Kantares 6 - Biblia ande chib Romani

Llilaben sa

¹ ¿Kai llelotar gua kai volil le tu kai san e mai sukar katar e diskinie? ¿Kai llelo? ¡Ka lla tuia te roda le!

Voi

² O lleno kai voliu le llelo kai po vostano, leko vostano kai khandel sukar te arakhel pe bakren ta te chinel e lulunlla.

³ Me sem e lleneko kai volil man, ta vou si murno. Vou arakhel e bakren maskar e lulunlla.

E panchto llili Vou

⁴ Gia sukar san mi amal, sargo o foro Tirsa, ta sargo o Jerusalem, glamni sargo e boñikura kana si pe po than.

⁵ Le che akha mandar, soke diliaren man. Che bal si sargo busnorre kai inzon pe umalia katar o Galaad.

⁶ Che danda si sargo bakre kai naiarde len, si len minone bisniake kai si lacharde te chinen lenge bal.

⁷ Che chama dikhon sargo dui phabaia gurudine pala cho dikhlo.

⁸ Sovardes si e charoine, ojtovardes e konkubine ta ios mai but e chea,

⁹ a iek si mi gulubicha kai inai la ni iek bilachipe, voi si e edini chei pe daki kai bianda la. Kana dikhle la e chea phende te avel blagosime, e charoine ta e konkubine blagosisarde la.

Llilaben sa

¹⁰ ¿Ko si gaia kai sikadol sargo o kham kana llivosaol? Voi si sukar sargo o chon, klichil sargo o kham. ¡Glamni sargo e boñikura kana phiren!

Voi

¹¹ Llelem kai o vos e akhorengo, llelem te dikhav e septelie katar e bari umal te dikhav dal bariona e drakha ta e lulunlla pe kasta katar e granade.

¹² Ni llanav sar avilem maskar e bordona katar o Aminadab.

Llilaben sa

¹³ ¡Irisao sulamita, irisao! ¡Irisao kai manga te dikha tut! ¿A so mangen te dikhen katar e sulamita? ¡Manga te dikha iek chelipe sargo ando kolo!