Kantares 5 - Biblia ande chib Romani

Vou

¹ Avilem kai mo vostano phiorrie, rromie murni. Liem mi mirra ta mo meriso, jalem katar mo aullin, pilem mi mol ta mo thud. Jan ta pien tumen kai sen me amal tumen kai voliu.

Llilaben sa Starto llilabipe Voi

² Me sovava a mo lio saia llungado. Asundem kai ikharela po udar o lleno kai voliu le. Putar mange tu san mo volipe, phiorrie murni, gulubicha murni kai inai tut bilachipe, soke mo soro chingilo soke pechalpeke ta me bal chingile katar o pai e rachako.

Vou

³ Ikandem mandar me patave, ¿sar ka thovav pe mande pale? Jaladem me porrne, ¿sar ka meliavav len pale?

⁴ O lleno kai voliu le nakhada po va katar e penlleravicha e udareki ta izdraio mo lio.

⁵ Me ustilem te putarav e lleneke kai voliu le, ta katar me va ta me naia perela e mirra ta thavdela pe alkava e udareki.

⁶ Putardem e lleneke kai voliu le, a vou lleloiatar ta ni saia po udar. Rodiem le, ta ni maladem le, ikhardem le, a ni dia man anglal.

⁷ Malade man e boñikura kai arakhen o foro, chalade man, dukhade man. ¡Gola kai arakhena o udar e foroko lie mandar mo gertachi kai saia pe mande!

⁸ Diskinie katar o Jerusalem, jan mange sovel, kai te maladen gole kai voliu, ka phenen leke kai merav volimatar.

Llilaben sa

⁹ ¿So si gole kai voli kai inai avere, tu kai san e mai sukar katar e diskinie? ¿Soke si gia lacho gua kai voli le kai chere amen te ja chuke sovel pe goia ezgoda?

Voi

¹⁰ O lleno kai voliu le si parrno, inai ni iek sargo vou maskar des milie.

¹¹ Leko mui si sargo o sunakai o mai kuch, leke bal si phagarde, kale sargo iek kuervo.

¹² Leke akha si sargo gulubura pasa e paia katar e len kai naion ando thud.

¹³ Leke chama si sargo umalia pherde lulunlla kai khanden sukar. Leke us si sargo iek lulunllin kai thavdel mirra kai khandel sukar.

¹⁴ Leke va si sargo angrusta sunakune ucharde ande barra katar o topasio, leki esnaga si sargo o marfil kai klichil, ta uchardo ande barra katar o safiro.

¹⁵ Leke porrne si direkura cherde katar o marmol kai besen po sunakai o mai lacho, dikhon glamne sargo e kasta katar o Libano, esvirime sargo o sedro.

¹⁶ Leko mui si but guglo. ¡Vou chudel petar sukaripe! Gia si o lleno kai voliu le, gia si mo amal. ¡Ioi diskinie katar o Jerusalem!