Кэздэто 13 - Biblia ande chib Romani

O Abram ta o Lot fuladile

¹ O Abram likisto katar o Ejipto pe rromiaia ta sa pe ezgodenchar kai saia le, ta irisailo ande phuv katar o Negev pe sinouchoia o Lot.

² O Abram saia but barvalo soke saia le sunakai, rup ta but zivirinie.

³ Ta katar o Negev irisailo poloke lligo ni avilo kai o foro katar o Betel, ta kotar llelotar karing o than kai inzardaia pi chara o purvo drom, maskar o Betel ta o Ai.

⁴ Ta kote saia kai o Abram vazdiaia iek altar te blagosil e Devleko anav, ta kote molisailo.

⁵ Ta i o Lot kai llala lea, saia le bakre, guruva ta i chare.

⁶ A pe goia phuv kai sea, ni resela te jan pe gachin zivirinie. Ta nasti zivina ande iek than,

⁷ soke janape e chobanura e Abrameke ta e chobanura e Loteke. Ta i ande gua vreme, e kananeura ta e fereseura zivina ande goia phuv.

⁸ Goleke iek llive o Abram phenda e Loteke: Tu ta me sam phlal, inai sukar te avel chingar maskar amende ta maskar amare chobanura.

⁹ ¿Inai angla tu sa e phuv? Goleke mangav tutar te fulado mandar. Te llaia po stingo me ka llav pe chachi, a te llaia pe chachi me ka llav po stingo.

¹⁰ O Lot dikhla pe sa e bari umal katar o Jordan, kai latar nakhela e len llik kai o Soar. Sa goia bari umal saia la but pai sargo o vostano e Devleko ta sargo ando e Ejipto. Gaia phuv saia gia mai anglal o Del te zatril e Sodoma ta e Gomorra.

¹¹ Ondaka o Lot ezvirisarda e bari umal katar o Jordan, ta llelo karing likel o kham. Ta gia o Abram ta o Lot fuladile.

¹² O Abram achilo ando Kanaan, a o Lot llelotar te zivil pasa e forura kai si ande bare umalia pasa o foro katar e Sodoma,

¹³ ta sa e llene ande gua foro sea but bilache ta cherena but baro bilachipe karing o Del.

¹⁴ Mapalal kana llelotar o Lot, o Del phenda e Abrameke: Pe rig kai san, dik karing o norte ta karing o sur, ta karing likel o kham ta karing perel o kham.

¹⁵ Soke me ka dav tut sa gaia phuv kai dikhe. Ostade ka avel chiri ta che porodoki.

¹⁶ Me ka cherav te aven pe gachin sargo o prajo e phuviako. A vareko te sai llinela o prajo e phuviako, gia i chi vicha ka avel llindi.

¹⁷ ¡Uste ta phir gaia phuv pe sa lako lungipe ta bulipe, soke me ka dav la chuke!

¹⁸ O Abram chidia pi chara ta laglo, ta llelotar te zivil ando vos kai si e bare kasta katar o Mamre, pasa o foro kai ikhardol Jebron. Ta kote vazdia iek altar de Blagosil e Devle.