Кэздэто 11 - Biblia ande chib Romani

E torre katar o Babel

¹ Ande gua vreme sa o sueto dela orba ande iek chib.

² Ta kana e manusa likiste katar e rig katar likel o kham, malade iek bari umal ande phuv katar o Sinar, ta kote achile te zivin.

³ Ta iek llive phende von iek avereke: Aven te chera chikle ta thova len ande furnava iagaki. Ta gia ni radisarde ios e barrenchar, ta o turkali lia o than katar e ezgode kai amina.

⁴ Ta phende: Aven te chera iek foro ta iek torre te resel llik upre ando miloso. Ta gia ka ava pinllarde, ta ni ka ava rispime pe phuv.

⁵ A o Del fulisto te dikhel o foro ta e torre kai cherena e manusa.

⁶ Ondaka o Del phenda: Akana von si iek foro ta den orba ande iek chib, ta thodepe te radin ta niso ni ka achavel len te muken gava rado.

⁷ Mai sukar fulia ta chera te na acharen pi chib kai den orba iek averea.

⁸ Gia o Del rispisarda len pe sa e phuv ta mukle te cheren gua foro.

⁹ Ta kote o Del pharruda e chibia katar sa e manusa, ta kotar rispisarda len pe sa e phuv. Goleke gua foro ikharde le Babel.

O porodo katar o Sem

¹⁰ Gaia si e vicha kai likisti katar o Sem: Kana nakhle dui burs katar o baro pai kai uchardaia sa e phuv, o Sem saia leke stotina burs kana biandilo leko chaurro o Arfajsad.

¹¹ Ta mapalal kana biandilo leko chaurro o Arfajsad, o Sem zivisarda panch stotine burs ios ta avilale chaurre ta chorra.

¹² O Arfajsad saia leke tranda ta panch burs kana biandilo leko chaurro o Selaj.

¹³ Ta mapalal kana biandilo leko chaurro o Selaj, zivisarda star stotine ta trin burs ios, ta avilale chaurre ta chorra.

¹⁴ O Selaj saia leke tranda burs kana biandilo leko chaurro o Eber.

¹⁵ Ta mapalal kana biandilo leko chaurro o Eber, o Selaj zivisarda star stotine ta trin burs ios, ta avilale chaurre ta chorra.

¹⁶ O Eber saia leke tranda ta star burs kana biandilo leko chaurro o Peleg.

¹⁷ Ta mapalal kana biandilo leko chaurro o Peleg, o Eber zivisarda star stotine ta tranda burs ios, ta avilale chaurre ta chorra.

¹⁸ O Peleg saia leke tranda burs kana biandilo leko chaurro o Reu.

¹⁹ Ta mapalal kana biandilo leko chaurro o Reu, zivisarda dui stotine ta inia burs ios, ta avilale chaurre ta chorra.

²⁰ O Reu saia leke tranda ta dui burs kana biandilo leko chaurro o Serug.

²¹ Ta mapalal kana biandilo leko chaurro o Serug, zivisarda dui stotine ta efta burs ios, ta avilale chaurre ta chorra.

²² O Serug saia leke tranda burs kana biandilo leko chaurro o Najor.

²³ Ta mapalal kana biandilo leko chaurro o Najor, zivisarda dui stotine burs ios, ta avilale chaurre ta chorra.

²⁴ O Najor saia leke bis ta inia burs kana biandilo leko chaurro o Teraj.

²⁵ Ta mapalal kana biandilo leko chaurro o Teraj, o Najor zivisarda stotina ta desunia burs ios, ta avilale chaurre ta chorra.

²⁶ O Teraj saia leke eftavardes burs kana biandile leke chaurre o Abram, o Najor ta o Jaran.

O porodo katar o Teraj

²⁷ Gaia si e vicha kai likista katar o Teraj, kai saia o dad katar o Abram, o Najor, ta o Aran. A o Aran saia o dad katar o Lot.

²⁸ Ta o Aran mulo mai anglal neko po dad o Teraj. Ta mulo ando Ur katar e kaldeura isto kote kai biandiloa.

²⁹ O Abram zinisailo e Saraiaia, a o Najor zinisailo e Milkaia, kai saia chei katar o Aran ta phiorri katar e Iska.

³⁰ E Sarai saia iek diskinia kai nasti avena la minone.

³¹ O Teraj likisto katar o Ur katar e kaldeura ta llelo kai e phuv katar o Kanaan, ta inllarda pea pe chaurre e Abrame, ta pe unuko e Lote, ta pe boria e Saraia. A kana avile ando Jaran, kote achile te zivin.

³² Ta o Teraj zivisarda dui stotine ta panch burs, ta mulo ando Jaran.