iek than me slugaia e Agaraia, kai sai avelpe kai latar ka avel man minone. Ta o Abram cherda so mangla letar e Sarai.

³ Ta kana cherela des burs kai zivina ando Kanaan, e Sarai anda pe sluga ejipsia kai o Abram, ta dia la leke te avel leki rromi.

⁴ Ta o Abram thodape ande iek than e Agaraia, ta voi achili khamni, a kana llangla e Agar kai ka avel la iek minono thoda te dikhel jolinaia pe Sarai.

⁵ Ondaka e Sarai phenda e Abrameke: ¡Tu san o dosalo kai e Agar murzil pe ma! ¡Isto me diem la chuke te avel chi diskinia, ta akana kai ka avel la iek minono dikhel pe ma jolinaia. O Del te chinel e kris ko si o dosalo, tu o me!

⁶ A o Abram phenda lake: Dik, chi sluga si ande che va, cher laia sar tu mangea. Ondaka e Sarai thoda te avel bilachi e Agaraia, ta pala gaia ezgoda e Agar nasli latar.

⁷ A iek suecho e Devleko malada la po pusto pasa iek paiorro kai si po drom kai llal ando Chur,

⁸ ta phenda lake: Agar, sluga katar e Sarai, ¿katar ave ta kai lla? Voi phenda: Nasav katar e Sarai mi gazda.

⁹ Ondaka o suecho e Devleko phenda lake: Irisao kai chi gazda, ta muk te gazdaril pe tute.

¹⁰ Ta i phenda lake gia o suecho e Devleko: Ka bariarav pe gachin cho porodo, kai niko nasti ka llinel le.

¹¹ Akana san khamni ta ka avel tut iek minono, ta ka thove leko anav Ismael, soke o Del asunda cho roipe.

¹² O Ismael ka avel divome sargo iek zivirinia, ka marelpe saurrenchar ta saurre ka marenpe lea, ta vou ka besel ande pi phuv ta ka zivil angla sa pe phlal.

¹³ Ondaka ikharda o anav e Devleko kai dela orba laia: Tu san o Del kai dikhel, soke phenda: ¿Ni dikhlem kate e Devle kai dikhel man?

¹⁴ Goleke o bunari ikhardol: Gua kai zivil ta dikhel man. Gava bunari achel maskar o Kades ta o Bered.

¹⁵ Ta e Agar dia iek chaurro e Abrame, ta o Abram thoda leko anav Ismael.

¹⁶ O Abram saia leke ojtovardes ta sov burs kana biandilo leko chaurro o Ismael.