Kantares 4 - Biblia ande chib Romani

Vou

¹ ¡Gia sukar san mi amal, tu san mo volipe! ¡Gia sukar san! Che akha si dui gulubura kai gurudon pala cho dikhlo, che bal si sargo busnorre kai inzon pe umalia katar o Galaad.

² Che danda si sargo bakre kai naiarde len ta si lacharde te chinen lenge bal. Sa si len phiorra bisniake ta saurre si pe po than.

³ Che us si sargo thava lole, cho orba si mi dragostia. Che chama si lole sargo phabaia gurudine pala cho dikhlo.

⁴ Chi korr si lungi sargo o cher e Davideko kai cherde le te guruven e ezgode marimake. Milia eskudura si umblade pe lete, sa si eskudura katar e llene tromane.

⁵ Che kolina si sargo dui gasele, dui gasele kai si phlalorre bisniake kai jan char maskar e lulunlla.

⁶ Aduricharav te perel o kham ta te llalntar e senke, te likav po burdo katar e mirra, po burdo katar o taimano.

⁷ ¡Tu san sukar mi amal! ¡Inai tut ni iek ezgoda bilachi!

⁸ Aide manchar katar o Libano, rromie murni. Aide manchar katar o Libano. Dik katar o than vazdino katar o Amana, katar o than vazdino katar o Senir ta o Jermon, katar o than kai gurudon e lionura, katar e burdura katar e leopardura.

⁹ Mo lio si chiro phiorrie, rromie murni, phanglan mo lio iekhe sinllirea kai si pe chi korr kana dikhlan pe mande.

¹⁰ ¡Gia sukar si cho volipe, phiorrie, rromie murni! ¡Mai sukar neko e mol si cho volipe, ta mai sukar si chiri khand neko sa e merisura kai si pe phuv!

¹¹ Rromie murni, katar che us perel o aullin. ¡Aullin ta thud si telal katar chi chib! ¡Gia sar khandel o Libano isto gia khanden che patave!

¹² Tu san iek vostano phanglo, phiorrie, rromie murni, than e paieko phanglo, iek bunari phanglo.

¹³ Che lulunlla veve si sargo iek vostano kai barion granade ta e mai lache septelie, ta barion lulunlla katar e alenia ta o nardo.

¹⁴ Nardo ta asafran, kotor kas kai khandel sukar ta karanfili, ta suako kas katar o taimano, katar e mirra ta aloe, ta katar e mai lache merisura.

¹⁵ O than katar o pai kai si ando vostano, si iek bunari kai likel o pai katar e phuv kai fuliel katar o Libano.

Voi

¹⁶ ¡Uste balav katar o norte! ¡Uste balav katar o sur! ¡Phurde pe mo vostano ta cher te chudel petar po meriso! Aide, manusea kai voliu tut, aide kai cho vostano ta ja katar leke septelie kai si gugle.